source: http://gnmawar.wordpress.

com/leka-main-iban/leka-biau-tubai/

Leka Biau Tubai

OOOOHA! X 3

Tu ukai tubai ngapa,

Tubai sunga,
Ukai bai burong, bai tenong,
Tang endang leka diberi sida Laja,
Diberi sida Bunga Jawa,
Diberi sida Keling,
Sida Bunga Nuing.

Ngasi nyadi, munoh meh nuan,

Pagila lusa, tulat lupat,
Laban nuan dikena kami ngirau rantau,
Nyarok lubok.
Nuan tu digelar kami rusa,
Nunyau rantau, nyarok lubok.
Patah ketuai, lalu patah kebiak,
Patah apai, lalu patah indai.
Bisa peregi nuan tu,
Beji duman nuan antu reba, antu rusa.
Anang nyelingau, anang mamau,
Tang ngeransang batang,
Ngeransang agang.

OOOOOHA x 3

Original source: Jarit Muda, Kanowit.

Compiled by Anthony Richards dalam bup Leka Main Iban, 1966.
A collection of GNMawar
---------
LEKA SAMPI NUGAL

Naka pengelembau aku miau ka selanjau ijau manok sabong,

Kaki aku bediri di segi besi belumpong,
Nyawa aku nyapa nyembah di klasah tikai bedong long.
Lengan kanan tanggam beringan lanchum selong,
Pala di-bap singkap jalong jabong,
Blakang aku ditinggang seludang baju burong.

Naka pengelembau aku ka miau selanjau ijau manok lia,

Nyawa nyapa nyembah di kelasah tikai sapar lima,
Buah manah dipeda baka bingka buah sengang,
Kaki aku bediri di segi besi mata,
Lengan kanan tanggam suran bentok tumpa,
Mulut ngetup peruwit perawan mata lungga,
Blakang dibap seludang baju taya,
Kening keliling labong precha,
Pala ditata minyak lala nyiur undang.

Nya baru aku ngangau ka orang ke lama udah lenyau ilang lela.
Ni nuan bah duli Datu Nuga,
Ke tau mantap bena enggau jela mata pedang.
Ni nuan Petara Nyanggau,
Ke datai ari ulu sikup bengkang.
Ni kita Petara Umar,
Datai ari ujong tanjong Pagar tujoh bekembang.

O….Hoi! O….Hoi! O….Hoi!

Nama ke dikangau, nama ke di tesau,
Nama ke dipadah, nama ke ditunggah.

/conversion/tmp/scratch/500387603.doc 11/23/2020 Page 1 of 19

Aku tu nugal saharitu,
Ngelaboh ka padi pun, padi taun,
Padi sangking, padi puting,
Ngeripih ka mata benih,
Ngidar ka mata tugal.

O….Hoi! O….Hoi! O….Hoi!

Kemari kami tu udah lama nganti di rapi tisi uma,

Ensana kami lama udah ngipa di seraka jalai raya.
Aku pen baka nya mega,
Ukai ngangau ngapa, ngangau pia,
Aku mai piring, mai ading,
Mai letup, mai pulut,
Mai penganan, mai penyaran,
Aku mai tuak, mai arak.

Kita ke ngabang bakanya mega,

Anang tuboh puang, tuboh sabatang,
Mai tuboh murus, tuboh untus,
Tang mai ubat teruba ingat,
Mai batu teruba nemu,
Mai pengaroh gembar tuboh.

Anang engkah ngapa, engkah pia,

Engkah ba priing, engkah ba ading.
Ayan ka ba tegalan,
Lengka ka ba pedara,
Sikap ka di ketupat,
Ngambi ka kena peda, kena tela,
Kena iching, kena perening.
Awak ka kena gengam, kena simpan,
Kena sandoh, kena taroh,
Kena japai kena pegai.

Kita ka ari ili datai sabuah barong,

Kita ari ulu undor sabuah buong.
Kita ari langit nilik naka rekong,
Kita ari tanah nyengok naka punggong.
Ngabang abis, ngabang lengis,
Betambit pintu, bekaling alu,
Bekaling lantai, bekesai tikai.

O mai meh kami tu,

Tandok rusa kami ma lima,
Ke bepanga tujoh bepampang;
Taring babi kami mai,
Ia ke nyadi ngelong bekumbang;
Batu getah kami mai,
Kena nyamah kubal arang;
Batu ginti kami mai,
Kena nginti di dan emperawan benang;
Batu ai kami mai,
Awak ka meruan mali langkang.

Aku baka nya mega,

Ukai mungkal, ukai nanjal,
Aku endang nampong,
Endang nerujong,
Nampong aki, nampong ini,
Nampong apai nampong indai,
Baka wi nampong tali,
Baka rutan nampong danan,

/conversion/tmp/scratch/500387603.doc 11/23/2020 Page 2 of 19

Baka pendok, nampong ijok,
Baka tengang nampong bulang,
Pechah periuk tanah, ganti periuk pelani,
Charik labong batik, ganti labong betawi,
Parai orang ke tuai, ganti tuboh kami.
O….Hoi! O….Hoi! O….Hoi!

Nama utai ke ngakak munyi tajai,

Ngakak di dan emperawan lintang?
Nama utai ke ngembau munyi ruai,
Ngembai di tatai balai gambang?
Nama utai ke nidit munyi landai,
Nidit di punggai punggang batang?
Nama utai ti beguntum munyi gom gulu bala?
Nama utai ke seruah menoh menoa?

Sapa ke ngangau enggai badu,

Sapa ke nyapa enggai leju?
Dinga ka kangau anak mensia,
Kangau anak uda,
Minta tulong, minta sukong,
Ngangau ka petara, orang ke betuah,
Petara orang ke belimpah,
Petara orang ke kaya, orang ke raja.

Ni orang ke berimbai ruai betampong tatai,

Betampong perabong, betampong temetong.
Nya meh bai, nya meh ambi,
Nya meh tungah, nya meh padah.
Mansa jawa kami lela baka bunsu ambun miang,
Mansa lingkau kami lenyau belayar midang.

Nya baru taung-taung belumpong nibong,

Nyadoh tuboh ngangau ka tuai burong.
Nya baru aku ngangau ka orang di engkajar lejar batang,
Munyi sida ke bujang berumpang rarong.
Dan lintang nukang nunggang,
Rejang munsang jelu mengong.
Menoa Laja suka tenong,
Laman apai ngadai, apai tuai burong.

Nya baru aku ngangau ka nendak burong bagak bagau bejako.

Aku ti nugal saharitu mai paong nuan empu,
Tanam unjam tanah lebak,
Enti salah tau dibabak.
Oh… kena baka nya kapa mabak,
Nya ngasoh padi nuan nyadi ari tisi datai ka lebak,
Batang betengelang, tangkai beka guyak,
Ke beranak pisit belayan.
Nuan ngabang anang kediri, anang nengali.
Bai Dara Ranchak,
Ke berumah di lebak tinggang kerak kepayang papan.

Nya baru ngangau ka burong ketupong chunggot iko.

Aku ti nugal saharitu mai paong nuan empu.
Tanam unjam di pematah tanah parong,
Enti salah tau ditempalong.
Oh… kena baka nya kapa nempalong,
Ngasoh padi nuan nyadi ari kaki nyentok ka punggong,
Batang betengelang, tangkai begelong,
Besarok enggau puchok galau tekam.
Nuan ngabang anak kediri anang nengali,
Mai bunsu Dara Rimong,
Ke berumah di puchok kayu enchepong,

/conversion/tmp/scratch/500387603.doc 11/23/2020 Page 3 of 19

Ke jendong-jendong, pansa Rangayong mansang bepelam.

Digumpul Gregory Nyanggau Mawar,

Kerangan Pinggai, Paku, Spaoh, Saribas.
--------

Leka Biau Pengabang Leboh Melah Pinang - 1

Sa, Dua, Tiga, Empat, Lima, Enam, Tu………joh.

Nya alai aku ke bediri degi-degi, chegit-chegit,

Nyingkang ka kaki, nginsit ka tumbit,
Mansa mua kita ke semuka dudok bekempit,
Nengah kelasah tikai lampit.
Ukai aku mai ati jai ringat mimit,
Tang aku mai ati gaga rindu gagit.

Aku ga miau kita enggau selanjau manok kunchit,

Diasoh orang ke bempu pengawa melah selabah pinang sa-seit.
Nya alai aku miau iyang semang ari belakang mulai ka tumbit,
Ngambi ka iyang gangam kita enda mai ati tajam baka balas mata binit,
Iyang tinggi kita enda mai ati jai ngeransi ngenyit.

Nya alai aku meda kita endang orang tugu tunggul bait,
Enti maia bumai enda kala lama ngisi engkabai tibang sangepit.
Jari sapiak kita teleba matak setawak bulih duit.
Enti maia berumah kita aya endang teleba niri ka kah lamba bait,
Ruai kita endang seruan kerembai tikai anyam lampit.
Enti malam enda kala padam dian lampu pichit.
Nya alai tu aya ukai biau ngapa, biau pia,
Tu ga nunda biau Apai Sabit Bekait, Selong Lanchong Bebelit,
Alor Bujang Beruang Langit,
Kumbai kita Sapit Raja Petara.

Nya alai aku ka bediri giai-giai,

Nyingkang ka bulang kaki bejalai,
Mansa kita ka semuka dudok berintai,
Baka ke begah-begah nujah kelasah anchau tikai,
Ukai aku mai ati jai, ati kudi mari rimai,
Tang aku mai ati gaga di dada tangkai kamai,
Diasoh orang ke bempu pengawa pun gawai,
Miau kita enggau selanjau ijau tuntong engkerawai.
Nya alai nasit tu manah mimit,
Tisik melit tiga berintai,
Iko kelabu merundu lebat merundai,
Sayap beiap-iap nempap selingap arong kerigai,
Kukok rauk-rauk inggar berangangai,
Didinga ari langit landai baka bingkai tibang terantang.

Nya alai tu kena aku miau ka iyang sumang,

Ari belakang mulai ka gundai,
Ngambi ka iyang gangam kita enda mai ati tajam baka balan besi bilai,
Iyang tinggi kita enda mai ati kudi ngeransi besai.
Meda kita ke tajam gerumun mata gansai,
Tinggi di suli labong jebai-jebai.
Enti maia berumah kita endang teleba niri ka kah tebelian tuai,
Panggau kita enda kala pungkang anchau tikai,
Enti malam enda kala padam dian lampu kedai,
Enti maia mangun ka pun padi nubai,
Enda berasai ngebu ka engkabai tibang terentang.
Jari sepiak kita endang teleba matak setawak raban bendai,
Jari chawit kita teleba nyepit duit ringgit bebungai-bungai,
Jari kiba kita teleba nyepit pala agong tuai,
Punggong kita teleba nangong kelutong bedil besai,

/conversion/tmp/scratch/500387603.doc 11/23/2020 Page 4 of 19

Pala kita bisi repa umba lelanjai bulu ruai,
Jari dua enggi kita bisi ga udah bulih leka nyiur muna ke bemata dua berimbai.
Nya alai tu ukai biau ngapa biau pia,
Tu ga nunda biau bunsu Selampandai penempa kitai,
Ke dikumbai kita Sempandai Manang.

Aku ke bediri degi-degi jendam-jendam,

Nyingkang ka bulang kaki kanan,
Mansa moa kita ke semuka dudok betipan,
Baka ka begah-begah nengah kelasah tikai rutan,
Ukai aku mai ati jai, ati kudi balat kelabawan.
Tang aku mai ati gaga rindu ka pangan.
Laban aku diasoh orang ke bempu pengawa pun kerja,
Melah selabah pinang kejakan,
Miau kita enggau selanjau ijau manok jelayan.
Nasit kita manah mimit, tisik nyelit kaki kanan,
Bulu tu keno ko antu, jelayan ensariban.
Tu ga manok intu tuai ke lama udah nadai dulu danjan,
Iko tu merundu lebat mensebam,
Sayap beiap-iap nempap selingap dada kanan,
Kukok rauk-rauk ngebus ka rayok miga redam,
Didinga Ini Andan orang ke ngembuan ubat jadian,
Ngambi ka kitai tebekan mali langkang.

Aku ke bediri degi-degi, dunga-dunga,

Mansa moa kita maioh ke agi mit telesit baka bla,
Nengah kelasah tikai bemban puda.
Ukai aku mai ati jai, ati kudi balat nyida,
Tang aku mai ati gaga rindu ketawa,
Miau kita enggau selajau manok lia,
Ari asoh orang ke empu gawai pun pengawa,
Nya alai aku miau iyang sumang kita,
Ari belakang ngujong ka pala.
Nya alai nasit tu manah mimit, tisik melit ari kiba,
Iku merundu nyau kua-kua,
Bulu selabubu benong ngelaja,
Sayap beiap-iap nempap selingap kerigai kiba,
Kukok rauk-rauk nyangkut enggal lima,
Didinga Buga ari tisi langit lada nebong ngeruang.

Aku meda kita ke tajam baka bulan mata tangga,

Jam kita tak seruran lekat di lengan jari kiba,
Neck tie kita kitai-kitai, kunda-kunda,
Fountain pen kita seruran bemain berimbai lima,
Buok pisin kita endang nyengala lichin unsut brylcream minyak pala.
Enda mai ati jai ngeransi nyida,
Meda kita ke agi mit lelachit baka bla,
Meda kita ke agi biak apin bisi batang pengawa,
Nyangka kedudi hari jemah ila,
Pandai di chunggai jari kiba,
Tajam di dalam kerubong pala,
Belajar tinggi tangga, bejako enda saga,
Dudi hari jemah ila, kita tau jadi tuai bansa kitai,
Nyadi kepala kitai bansa Dayak,
Ngambi ka mansang ngelui ari enggi orang.

ABIS…

Collected by Gregory Nyanggau Mawar,

Kerangan Pinggai, Paku, Spaoh, Saribas.
-------
Leka Biau Pengabang Leboh Melah Pinang - 2

Satu ko aku enda bula satu,

/conversion/tmp/scratch/500387603.doc 11/23/2020 Page 5 of 19

Laban nitih ka bunsu batang adat;
Dua ko aku enda ga bula dua,
Tu ga sagenda jadi ka pengingat;
Tiga ko aku enda ga bula tiga,
Endang nyengala baka ka di sukat;
Tiap tu nya genap empat,
Tu ga ngingat ka adat pangkat Rekaya;
Lima ko aku enda ga bula lima,
Tu ga kena nunda adat kalia lama jaga;
Enam ko aku enda ga bula enam,
Tu ga chuan jadi ka teladan kitai bansa;
Tuuuujoh, tu ga ka penumboh batang kerja.

Nya alai aku ti miau kita ti baru datai baka nya ga,
Aku tu baka reti orang ti melentong ka rantong beliong jai,
Bemata kebi,
Endang diri ti simpi jai mata.

Enti nitih ka reti buah puji,

Nya baru ngiga orang ke gangam jari,
Mereti ati megai basa,
Iya ti manah nama tampak rita,
Nyara ka pekara di moa pengabang.
Laban bejako aku endang kurang penau,
Semuti siru serta lantang,
Endang tebilang mali ringat.
Tang ti paong simbong menoa,
Amat kitai sebaka bela sukat,
Kamaiatu remaong maioh nugong ka taju,
Bejampong ngurong ka telu,
Semuti aku tu bejako mudah sedu mai neresap.

Tang enti batang ruas belubang,

Unsut enggau jerenang awak ka bekundayang mansau mirah.
Enti utai tu ari kirum, nya baru bepun enda bejuntah.
Nya alai lama ga tuai kalia,
Udah nyangka utai tu udah enda pimpat,
Laban kerja enggi kitai,
Endang nyengenda berindik ari nanga batang adat.

Aku tu ke bediri enggau tengkuji kaki spiak,

Baka ti enda mereti, sarimbai jegak-jegak,
Laban aku miau kita enggau selanjau ijau manok bejalak,
Bekubah burak bedunggol salang,
Miau kita ke betentang dudok betapak udu ragak.
Enti deka, tau ga kita nyema ka aku,
Ngagai Bugak tuai Lemanak ke udu sumbong panggong jegak,
Bejalai jengkak-jengkak, setak ka setak,
Ngasoh anembiak betaratak mansang ngabang.

Aku ke bediri kindong-kindong bekenji enggau kaki ujong kudong,

Baka ka luba-luba panggong sumbong.
Aku ga miau kita enggau selanjau ijau manok tuntong,
Bekubah adong pisan labang.
Nya alai kita ka betentang dudok bebandong,
Ke nentang aku enggau bulang mata menchenong,
Enti kita deka tau ga kita nyema ka aku
Ngagai Kanyong tuai Slementong ke jegak-jegak panggong sumbong,
Bejalai setak-setak, kaong-kaong ngarak anembiak benong baka gendong,
Mangkong guong, nerachat engkerumong nenchang raban gendang.

Aku ke bediri di pedani lapis tikai,

Tak lejah-lejah nunjah telasah tengah ruai,
Mai dada tak berasa lain asai,

/conversion/tmp/scratch/500387603.doc 11/23/2020 Page 6 of 19

Kabuah pia laban mulut tu tak enda lanchat nyebut utai,
Tang semadi lupu tudah aku tu nyau malu,
Di injau orang ka bempu pengawa pun gawai,
Miau kita ke kemumok dudok berintai,
Enggau selanjau ijau manok tawai,
Bedunggol sulai tancham matai gerunjong manang.

Ngena manok tu aku masa kita ke serta baru datai kemunok dudok berintai,
Aku ga nunda basa niang Minggat Apai Runai,
Kedua Awan apai Sawai,
Ketiga Linggir aki Dinai,
Leboh tembai sida ka teleba begempuru skayu antu rumah panjai,
Leboh tinda sida ti gawa gawai gaga,
Mela begunda balang begundai,
Taja kepai-kepai ujak tangkai takang isang.
Nyadi ba punggang puting setak,
Sida begawai gaga richah ria,
Mela leka jengkana padi lelanggai.
Tang ba punggang putting setak,
Sida gaga ria richah amat,
Mela buah kenyap,
Leboh ke tindok di retok papoi pegalai.
Lalu di tengah rumah pengawa sida baka enggi kitai,
Gaga gawai richah melah selabah pinang tuai.

Nya alai udah bekau kena biau aku enggau selanjau ijau manok tawai,
Kita ke kemumok dudok berintai nya ila,
Bisi ga kita disema ka orang ngagai menyaong tuchong bukit Kedempai,
Ke tumboh batang tapang bekumbai,
Urat iya nyerangkap di selingap batu chanai,
Puchok iya nyerurok rayok miga nyelalai,
Batang iya ringang-ringang pandang nyaang panas lemai,
Daun iya nyelebumbun nerima ambun laboh tuai,
Dan lintang iya bejuang lentor laun nyuntai,
Tepan kaban kenyali liai ke bekumbai pulai betimang.

Kaki aku ke bekenji bediri di runti tikai rutan,

Baka ka jegak-jegak enda supan,
Nentang pengabang bala iban,
Kebuah pia laban mulut enda lanchat nyebut macham leman,
Mua pengelesa meh tinda tudah pangan,
Di-injau orang ke bempu pengawa melah selabah pinang kejekan,
Masa kita ke semuka dudok betipan,
Enggau selanjau ijau manok jelayan,
Langgai panjai betugang labang.

Ngena manok tu aku masa kita be semuka dudok betipan,

Aku ga nunda basa aki kami Senabong seduai Timban,
Ketiga Rentap ka empat Munan,
Leboh lambu sida ke teleba begempuru di skayu antu rumah renjan,
Leboh tinda sida ke gawa gawai gaga,
Mela begumba balang begeman,
Sigi singam-singam naban ka tandan pun raang.
Nyadi ba punggang puting setak,
Sida gawa mela leka jengkana padi rutan,
Tang ba punggang puting setak,
Sida gawa gawai rami mela mimpi,
Leboh sida ke tedani tindok malam,
Lalu ditengah rumah sida sebaka enggau enggi kitai,
Gawa gawai nikah melah selabah pinang kejekan.

Nya alai udah kena biau aku enggau selanjau ijau manok jelayan,
Bisi ga kitai disema ka orang ngagai menyaong tuchong sentugan bulan,
Ke tumboh begayang batang tekam,

/conversion/tmp/scratch/500387603.doc 11/23/2020 Page 7 of 19

Urat nyelingap di selinkap batu begam,
Puchok lenok-lenok ngerurok ka rayok miga betegam,
Batang ringang-ringang pandang kemayang terang bulan,
Daun nyelebumbun nerima sebun ambun malam,
Keba dan kayu tekam seruran dedengam nancham ngayang.

Aku ke bediri chegit-chegit degi-degi,

Baka ke lejah-lejah nengah kelasah tikai pedani,
Mai dada tak berasa asai dirunti,
Kabuah pia laban mulut beban nyebut ngerintai reti,
Tang tak semadi jenti tudah kami,
Diasa orang ke bempu pengawa pun pengerami,
Miau gasan kita enggau jelayan manok pungka laki,
Begamal lanji-lanji kukok beteri,
Kuning kaki ngenjun gelangang.

Ngena manok tu aku masa kita ke bebanda dudok bebandi,

Aku ga nunda basa niang Lintong Moahari,
Kedua orang kaya Pelima Randi,
Leboh tinda sida ti mai ati gaga,
Mela begumba balang bedaai,
Kedua gawa gawai sandau hari,
Mesan ka Mikai Bunsu Beduie,
Datai ari menyangit bukit lebor api,
Betumpu enggau kaki Rabong Lemambang.
Nyadi ba punggang puting setak,
Sida ragak richah rami,
Mela leka jengkana padi wi.
Tang ba punggang puting setak,
Sida richah rami mela mimpi,
Leboh ka tindok di retok papan paji.
Lalu ditengah rumah sida sebaka enggau kitai,
Gawa gawai nikah melah selabah pinang penguji,
Begulai ka ratai bungai nanyi.

Nya alai udah kena biau aku enggau selanjau manok pungka laki,
Bisi kita ke kemumok dudok bebandi nya ila,
Disema ka orang ngagai menyaong tuchong bukit ketampi lelaki,
Ke bisi tumboh batang teras ransi,
Urat iya nyerangkap di selingap batu besegi,
Puchok iya nyerurok rayok mega ngeledi,
Dan lintang iya nampak terang pandang kemayang bulan pegari,
Daun nyelebumbun tata sebun ambun pagi,
Batang iya seruran bejuang lentor nyuntai,
Begamal lanji-lanji enda kala ruji ketis beliong kabang.

Tadi aku masa kita ke tuai ke berintai dudok betugong,

Lalu diatu aku deka masa kita ke biak,
Ti berebak benong bekagendong.
Diatu amat sida ke agi biak serintak nyabak bekaruong,
Agi meraya ba sida mengada karong kerubong.
Enti udah besai ila dini kitai ulih ninong.
Kada enda sida betua ka aka Raja Remaong Kampong,
Nanggong pelalong ringgit muda pala agong.

Tadi aku masa sida ke tuai ti berimbai maioh bala,

Bekemumoh dudok semuka,
Lalu diatu aku deka masa,
Sida ke anembiak berebak mansang reremba,
Diatu amat sida ti agi bekeruong nyabak meraya,
Ngagai menimang karong mengada.
Enti nyau besai jemah ila sapa kitai tau nyangka,
Kada enda sida bisi betua ka Kumang dara inja,
Ke ngujong ka sida pandai bekira,

/conversion/tmp/scratch/500387603.doc 11/23/2020 Page 8 of 19

Tebantai nama muka pengawa.

Tadi aku masa kita ke tuai,

Dudok berintai begulai bulu saribu,
Lalu diatu aku deka masa sida ke anembiak,
Ti berebak mansang baru.
Diatu sida amat agi meraya nyabak bekachuau,
Enti udah besai ila dini kitai nemu,
Kada enda sida bisi ditulong bunsu antu,
Dikemata ka Bhiku Bunsu Petara,
Ke ngasoh tinda iya techiri besai penemu,
Megai skayu menoa Malaysia.

Nya alai tu ambong buah,

Ambong mengkudu,
Minta tuah tambah gayu.

ABIS

Collected by Gregory Nyanggau Mawar

Kerangan Pinggai, Paku, Spaoh, Saribas
--------

Leka Biau Piring

Sa, Dua, Tiga, Empat, Lima, Enam, Tuuuuujoh.

Enda aku busong ilang laya,

Megai langgai manok banda,
Kena aku miau ading piring pinang saleka,
Laban aku tu nampong jako sera nyawa,
Enggi aki kitai Rekaya,
Iya endang landik ngajar kitai bebasa,
Ka semua bala pengabang.

Enda aku busong laya pambu,

Megai langgai manok kelabu,
Kena aku miau ading piring kapu,
Laban aku tu endang nitih ka ajar nampong jako,
Enggi aki kitai Rekaya Jamban Atu,
Iya landik ngajar kitai bebasa ngena jako,
Nadai kala saru bekalih tunsang.

Aku tu miau sida Dara Santih bunsu Sirih ke tumboh betumbok takang,
Dara Chelum Bunsu Tum Sedi lulun atas bedilang,
Dara Bagau Bunsu Semakau rendang dagang,
Dara Sandu Bunsu Gentu daun pisang,
Sida tu sama udah digempuru ditu datai magang.

Aku tu mega miau sida Kumang Dara Simbut,

Bunsu Pulut Jantan Jentawang,
Bunsu penganan baka bulan rerak rumpang,
Dara Letup baka tangkup bunga kejumpang,
Enggau Endu Tematu Tali Betabu,
Bunsu Telu Manok indu kepayang mekang.

Nya alai letup pan udah ga chukop,

Asi pan udah ga bisi,
Pinang udah ga chukup magang,
Samoa perengka pan udah ga sedia,
Ditiap genap nadai timpang.

Nya baru aku ngangau ka sida ke tindok nakal singit,

Bejalai ngena burit,

/conversion/tmp/scratch/500387603.doc 11/23/2020 Page 9 of 19

Nya ga Bunsu Chapak Burak,
Ba-ukir ilak kesulai tandang.
Kita nya meh ka diasa nerima bala pengabang,
Diasoh nabi samoa orang.

Ooooooooooooooha! x 1

Tak lalu ketawa balat gaga,

Ading piring pinang saleka,
Udah dibiau enggau selanjau ijau manok banda,
Gaga diasoh nabi meri basa ngagai Petara,
Ke datai ari Tuchong Sandong Gemala,
Di bukit lilit Gerija,
Alai semuka dudok sembayang.

Nya orang ngembuan batu sedan bulan pernama,

Enggau batu takang bintang tiga,
Ambi ka ubat penyangga nyawa maioh pampang saribu guna,
Ngasoh panjai umor nguan menoa.

Lalu ketawa gaga rindu,

Pamping ading piring kapu,
Udah dibiau enggau selanjau ijau manok kelabu,
Nganti Apai Migu,
Datai ari munggu madang engkajang.
Nya orang ngembuan batu pupu gigi gumbang,
Ubat landik bejako ba gulu tugong orang.

Tak ketawa tuchum Dara Chelum,

Bunsu Tum Sedi Lulun atas bedilang,
Udah dibiau enggau selanjau ijau manok sigon,
Gaga nganti penatai Liba apai Dom,
Datai ari pun kara nurun maioh betunjang.

Tak depan-depan ketawa ading piring penganan,

Udah dikebau enggau selanjau manok jelayan,
Gaga nganti penatai Ini Andan,
Datai ari bulan ke meruan tuang-tuang,
Nya orang ke ngembuan ubat jadian mali langkang.

Tak lalu ketawa gagit deh piring pulut mit,

Udah dikebau enggau selanjau ijau manok kunchit,
Nganti penatai sida Apai Sabit Bekait,
Ari punggang tisi langit.
Nya orang ngembuan batu pengait,
Dikena ngulih ka duit mata wang.

Ketawa gaga amat asi ketupat,

Laban udah kena biau enggau selanjau ijau manok kepiat,
Nganti Kumang Dayang Sambat,
Indu orang di urat dandi nentang,
Nya ga indu pandai di pechunggai tunjok empat,
Landik ngebat tukang tengkebang.

Ketawa chaie-chaie ading piring sungki,

Udah kena kebau enggau selanjau ijau manok pungka laki,
Gaga nganti penatai Keling Aji,
Datai ari tuchong engkeraji padi,
Munyi negeri maioh orang.
Nya orang ke berani ati mutus kempang.

Piring rendai pan ketawa terai-terai,

Udah dibiau enggau selanjau ijau manok tawai,
Gaga nganti Raja Selampandai,

/conversion/tmp/scratch/500387603.doc 11/23/2020 Page 10 of 19

Datai ari menoa iya di Tatai Tanah Nyadai,
Redai terabai rampai temiang.
Nya orang ke ngembuan batu nyiur nyuntai,
Enggau batu bingka lia mulai,
Nya ga ubat besai ngasoh gerai,
Tau mudah bulih utai,
Ngasoh gayu guru gerai nyamai.

Ketawa gaga ading piring penganan jala,

Udah dikebau enggau selanjau ijau manok banda,
Gaga nganti Raja Simpulang Gana,
Datai ari Letong Jalong Temaga,
Tinggang bunga nuyan meranggang,
Nya orang ti ngembuan leka sesangga tepang,
Enggau taring uting babi menoa,
Kena kitai ngintu simpuli padi paya,
Ngambi ka tak sebaka manah magang.

Lalu taong-taong munyi ketawa ading pimping piring tepong,

Udah di kebau enggau selanjau ijau manok tuntong,
Gaga nganti penatai Aki Lang Menaul Buban,
Ari engkeleman bulan mandang,
Aki Lang Menaul Tuntong,
Ari Kebong Langit Ngeruang,
Nya orang ke ngembuan batu pugu danau kampong,
Pengantong upong balang beraang,
Enggau ubat mali rampong,
Ngasoh betampong tau serang.

Panjai ai, panjai kekira,

Luas langit, luas dunya,
Pegai tegoh batu indu gemala,
Ngambi ka tampak nama,
Jelai berita dinga orang bap dunya bumi belinggang.

Gayu ko antu,
Nadai apa ko Petara,
Semua kitai bulih pengelantang.

Ooooooooha ! x 3

Note:
Udah tembu miau tu, perengka piring pan lalu dibagi ba dalam siti-siti chapak. Udah genap piring dibagi, nya baru nyampi
ngangau ka petara, bunsu antu enggau petara aki petara ini ke udah parai. Sida tu diasoh datai ngabang nitih ka bansa pengawa
gawai kitai.

Perengka dikena ngaga piring biasa:

* Semakau & daun apong (Tobacco & wrapper)

* Perengka pinang (pinang, sirih, kapu, gambir) dalam baku
* Asi Amat (Cooked rice)
* Garam (Salt)
* Asi Manis (sweet fermented rice)
* Ketupat (glutinous rice cooked in palm leaves)
* Asi pulut burak, merah, kuning & chelum (white, red, yellow & black glutinous rice cooked in bamboo)
* Penganan iri (rice cake)
* Sagun (made of coconut powder & rice flour)
* Beras Kuning (yellow rice - for sprinkling the piring)
* Letup or rendai (puffed rice or pop rice)
* Telu manok (hard boiled egg)
* Telaga (a small cup containing rice wine)
* Bulu manok kena nyampi & bebiau, dichabut lalu diunsut enggau darah manok nya empu (a feather from fowl used during
prayer is plucked out and dipped in its blood when it is killed)

/conversion/tmp/scratch/500387603.doc 11/23/2020 Page 11 of 19

Chara magi tauka mela piring:

* Tabur ka letup (digaga ari beras pulut) enggau beras kuning.

* Bagi pinang, sirih, kapu enggau gambir.
* Bagi insap - rukok apong enggau semakau.
* Bagi asi enggau asi pulut - asi burak, pulut burak, pulut chelum, pulut merah enggau pulut kuning.
* Bagi tumpi (kuih digaga ari tepong mulong), penganan penyaran, sungkui (digaga ari beras tutok dibungkus enggau daun
pisang), ketupat (tau enda ibuh enti bisi asi pulut), sagun (digaga ari tepung beras enggau nyiur parut).
* Bagi pisang.
* Bagi garam ngagai tiap iti pinggai tauka sarang piring.
* Bagi telu manok.

Udah nya baru ngambi manok dikena nyampi. Leka sampi mesti nitih ka bansa gawai.
Tembu nyampi lalu tabur ka letup beras pulut enggau beras kuning. Selamat ngintu ari gawai ngagai kita semua.

Digumpul Gregory Nyanggau Mawar

Kerangan Pinggai, Paku, Spaoh, Saribas.
--------
Leka Jako Dikena Dalam Pengawa Melah Pinang

1. Nama ai ansah – ngansah orang kedulu bejako ari sepiak indu dikena iya nanya ka berita tauka pejalai ari pengabang:

Tu ai teratak bintang banyak,

Ninggang awak arus nanga.
Tu ai gemuroh bintang laboh,
Baka suloh lampu kelita.
Tu ai kechapah batu blah,
Panjah darah babi menoa.
Di turun ka kami nyerumba sebun ambun nyaia,
Di pelam kami enam malam di pelawan benda menaga,
Dia iya lalu bebali nyadi bisa,
Tak prabansang dalam balang butol segala.

Nya alai ke lemai tu,

Iya merenchit mimit ninggang chubit chawan bebunga,
Engkah ka kami manah-manah di klasah tikai sana.
Tu ga kena kitai begempuru bejako nanya ka berita,
Tu ga kena aku ngasoh nuan nebah tatah dabong seleka enggi nuan aya,
Ngasoh nuan dulu bejako inggar didinga,
Nanya ka berita di moa bala pengabang.

2. Pengari ari sepiak indu dulu bejako nanya ka berita ari pengabang lelaki:

Nya alai aku tu tak sangkal ke bejako ngagai kita.

Laban aku nyau tepeda ka kita ke landai indu landak bebulu burak,
Bekengkang punggang putting juring ngujong geraji,
Aku tepeda ka kita tajak indu tajai belanggai panjai,
Taja kepai-kepai ngambu diri terbai ka Brunei pulai hari.
Aku tepeda ka kita bruang indu raak,
Ganggam lengan ngerumpang batang tebelian.
Nya alai lama kitai tu udah berimbai dudok besendi,
Aku nyau deka nanya sapa kita ke kenyalang indu kenyali,
Laban aku deka ngasoh kita ngelua ka sapi buah belili,
Awak ka diambi sida teruna dara tinggi.
Lagi iya tau bebali nyadi taring uting ngeli jani,
Ka ubat kena kami ngambi sempeli,
Kena kami ngisi igi tibang rarentan.

Sapa kita ke dikumbai orang kenyalang kenyali lelaki,

Laban aku tu nyau deka ngasoh kita ngelua,
Ka buah engkelili ditikai anyam diri.
Lagi iya bebali nyadi ngeli jani babi lelaki,
Diambi endu teruna dara mereti,
Jadi ka ubat padi awak ka tebekan lalu jadian.

/conversion/tmp/scratch/500387603.doc 11/23/2020 Page 12 of 19

Sapa kita ke dikumbai kenyalang kenyali banda,
Laban aku deka ngasoh kita ngelua,
Ka kembayau jera di tikai anyam dua,
Diambi sida lengayan endun dara,
Laban lagi iya tau bebali nyadi taring uting babi menoa,
Jadi ka ubat padi paya kena ngisi moa tibang tundan.

3. Nama ai ansah pengari ari pengabang lelaki ti nyaut madah ka pejalai diri:

Tu ai buah padi mudah,

Baka buah jelai merundai.
Nyadi tu ai ansah,
Ukai baka ke ngansah beliong bisi predah,
Ngansah rantong besi patah.
Tu ga ai buah padi mudah,
Disua ka aku enggau tapa tunjok tengah,
Di kena aku nyiram simpan geman dabong tatah nuan aya/unggal.
Tu kena aku ngasoh nuan dulu bejako,
Ngara ka leka entelah,
Laban nuan endang dipadu ka orang,
Landik bungah bejako tuai.

4. Saut pengari pengabang ari lelaki:

Nyau kesal mimit meh aku,

Udah diberi kita ai sempuli padi bukit,
Ke udah diengkah ka kita dalam chawan indu chubit.
Udah disua ka anak bujang lemambang entelit langit,
Ngena tapa jari chawit.
Ko iya ti meri ngagai aku,
Ngasoh ati aku gaga be-ati gagit,
Tang tu tak ngasoh kira aku nyaia mansang mit.
Kada enda asai tu ati sida niang Aji menya,
Leboh gasan nan di Krangan Sungai Langit.
Ko iya deka ngaga kota kepit buloh temiang,
Tang iya tekinsit mimit nyadi kemibit daun lalang.

Unggal/Aya,
Kami tu meh dikumbai orang anak tengas,
Ke jelas-jelas mudik batang ulu Ketunggau,
Ngempas ka kaban di kranggan sandau miang,
Napat ka riap tampun bubu.
Kami tu meh ke dikumbai orang anak baya,
Ke kaya-kaya mudik batang ulu Salimbau,
Ke benyawa nukang ka raang,
Mesai selambang moa pintu.
Kami tu me ka digelar orang anak kenyalang,
Ngenggang di batang Ulu Julau,
Napat ka kembayau mansau ngabu.

Aya/Unggal,
Kami tu wuok empeliau arang,
Masai berua di randau kubal tusu.
Nya alai penatai kami tu bisi reti,
Penemuai kami bisi utai ko-ati.

Nya alai nyerumba buli nyin kemari,

Ke cheli-cheli tumboh lemai,
Nyerumba sedan bulan mingkai,
Kami bisi datai ditu,
Nganjong tebinsu langgu buah binjai,
Nya alai lalu diengkah ka kami manah-manah di kelasah tengah tikai,
Enda dilengka ka kami sengapa pia sabarang alai.

/conversion/tmp/scratch/500387603.doc 11/23/2020 Page 13 of 19

Disua ka kami ngagai kita,
Leboh kitai ke kemumok dudok di ruai,
Leboh kitai ke bepangkang ke pengedang baku Brunei,
Serta disambut kita enggau kukut jari pamegai,
Dikurong kita dalam pebenong tajau rawai,
Dikerbat kita enggau kawat panjai tigai.

Nyadi nya ko kitai suba jadi ka sengkeram jako semaia kitai.

Nya ti ngasoh kami datai baka ka saharitu,
Enggau anembiak, enggau ke tuai,
Enggau sida ke mit, enggau sida ke besai,
Mai bala nitih ka semia.

Nya alai nyerumba buli ke cheli-cheli nyin kemari tumboh malam,

Nyerumba senayah bulan keleman,
Bisi kami udah datai ditu,
Datai ari Batang Kerangan Pinggai tebing kanan,
Nganjong tebinsu langgu buah kemantan,
Ke lalu diterima kita enggau tapa jari ngengam,
Disambut kita enggau kukut jari kanan.
Dibungkus kita enggau saratus bali belantan,
Ditaroh kita tegoh-tegoh dalam mandoh benda pelawan,
Kerbat kita enggau kawat panjai enam,
Dijereki kita enggau badi ilang kayan.

Nyadi nya ko kitai suba jadi ka geran jako sama.

Nya alai baka ka saharitu kami datai ditu,
Mai indu, mai kalu,
Mai anembiak, mai redak,
Mai gendang, mai sebang,
Deka nentu ka enti utai nya amat, kami deka ninga,
Enti utai nya tentu, kami deka nemu.

Nya alai ka saharitu kami tu dibai sida apai sanu seduai indai sanu,
Nginsit ka pintu langit rapit baka tambit terkura umang,
Dibai sida ngansat ka pintu langit entap baka singkap krang kepayang.
Enti nya amat rengut bunga buot ke bebau bali-ali,
Enti nya amat aba bau bunga ke ngaba basari-sari.

Nya kabuah kami ke datai kitu,

Laban dibai sida ke indu negu bintang buyu mesai jalu jalong jebong,
Dibai sida ke dara ngemata ka bintang saleka mesai krang kepayang pabong,
Dibai sida ke biak nyubak bintang banyak tumboh di kebong langit landong.
Nya alai kami tu deka nyidi aba bau bunga ke ngaba satengah bulan.
Kami tu deka nyium rengut bunga buot,
Puput ka ribut angin selatan.

Nya alai kami nyau deka nyua ka tapa jari kanan,

Ditampong enggau jari sukan,
Jalai Renggan menya ngulih ka basiran bintang tekinsit.
Kami nyau deka nyua ka tapa dada jari,
Tampong enggau tangga Bejie,
Nya ga jalai Bejie ngulih ka kunchi pintu langit.
Laban kami nyau deka mindah ka genteran papan punggah,
Penudok perampang bunga burah,
Ke berendah mansau jara,
Ke berendah mansau tisi.
Kami dibai orang negu genturan papan timpu,
Penudok perampang bunga kapu,
Ke besudu ular bisa,
Ke besudu ular lidi.
Kami deka nginsit ka genturan singit,
Tambun berurah bunga bangkit,
Ke begantong tengan menoa,

/conversion/tmp/scratch/500387603.doc 11/23/2020 Page 14 of 19

Ke begantong tengan ari.

Nya meh penatai, penemuai kami.

Datai enggau antu enggau indu.
Sama enggau anak enggau anembiak.
Kami deka nentu ka utai nya amat,
Kami deka ninga ka utai nya tentu.
Kami deka nemu.

5. Ai ansah orang ke nyaut ngari ka sepiak indu:

Tu kerbat pakau kawat,

Baka jilap daun api.
Ai teritis limau manis,
Ke teruba nyadi brandy.
Bai kami nurun nyerumba sebun ambun pagi,
Di pelam kami enam bulan di pelawan benda guchi,
Taroh kami tegoh-tegoh dalam mandoh benda menaga,
Dia iya bebali mansau jara,
Dituang ka kami ngagai balang butol besegi.

Nya alai ka lemai tu Aya/Unggal,

Tak perabansang pansut ari balang butol besegi.
Di engkah ka kami ba klasah tengah tikai.
Tu ga kena kami ngansah tatah dabong gigi enggi nuan,
Ngambi ka nekis nyerais inggar bemunyi.

Kalia udah ga tu kena kami ngansah perapang pedang panjai,

Enggi Antau Linggang Negeri seduai Gun Mangku Bumi,
Katiga enggi Nanang seduai Ajie,
Ti dikena sida bamok ngapus ka ari,
Ngalah ka segi kota simbang.
Pemulai tu sida iya gaga lantang ati,
Lalu niri ka gawai igi balang.

Nya alai tu ai tangkai lia kerapa,

Ai pun tarum kemuja,
Di engkah ka kami di klasah sana jawa,
Di perambun ka endu endun nyerumba sebun ambun nyaia,
Sataun mangun pun padi paya,
Udah dipanjah sida dara bungah enggau darah babi menoa,
Udah dikarong kami dalam benong benda menaga,
Nya alai ka lemai tu,
Merenchit mimit iya ari burit gelas kacha,
Kena aku ngansah tatah dabong saleka,
Enggi nuan aya/unggal.

Udah ga tu dikena aku ngansah perapang pedang temaga,

Enggi Garran seduai Mula,
Enggi Ngumbang apai Lada seduai Bantin Apai Rengga,
Udah nya kenu ko sida,
Tajam ari mata simbang jerungkang,
Laban tu udah dikena orang ke besai nampak nama jelai berita,
Ngeruntoh ka kota Tuan Raja,
Di nanga arong Skrang.
Nya alai ka lemai tu aya,
Dikena aku ngansah tatah dabong saleka enggi nuan,
Ngambi ka nyawa nuan nekis nyaris inggar didinga,
Disema ka aku ngagai panjong kapal johara,
Enggi Ranee bini Sultan Tuan Raja,
Mudik nanga Batang Simanggang.
Agi ga aku nyema ka nyawa nuan,
Samunyi enggau Radio,
Di kena Koh apai Segura,

/conversion/tmp/scratch/500387603.doc 11/23/2020 Page 15 of 19

Madah ka menoa dras mansang.

6. Udah badu ngirup pengari ari sepiak indu lalu bejako munyi tu:

Nyerumba sedan bulan pernama,

Leboh aku tindok di retok papan pelangka,
Gali galai di tikai sana jawa,
Bebungkor enggau selanggor bali mensuga,
Dia aku bisi mimpi.

Mimpi asai ka betemu enggau Tutong seduai Laja,

Datai ari menoa raya di nanga Panggau Dulang.
Dia aku asai ka dibai seduai nyimpong,
Ujong semambu ngandong,
Sengkelong tedong ular naga.
Mimpi asai ka dibai seduai nyubah,
Bintang banyak mesai chapak jalong temaga,
Laboh ka baroh nyadi pebenong benda menaga,
Nadai utai ngemanah nya gaya,
Dipeda baka gamal anak Dayak,
Bemata baka gamal anak China,
Baka ke tau diasoh nyadi tuai megai menoa,
Ngadu ka uta wang timbang.

Laban meda utai nyelai bakanya,

Dia kami sarumah tak bela tekenyit,
Tepeda ka pemanah benda menaga,
Lalu dibiau kami enggau selanjau manok banda,
Ading kami enggau piring chukop perengka,
Laban asai ti nyambut penatai anak Petara,
Nyambut antu bala pengabang.

Nyerumba tinda sabong lemai,

Nyerumba sedan bulan mingkai,
Leboh aku tindok di retok papan lekai,
Gali di linti lambar tikai,
Bebungkor enggau selanggor bali belulai,
Dia aku asai ka bisi mimpi.

Mimpi asai ka diasoh Sanggol Labong seduai Nawang Gundai,

Datai ari menoa raya sida di nanga Gelong Merundai,
Ke begamal baka guchai,
Murai ka tangkai takang isang.
Dia aku asai ka diasoh sida iya,
Nyarau tandan tangkai ranyai,
Ke merundai laboh begitang.
Mimpi asai ka diasoh sida negu bintang buyu,
Laboh mesai jalu jalong timang,
Lalu laboh ngimbai ningka tajau lelayang.

Dia kami sarumah lalu tekenyit serta gaga,

Tepeda ka anak gemala tekang gempanang,
Dipeda baka ka tau nganchau tikai,
Ngintu temuai mela pengabang.
Samoa kami bela rindu serta enggau ati lantang,
Biau kami enggau selanjau manok labang,
Diading kami enggau pamping piring letup pulut jentawang,
Asai ke nyambut penatai tuan Raja Tuai,
Datai ari gilik tasik besai ledong lelinang.

Nya alai Unggal/Aya,

Samoa utai ti ditanya ka nuan nya amat magang.
Nya alai skali nyerumba sedan bulan nyin kemari,
Sanu seduai sanu bisi datai nemuai ngagai kami kitu.

/conversion/tmp/scratch/500387603.doc 11/23/2020 Page 16 of 19

Leboh nya semua jako sama agi rapas,
Nya alai kami agi deka bejinak,
Agi deka ngasoh semak.

Nya alai ngelamatu kami seruran nganti penatai kita,

Tang nadai ga meda kita datai agi.
Nya alai diatu tekang gempanang mau segala nadai agi ditu,
Udah dikurong kami dalam pebenong benda menaga,
Udah di jerai kami enggau duri besi kemuja,
Udah dipelali kami enggau badi bemata changka,
Di kunchi kami dalam peti menanyi ringkat dua,
Udah kerebat kami enggau kawah panjai tiga.
Kami deka muka enda ulih buka agi,
Ka ditiki enda ulih tiki,
Beduri ba badi mata changka.
Ditebang enda ulih tebang,
Bepuak ka belembang lampang besi.
Ka ditunu enda ulih ditunu,
Ai nyau ngeching mesai tangkong kendi temaga.
Pun di ibun pasun diwan pesilar ular naga.
Batang belit kendawang tedong bisa.
Pun dan wan ranyuan madu banda.
Puchok enda ulih di tutok enggau tirok sangkoh bemata dua,
Wan kejatan burong tunggok,
Sikok-sikok nyabak ka rayok bulan pernama.

7. Pengari ari lelaki nyaut baru munyi tu:

Unggal/Aya,
Nya alai samoa utai ti ko nuan nya amat magang.
Tang dalam pia,
Kami nadai penakut, nadai penangi.
Kami endang nyikap diri.

Nya alai tipang pesilar ular beluai,

Bisi dibai kami ditu,
Diempu niang Minggat apai Runai,
Leboh gumi ke pegi ngagai kerinchi pantai Panai,
Parai sebrai tiban Nanga San.
Enti tipang pesilar ular naga,
Bisi ga dibai kami ditu.
Dikena niang Rekaya Dana,
Leboh lupu ngulu ka orang nyerang ngagai Batang Sungai Raya,
Trus ngalah ka china nyentok ka nanga Batang Sengkawang.
Enti tipang pesilar ular engkudu,
Bisi dibai kami ditu,
Olih niang Linggir Mali Lebu,
Leboh lupu ke mupu anak iru bulih 41 ka Ulu Sugai Langkang.
Tipang pesilar ular tedong bisi ga dibai kami ditu,
Olih niang Tarang apai Dungkong,
Leboh medong ngaram ka bangkong nanga Rajang.
Tang tipang tu enda dikena kami agi,
Laban iya udah enda bisa.

Tang nyerumbu randang bulan kembong tu kemari,

Kami diasoh Sultan tuan Insong,
Nanam nyatu getah nyelutong.
Dia deh kami nemu pengaroh baru,
Ke bisa ari gigi pesiri ular tedong.
Enti di tikam, iya tau engkanjong,
Enti di tegu, iya tau nyurong.
Nya alai aya/unggal,
Enda iboh kami ngasoh iya terebai,
Semina ngansat ari kami ke besarok dudok berintai,

/conversion/tmp/scratch/500387603.doc 11/23/2020 Page 17 of 19

Pintu kita lalu tekesai lalu tetukang.

8. Ai ansah orang ke tau betusut ari spiak indu ti nyaut jako tu lalu ngara ka tusut

orang ke jadi melaki-bini:

Tu ai palepah apong nipah,

Tumboh di tanah pala pantai.
Tu ai batang bindang beduyah,
Tanam Seripah Dayang Mai.
Tu ai dan meranjang bulan,
Tepan kaban burong Tunggok,
Sikok-sikok nyabak ka rayong bulan pernama.

Kita ke tuai udah berintai besarok dudok.

Nya alai aku ngelar kita ngagai bidok,
Linggar kepar-kepar ngelayar lansar pala lubok.
Leboh menoa kitai ke agi dipegai Menira Raja Brooke,
Nadai ga aku ninga nuan sebana madah ka diri suntok.
Enti temuai datai, nadai ga aku ninga nuan enggai mai temuai dudok.
Laban nuan endang sidi di jari ujong tunjok,
Teleba maras tulok moa pasu.

Tu meh ai ganja bisa teleba bemain di moa burit mangkok,

Ai ganjai nyamai ngasoh grai angkat mabok,
Sua ka aku enggau tapa ujong tunjok,
Sambut nuan enggau tangkup dabong rasok.
Tu ga kena kami ngasoh nuan muka randau kara,
Ngusai ka randau rambai,
Nyila lambar buok ke berasok pampang saribu.
Tu ga kena nuan ngusai ka jala panjai,
Ngambi ka ngerembai mungkor dunya,
Kena nuan nesa penyauh sida,
Kena ngusai ka penyauh kitai,
Ka meda ka penyauh antara.
Dikena nuan ngempong daun apong,
Diara ka di moa bala mensia,
Kena tinda nuan ngara ka leka,
Besebut ka rurun tusut.

9. Nya baru betusut.

10. Tembu betusut, lalu bejako ka derian.
11. Melah Pinang.
12. Nindok ka anak.
13. Ti jadi salah – besapat.
14. Indu nurun ngagai rumah lelaki.
15. Udah makai lemai ba rumah lelaki – bebiau.

Note:
Nyadi tusut di Batang Paku selalu bendar brengkah ari Tindin. Kebuah pia laban ari

Tindin penatai adat derian. Tusut enda tau dudi disebut ari adat bukai, baka derian

enggau bunga pinang.

Digumpul Gregory Nyanggau Mawar

Kerangan Pinggai, Paku, Spaoh, Saribas
-------------
Leka Jako Kena Manchak Babi Ba Kaki Tangga

Nya alai babi menoa kita tu udah di gayang kami enggau generang sangkoh bemata dua.
Darah tu balat nujah kaki dua enggi kami,
Dibai kami niki ngagai ladi rumah raya enggi kita.
Din lagi, leboh kitai ke bekemumok dudok bebanda,

/conversion/tmp/scratch/500387603.doc 11/23/2020 Page 18 of 19

Leboh lambu kitai ke betiu bejako nyampau becerita,
Tau tu bebali nyadi taring uting lunchik juring babi menoa,
Enggau begulok tandok rusa periga,
Diambi sida lengayun endun dara,
Jadi ka ubat padi paya kena tinda sida ngisi moa tibang tundan.Nya alai babi indu kita tu udah digayang kami enggau generang
sangkoh mata siti.
Darah tu udah nujah tunjok tengah kaki kami ke bediri maioh beranti.
Dibai kami niki ngagai penyurai rumah tinggi enggi kita.
Din lagi leboh kitai ke bekemumok dudok besendi,
Serta betiu ka jako main bebuti,
Tau tu bebali taring uting lunchik juring ngeli jani,
Enggau gempelu batu ai,
Diambi sida endu teruna dara tinggi,
Diengkah ka sida manah-manah di tikai bebuah sigi,
Jadi ka ubat sempeli kena sida ngisi igi tibang rarentam.

Nya alai babi lelaki enggi kita tu udah digayang kami enggau generang sangkoh besi.
Darah tu balat nujah tapa kaki,
Lalu dibai kami niki ngagai leladi rumah menchegi enggi kita.
Datai din leboh kitai ke bekemumoh dudok bebandi,
Serta betiu ka jako maioh reti,
Dia iya bebali nyadi ngeli jani babi lelaki,
Enggau batu pupu gumbang nyadi,
Diambi sida endu teruna dara mereti,
Engkah ka sida manah-manah di klasah tikai anyam diri,
Jadi ka ubat padi awak ka tebekan lalu jadian.

Digumpul Gregory Nyanggau Mawar,

----------

/conversion/tmp/scratch/500387603.doc 11/23/2020 Page 19 of 19