BAHAN SERMON JAMITA PARTANGIANGAN

MINGGU XII DUNG TRINITATIS – LUKAS 14:25-33

PATAR DO SALUHUTNA DI ADOPAN NI TUHAN I (SEMUA NYATA DI
HADAPAN TUHAN)

PAMUHAI

Nuaeng on hira na martigatiga mobil bekas (mobil seken) nama hakristenon. Molo porlu
banting harga, bohama asa langku. Lapatanna asal ma Kristen nyaris tanpa komitmen. Nunga torop
halak Kristen naso berkomitmen, naso adong parsitutuonna mameop haporseaonna jala naso ra
mangihuthon Kristus Jesus. Mambege jamita pe ingkon na lucu-lucu nama, ndang tolap be mambege
molo nunga mardomu tu angka poda, apoapo, dohot paminsangon. Holan ro parungkilon nunga
manigor madabu tu bagasan pandelean. Halak naung merasa puas, molo nunga ro ibana ganup
minggu tu gareja, molo ndang manusai ibana tu donganna, ndang mangganggu ibana tu donganna.
Alai ndang adong komitmen laho manarihon dongan lobi sian na mangait tu diri sandiri.

Ndang sipangorai Tuhanta Jesus taringot tu holong maradophon keluarga dohot dongan
jolma, ai gari manghaholongi musu marulakulak diajarhon Tuhan Jesus. Holong maradophon
keluarga do sada unok ni pangajarion ni Tuhan Jesus. Alai boasa ingkon dohonon ni Tuhan Jesus:
“Ganup halak na ro tu Ahu, ndang tarbahen gabe siseanKu, ia so dihasogohon ibana amana, inana,
na niolina, anakkonna, hahaanggina dohot angka ibotona, ro di hosana sandiri” (Luk. 14:26).

HOTORANGAN

Ndang dipabuni Jesus agia otikpe sian angka siihuthon Ibana lapatan ni namangihuthon
Jesus. Molo taihuthon Ibana rade ma hita mate tu dirinta sandiri, selesai dengan diri sendiri, laho
mamboan hangoluan. Dohot hatorangan na jempek, nasa namanuhuk silangna rade ma ibana
tarsilang ditingkina.

Ingkon tumimbo do Debata sian saluhutna. Ingkon mansohot do hita sian na merasa puas di
angka naung somal tapatupa di bagasan ngolunta. Ringkot do parsitutuon. Nunga godang halak
Kristen holan alani na mangadu hasangapon, popularitas, pangomoan, pardonganon, dohot lan angka
na asing gabe sumoadahon Debata. On ma tingkina huria manungguli ganup naporsea asa sude
gomos maniop asi ni roha naung tajalo sian Debata.

Diatur ulang Tuhanta Jesus ma nuaeng komitmenta ganup Paboa laho mangihuthon Jesus
ndada holan asal porsea hita, alai marsidohot do hita mangulahon hasintonganNa. Mangihuthon
Jesus sahat do nang tu na memengaruhi cara kita memperlakukan keluarga, hombar balokta, dongan
saulaonta, dohot angka na so tumanda hita, dohot na so tatanda, marasing situtu sian hita, dohot cara
mamangke tingkinta, mamangke hepengta, mamelehon peleanta. Ala ingkon otentik do haporseaon i,
ndada songon holong ni angka deba dongan nasabagas, asal ma masiidaan, bahkan nadeba ndang
masiidaan, alai ingkon marpanghorhon tu angka nadangol, tu angka napogos, tu humaliangta.

Jala sian turpuk on ma boi antusanta dia do lapatan ni Barita na Uli. Ndada holan pesan moral
dohot etis isi ni Barita na Uli. Ndada holan pedoman taringot tu cara hidup ni halak Kristen Hata ni
Debata, alai dohot do komitmen, parsitutuon na tontu laho satia tu Debata. Tagamon do sai adong
angka mangihoti hita mangihuthon Ibana. Alani, tompu do disintak Ibana hita laho manadingkon
nasa na boi mambaen hita lohot (melekat), menak, manontong, menetap, momok demi kenyamanan.

Ai molo mian hita dibagasan halohoton i, gabe tardok ma hita songon halak na so manguduti
pajongjong palaspalas i (ay. 28-30), tapungka ala ndang tapasidung. Ima tudos ni halak angka na so
berkomitmen. Alani, panjouon ni Jesus ndada holan komitmen na pejet. Alai parsitutuon na
manonton, mangihuthon Ibana satia ro di salelengna.

PANIMPULI

Nasa zona nyaman na adong di hita sinuaeng ditantang parsaoranta tu Tuhan Jesus. Patar do
saluhut di adopanNa. Ndang bolas hita marsidalian manang martabuni di bagasan zona nyaman na
adong dihita nuaeng. Diida Debata do sahat tu roha parbagasanta i, berkomitmen do hita
mangihuthon Ibana manang ndang.

Parsatongkinan do nasa na mangihoti hita di portibion, agia pe arta dohot hasangapon,

parsatongkinan do saluhutna. Patar do di adopan ni Tuhanta na bola angka i mangambati hita laho
mangihuthon panjouon ni Tuhanta.

Dijou Tuhanta do hita laho tumadingkon nasa napaholang hita sian Debata. Ingkon sian nasa
gogo do hita ro mandapothon Ibana. Nunga tingkina hita manontuhon prioritas manang hasudungan
ni ngolunta. Amen.