“Program Bali Clean and Green”

Suksma aturang titiang antuk galah sane becik puniki.

Sane wangiang titiang bapak Agus Mahadiputra.
Lan timpal-timpal sane tresna sihin titiang.
Sedurung titiang matur samatra, ngiring sareng-sareng ngaturang puja
pangastuti majeng ring Ida Sang Hyang Widhi Wasa, duaning wantah sangkaning
pasuecan Ida, mawinan titiang miwah Ida dane sareng sami presida mangguhin
kerahajengan sekadi mangkin. Ngiring ida dane sareng sami nunas ica malaparan
antuk ngaturang panganjali umat:
“Om Swastyastu”
Ida dane sareng sami sane wangiang titiang, ring galahe sane becik puniki,
titiang jagi matur samatra indik “Program Lingkungan Bali Clean and Green”.
Inggih, santukan ida dane sareng sami sampun uning indik kewentenan jagat
Bali puniki. Jagat Bali magenah ring panegara Indonesia. Jagat Bali kewangun
antuk kutus kabupaten miwah kota asiki. Pekaryan sane kemargiang olih para jana
ring Bali luwir ipun petani, undagi, bendega, pengangon, perbankan, tur sane
lianan. Tiosan ring punika wenten bidang sane silih sinunggil presida ngerajegan
pembangunan ring Bali inggih punika Pariwisata.
Indik kewentenan pariwisata ring Bali sampun kasub ke duranegara. Punika
mawinan akeh wisatawan sakeng Amerika, Eropa, Jepang, Afrika, Asia miwah
Australia sane melancaran ke pulau Bali puniki. Wisata sane kasub kasenengin
olih para wisatawan domestik miwah dura negara inggih punika wisata alam
miwah tradisi-tradisi sane kemargiang ring Bali. Inggian tradisi lan budaya Bali
sane kasenengin olih para wisatawane sekadi Ngaben, Melasti, Igel-igelan, Subak
miwah sane lianan. Kaping kalih indik wisata alam sane kasenengin krana
keasriannyane.
Inggih ida dane sane wangiang titiang, duaning kadi asapunika buat
kewentenan alam ring Bali sane sampun presida ngewangun pariwisata, patutne
iraga setata ngelestariang kewentenan alam ring pulau Bali puniki. Inggian
pemargi sane presida kaanggen ngelestariang alam punika akeh. Silih sinunggil
sekadi program sane sampun kamedalang pemerintah, inggih punika “Program
Bali Clean and Green”. Kruna Clean and Green inggih punika kruna saking basa
inggris, yening ring basa indonesia madue arti “Bersih dan Hijau”. Suksman
Program Clean and Green punika ngutsahayang mangdane jagat Bali setata bersih
miwah alamnyane sane asri
. Yening alam sampun asri, pastika sampun nenten wenten sane kasengguh
pemanasan global ring pulau Bali puniki, tur angin sane kairup nenten keni polusi.
Sapunika taler yening lingkungannyane sampun bersih pastika pekantenannyane
becik tur ngawinang iraga sehat rikala maurip pamekasne ring jagat Bali puniki.
Lianan ring punika, yening jagat Bali sampun bersih tur alamnyane asri, presida
para wisatawan sayan ngakehang rauh melancaran ke Bali. Nanging ngantos
mangkin lingkungan miwah alam ring Bali puniki durung mecihna bersih tur asri.
Ring kebersihan lingkungan taler durung mecihna memargi duaning sekadi ring
kota-kota kantun akeh luhu tur tukad sane daki tur tercemar. Yening pariindike
puniki nenten ketanganin pastika pacang ngawinang para wisatawan sane rauh ke
Bali sayan ngidikang punika taler kesehatan masyarakat nenten terjamin.
Inggih ida dane sareng sami sane wangiang titiang, mangdane kadi
asapunika jagat Bali iraga patut lestariang tur sareng-sareng ngemargiang Program
Clean and Green punika mawit saking iraga sekadi mebersih ring pekarangan,
mebersih ring margi sane wenten ring ajeng genah iragane, tur patutune nandur
taru ring sisin margi miwah ngelestariang carik utawi penegalan. Sapunika taler
yening dados sisia, iraga patut setata mebersih miwah ngelestariang tetamanan
ring lingkungan sekolah. Yening iraga sampun ngelaksanayang punika mawit
saking angga soang-soang pastika Program Clean and Green pacang presida
kemargiang, ngentur raris kebersihan miwah kelestarian alam ring Bali pacang
presida ketincapang, lan jagat Baline presida asri lan lestari.
Inggih ida dane sareng sami sane banget wangiang titiang, wantah
asapunika presida antuk titiang ngaturang samatra ring galah sane becik puniki.
Mogi-mogi wenten pikonohipun, yening wenten kirang langkung atur titiang sane
nenten mungguh ring pekahyunan ida dane sareng sami, titiang ngelungsur geng
rena pengampura. Matur suksma antuk uratian Ida dane sareng sami, puputang
tiang antuk ngaturang Parama Shanti:
“Om Santih Santih Santih Om”