Skrip Licha Radio ( Versyen Iban )

Tajuk ( Topik ) : Ubat ti kamah tauka rusak

Soalan 1 ( Tanya 1)

Nama utai ti dikumbai enggau produksyen ( keluaran ) kamah ?

Saut Tanya

Ba saut tanya ti ke satu nya tadi , iya mai reti asil produksyen ti enda chulin tauka enda
engkeman dikena ba pengerai kitai mensia. Diatu mayuh produk ti bekaul enggau pengerai
enggau produk ti bekaul enggau pemakai suah ngundan racun ti enda manah ba pengerai kitai
mensia. Kelebih agi enti orang nya ngena produk nya ba timpuh ti lama. Pekara ti bakatu tau
nyadi laban pengilang ka ngulihka untung ti mayuh lalu nadai mikirka empas ( kesan )
ngagai orang ti ngena produk sida. Suah kitai meda iklan ba televisyen, majalah, tauka radio
madahka produk sida digaga ari herba ti d dipilih aja lalu ngaku produk sida digaga ari
perengka tradisyenal. Tang iya ke bendar iya , produk sida nya tadi udah dichampur enggau
ubat moden tauka rachun ba penyampau ti nadai ditemu kitai.

Soalan 2 ( Tanya 2 )

Uji padahka chunto ubat ti bisi ngundan rachun ?

Saut Tanya

Selalu iya sesekeda ubat ti bisi rachun tu produk ti enda dirijista. Entara rachun ti suah dikena
ba asil produksyen iya nya steroid. Dexamethasone tu sebansa steroid ti suah dichampur
enggau ubat tradisyenal dikena ngeraika pedis isi, nambahka enerji enggau ti bukai. Chunto
produk tradisyenal ti bisi ngena steroid iya nya Ai Ikan Haruan, Majua Dua Istimewa enggau
Birdnest Chong Chau Pi Dan. Enti steroid tu dikena enda nitihka jaku ajar ari lutur iya tau
ngerusak ka sistem tubuh mensia nyengkaum glaucoma, kulit makin mipis, jerawat, senang
bulih penyakit enggau sakit tungkul sengayuh.

Soalan 3 ( Tanya 3 )

Kelimpah ari steroid, nama agi chunto ubat ke bisi ngundan rachun ba dalam ubat
tradisyenal ?

Saut Tanya
Phenylbutazone. Rachun tu iya ke bendar iya dikena ngenatka pemedis, tang laban empas iya
ke enda tentu ba pengerai kitai mensia, ubat tu udah enda dikemendarka dikena ba menua
Malaysia. Taja pan pia, bisi sesekeda ubat ti enda dirijista datai ari menua Indonesia enggau
China ngundan phenylbutazone bisi ditemu dijual ba menua Malaysia. Chunto iya Asam
Urat, Jamu Tradisional Jaya Asli enggau Asam Urat Flu Tulang. Empas ari ngena ubat tu tadi
iya nya bagian dalam perut bedarah , empedu jai, ngacau produksyen darah putih, Sindrom
Steven Johnsoon enggau ti bukai.

Soalan 4 ( Tanya 4 )

Nama chabar ti benung ditapi Cawangan Penguatkuasa Farmasi ba mutarka penanggul tu ?

Saut Tanya

Chabar ti benung ditapi kami diatu iya nya produk pemakai enggau utai irup ti bisi ngundan
rachun. Kelimpah ari 2 iti rachun ti bisi disebut tadi, bisi siti agi iya nya ubat kena meri
ransang seks iya nya Sildenafil tauka Viagra. Chunto produk ti udah ditemu kami bisi
ngundan Sildenafil iya nya Goji Guarana, Kopi Pahlawan, Kopi Abang Boleh enggau kopi
Anggun. Empas ari ngena produk tu iya nya nya orang ti ngena nya deka ngasai pedis pala,
sebening, kabur utai peda enggau ulih mega mai penusah ti raya baka pemati.

Kelimpah ari nya Sibutramine mega sebansa rachun ti bisi dikena ba ubat selim ( pelansing ).
Chunto produk ti ditemu kami bisi ngena Sibutramine iya nya Phytoshape, Kapsul Kintop
enggau Kapsul Amberine. Penyampau Sibutramine ti dikena ba ubat tu enda kala temu laban
nya nitihka peneka ati bala pengilang nya tadi. Tu tadi tau ngujungka orang ti ngea produk ti
ngundan Sibutramine tu tadi bisi sakit sebening, sengkual, pedis pala, enggau sakit tinduk
( Insomnia ).

Soalan 5 ( Tanya 5 )

Bakani enggau kosmetik ? Bisi risiko berachun kini ?

Tanya 5

Ya. Kosmetik mega bisi risiko ditepu sida pengilang rachun baka merkuri enggau plumbum.
Suah agi dikena ngaga krim ngemurakka kulit. Empas ari ngena produk tu iya nya kulit deka
berubah ngagai chura chelum (hypermigtansyen ) , kulit rangkai lalu tau mega ngujungka
kitai kena kanser kulit enti ngena produk tub a timpuh ti lama. Chunto iya baka Hydroquine
Babyface Solution enggau Hydroquinone Tretinoin Babyface Solution 2. Pesan aku ngagai
orang ti ka meli produk kosmetik, rajin rajin meh meda label ba kulit kosmetik maya ka meli
ngambika enda meli produk ti berachun.

Soalan 6 ( Tanya 6 )

Enti tetemuka produk ti enda berijista , bakani lalu ngagai sapa ripot ulih digaga ?

Saut Tanya

Enti sema kitai bisi tepedaka produk ti dipelaba kita bisi rachun, kitai tau ngaga ripot ngagai
Cawangan Penguatkuasa Farmasi, Opis Pengerai Nengeri Sarawak , Jalai Tun Abg Haji
Openg, 93590 Kuching, Sarawak, tauka terus telipon ngagai kami ba 082 245781. Kita mega
tau meresa status siti siti produk ba page kami ba www.bpfk.gov.my .

Soalan 7 ( Tanya 7 )

Iya ti kepenudi iya, nama pesan ari kita nuju ngagai bala peninga ?

Saut Tanya

Aku ngarapka kita meli ubat nya tadi ari Klinik, Sepital tauka ari Farmasi ti berijista enggau
kami. Anang meli ba tisi jalai tauka ba pasar malam. Sebedau ka meli tauka ngena siti siti
ubat , kita mesti betanya enggau lutur dulu dikena nemu enti sema ubat nya engkeman
diempa lalu penyampau dos ti patut diambi kita. Kelimpah ari nya anang mudah pechaya jaku
manis ari sida ti ngaku diri bisi nyual produk ti manah ke pengerai kita. Pia mega, anang meli
ubat tu sechara online laban ubat nya deka ditan kami enti sema iya bisi ngundan rachun lalu
tu tau ngujungka kita rugi.