PIDARTA BAHASA BALI

OLEH :

NI MADE INDAH AFSARI PUTRI

25
X MIPA 4

SMA NEGERI 1 TABANAN

TAHUN AJARAN 2016/2017

PIODALAN SANGHYANG AJI SARASWATI

Ida dane para sameton sane kusumayang titiang, Om Swastyastu.

Lugrayang ring galahe sane becik puniki, titiang jagi mapidarta indik Piodalan Sanghyang
Aji Saraswati.

Krama Hindune akeh pisan maduwe rerahinan. Silih tunggil rerahinane punika
wenten sane mawasta rahinan piodalan Sanghyang Aji Saraswati. Rahinane puniki rawuh
ngenem sasih nuju dina saniscara umanis Watugunung.
Sanghyang Aji Saraswati manut kepercayaan karma Hindu wantah pinaka Batara
utawi Batari sane nedunang sakancan pangewruh utawi Ilmu Pengetahuan ring jagate. Punika
mawinan Ida Batari Sanghyang Aji Saraswati mapaiketan sareng para sisya sane sedek
masekolah inggian punika ring SD ngantos ring Perguruan Tinggi. Punilka mawinan ring
rahina Piodalan Sanghyang Aji Saraswati, sami sekolahane ngodalin tur para sisyane
ngaturang sembah pangubakti irika.
Manut tattwa, ri kenjekan rahina Saraswati, iraga sareng sami nenten kadadosang
masesuratan utawi nyurat ngangge aksara Bali. Sane katangarin yen nyurat ngangge aksara
Bali tur wenten sesuratan iwang, raris kecoret utawi kapademang. Pamekas nenten
kadadosang mademang aksara Bali santukan Ida Batara Sanghyang Aji Saraswati tedun ke
jagate melinggih ring aksara Baline. Punika mawinan aksara Baline punika kabawos aksara
suci.
Ritatkala piodalan Sanghyang Aji Saraswati, saking semeng para sisyane sampun rauh
ke sekolah sowang-sowang. Irika raris awor tur campuh suaran gong, gegitayan, miwah
ambun dupane sane dados siki sareng ambun parfum para sisyane. Asep dupane ngadeg
sekadi nyujur ambara sane jagi mendak Ida Batara Sanghyang Aji Saraswati mangda gelis
tedun.
Sakewanten wenten piobet akedik sane patut elingang sareng sami. Indik busana para
sisyane jagi ngaturang sembah pangubakti, kantun akeh sane nenten anut. Sane istri-istri
kantun wenten sane ngangge kebaya tangannyane rauh ring siku kemanten, wenten sane
kainnyane kalintang tipis ngantos dagingnyane sane wenten ring tengah satmaka marawatrawat. Busana sane lanang-lanang kantun wenten makamben gantut ngantos ring lutut
kemanten, waluya sekadi anak jagi ngejuk bawi. Puniki sane patut elingngan, yen jagi muspa
mangda mabusana sane anut. Boya sekadi busana anak jagi malali utawi kundangan.
Yen sampun pada mabusana sane anut utawi sopan, sinah pamargi pabaktian iragane
jagi prasida sidaning don, Ida Batara ledang mapaica panganugrahan lamakane iraga sareng
sami pada rahayu, pada wikan ring sajeroning ngelungsur pangewruh Ida.

Ngiring ngawit mangkin iraga sane sampun dados sisya ring SMA mangda ngicen
conto adi-adi ring sekolah sane betenan miwah para janane sami antuk mabusana sane anut.
Inggih wantah asapunika pidarta sane prasida kawedar, dumogi wenten pikenohnyane.
Om Santi, Santi, Santi, Om.