17 September 2019 Nama : Pande Ayu Sri Padma Dewi W.

S
No : 30
Kelas : X MIPA 5

SESANANING SISIA MAJENG RING GURU PENGAJIAN

Inggih ida dane sareng sami, pamekas majeng ring para panureksa sane dahat wangiang
titiang, para guru pinaka pembinalomba sane kusumayang titiang, para pamilet lomba pidarta
basa Bali miwah semeton pamiarsa sareng sami sane tresna sihin titiang. Sadurung titiang
ngawitin pidartane puniki, ngiring sareng sami ngojarang pangastungkara pangayu
bagia,majeng ring Ida Sang Hyang Widhi Wasa, mogi-mogi Ida prasida ngicenin iraga sareng
sami karahayuan kadirgayusan majalaran antuk panganjali druene
“Om Swastyastu”
Ida dane sareng sami kawentenan titiang puniki, ngadegring ajeng ida danene nenten ja
nanginin anak sampun matangi, taler boya janasikin segara, titiang puniki, skadi girang-girang
gejorang, milu-milu tuun mangda prasida ja nyarengin acara puniki. Mungguing pidarta sane
jagi aturang titiang, inggih punika mamurda “Sesananing Sisia Majeng ring Guru Pengajian”
Ida dane sareng sami sane kusumayang titiang,napi sane kabaos sesana, sira sane kebaos
sisia, taler sire sane kabaos Guru Pengajian ? Minabang titiang, ida dane sami sampun
uning,sesana punika napi, sesana punika prilaksana, tingkah, urah-arih sane kalaksanayang. Sisia
punika, sang sane muatang penerangan, kaweruhan, sane gumanti maguna ring padewekane kaangen
nincapang kauripan yan turah mangkin kabaos kaangen nincapang sumber daya. Salanturipun sira
sane kabaos Guru Pengajian ? Guru Pengajian nenten wenten tios sang sane ngicenin kaweruhan, sang
sane ngicenin bekel idup. Sapasira ugi sane prasida ngicenin kaweruhan sane masifat fisik utawi rohani
prasida kabaos guru, tepengan puniki sane ngicen kaweruhan ring sekolah kabaos Guru Pengajian.
Artos punika yening kaiketang, mateges tingkah utawi urah-arih sang sane ngulati kaweruhan majeng
ring sang ngicenin kaweruhan. Sane mangkin pamekasne, sapunapi patutne matingkah, maprilaksana
majeng ring sang sane ngicenin kaweruhan sane kabaos Guru Pengajian punika ?

Inggih idadane sareng sami, yan cingak saking kruna guru, guru mawit saking basa sansekerta
saking kruna gur sane maartos abot, baat kawantenane. Pangajian ngawit saking kruna aji, sane
mateges kaweruhan utawi ilmu pengetahuan. Yan tilikin, yan rasaang sapunapi abotne Guru Pengajian
punika ngicenin kaweruhan, mempenin kabisan, ulian saking nenten uning punapi-puunapi ngantos
sida, minakadine prasida ngwacen, nyurat, uning mapakayun ngruak sahananing kapetengan ring
sajeroning pakayunan tur prasida ngwetuang wiweka kaangen nincapang kauripan padidi utawi
kaangen nincapang pawangunan ring jagate. Guru punika saking lascaria pikayunane ngicenin
kaweruhan tan pangitung kadang utawi tanpa kadangan kulawarga. Naenin ke guru minaang niki anak
I Kelor, niki anak I Dadap ? Nenten nenten wenten asapunika. Yan Inargamayangke Guru Pengajian
punika tan pedah kadi Sang Hyang Surya tan pangitung sapasira sane katerangin,patuh antuka
nerangin. Guru pengajian nenten naengin mamerih, yen cingakin, sisia-sisiane Sang Guru, akeh
sampun dados pajabat saking kelas sor ngantos pejabat kelas atas, guru tetep guru ten naenin
mirehang punapi-punapi ring sisia-sisiane punika, asiki pikayune Sang Guru, mangda sisia-sisiane
makasami prasida mapikolih nganutin tetujon kaweruhan sane kapicayang.

Sapunapi mangkin irage dados sisia madue rase tresna, rasa sayang ring Sang Guru ? Inggih,
ngiring ,ngiring mangkin,kayun-kayunin yan amunika abotne, nangken rahina ngamelmel ring ajeng
kelase, durung malih ngarepin sisia sane bandel sane sering ngaryanin ulah, rasa-rasa yen itung-itung
atumpukan iraga tegeh utange marep ring Sang Guru.

Inggih idadane sinamian sane wangiang titiang, wantah kadi asapunika atur pidarta titiang, mogi-
mogi wenten pikenohipun. Nunas ampure mantuk ring saluir kaiwangan atur titiang. Pinaka pamuput
atur titiang ngaturang parama santih

“Om Santih Santih Santih Om”

 Ngajegang Budaya Bali Antuk Busana Adat
Bapak ibu guru sane wangiang titiang, miwah timpal-timpal sareng sami sane tresnasihin
titiang,
Garjita dahat manah titiang saantukan ring rahina sane becik puniki titiang prasida kacunduk
ring ida dane sinamian saha polih galah maatur-atur samatra,. Sadurung nglantur lugarayang titiang
ngastiti ring Ida Sang Hyang Widhi Wasa antuk ngojarang pangastungkara panganjali

Om Swastiastu,
Ring pagubugan sarahina, titiang miwah ida dane majanten kapatut setata siaga nganggen
busana.yening wenten anak anom utawi sampun lingsir sane nenten mabusana ring margine janten
katarka wong edan utawi anak buduh. Tegesnyane nenten wenten anake pacang juari utawi nenten
mabusana angan akidik ring kahuripannyane. Sangkaning mabusana sane manut anake pacang
makanten becik, agung, miwah ayu. Mabusana taler sane mawinan iraga urip rahajeng taler sida
ngawinang sungkan. Dadosnyane ageng pisan jatinipun kawigunan busanane ring kahuripan druene
sarahina.sakewanten yening wenten anak mabusana nenten nganutin tata linggih mejanten taler
pacang ngwetuang salit rasa utawi ngawinang nenten seneng sange ngatonan. Bilih-bilih busana adat
baline.
Ring Indonesia, duaning panegara druene kawangun antuk makudang-kudang pulau sane
madue makudang-kudang suku bangsa saking adat maendahan, majanten taler pacang madue busana
adat sane matios-tiosan. Wnten busana adat bali, busana adat sunda, busana adat sasak, bugis miwah
sane lianan.
Ring bali taler kadi asapunika, krama adat baline sampun ketah pisan susrusa maparilaksana
ngrajegang budaya baline. Busana sane lumrah kaanggen rikala nyanggra pakaryan dinas janten
pacang mabiyanan ring busana kalaning ngalaksanayang pakaryan adat miwah agama. Upami rikala
pacang ngalaksananyang upakara dewa yadnya,patut nganggen busana pamuspan, marupa wastra
patut nganggen kuaca, miwah destar antuk sange lanang raris wastra,kebaya, anteng, saha
papusungan ring anak istri.
Busana-busana punika sajaba wastra,lumrahnyane mawarna sarwa putih utawi kuning,
sakewanten rikalaning nyarening indik upakara pitra yadnya utawi pangabenan, nganggen busana
sane mawarna sarwa ireng. Yening kaupakaren ring upacara metatah miwah mamiwaha kangkat
nganggen busana payas madia utawi agung. Anake sane pinaka pangayah utawi rikala ngayanga
sadereng unteng upacarane lumrah krama baline mabusana adat madia. Sane lanang mawastra,
maambed miwah madestar batik raris sane istri nganggen taler busana adat madia saha nenten setata
mapusungan.
Ida dane sinamian sane wangiang titiang,
Yening dados titiang ri sajeroning sareng nitenin ngrajegang budaya baline, ngiring pada
yatnain sareng-sareng mangda iraga sareng sami prasida mabusana sane setata manut ring sane
kaucap patut nganutin tata krama adat miwah agama druene. Mangda busaya adat baline setata ajeg
.
Inggih kadi asapunika titiang prasida maatur-atur ring galahe sane becik puniki, dumogi
wenten pikenohnyane. Makakirang langkung atur titiang, titiang nglungsur geng rena pengampura.
Pinaka pamuput atur lugrayang titiang ngajorang parama santih,
Om santih, santih, santih om