BATU BADAONG

Basudara, dolo-dolo toh ada satu kampong di Maluku Utara sana yang akang pung nama
Tobelo. Di kampong itu ada tinggal satu keluarga, bapa, mama, deng ana dua. Ana
pertama ni parampuang, dia pung nama O Bia Moloku, dia pung ade laki-laki pung nama
O Bia Mokara. Dong pung rumah nih akang dapat biking dari atap rumbia.

Dong bapa pung karja hari-hari tu cari ikan di laut. Pas bapa ni mau pi cari ikan di laut,
bapa ni pasang par dia pung bini “mama b ada mau pi cari ikan ni, jang ada yang
makang b pung talor ikan yang di para-para ee. Ingatang simpang akang”. Lah mama
biking yang bapa su bilang, simpang bapa punya talor ikan di para-para. Seng lama pas
bapa pi, dong mama mau pi ka kabong lalu antua panggel antua pung ana dua tu. “O Bia
Moloku, O Bia Mokara, mari sini mama bilang par dong dua; jang perna kamong
makang bapa pung talor ikan yang di para-para tu. Sampe kamong dua makang akang
lia sa nanti apa yang jadi. Pas abis dong mama bilang bagitu, dong dua cuma katawa sa.

Seng lama dong mama pi kabong, ana laki-laki maraju lapar par dia pung kaka. “Hayo
kaka ee, b su paleng lapar”. O Bia Mokara ni tinggal maraju par dia pung kaka. O Bia
Moloku seng sampe hati lia dia pung ade maraju lapar, lah dia pi cari makanang par dia
pung ade. Pas dia cari makanang di dapor seng ada makanang, pas dia inga ada talor ikan
yang dong mama simpang di para-para. O Bia Moloku ambel akang lalu kasi makang dia
pung ade. O Bia Mokara barenti maraju lah makang talor ikang yang dia kaka kasi tu.

Seng lama dong pung mama bale. Dong mama bawa kasbi dg sayor dari kabong. Mama
taruh kasbi deng sayor-sayor tu lalu pi kasi barsih kaki deng tangan. Lalu abis itu mama
pi gendong ade par mau kasih susu dia, tapi dong mama takajo pas lia ada sisa-sisa talor
ikan tatempel di O Bia Mokara pung mulu. Mama ni paleng marah, antua taruh O Bia
Mokara lah antua lari. O Bia Mokara lalu maraju. O Bia Moloku pas lia dia mama lari,
dia batari dia pung Mama “Mama ee ade manangis, Mama…”. O Bia Moloku ni panggel
dia pung mama tarus. Tapi mama sg bale muka lia dong lai, antua cuma bataria “ramas
daong katang-katang sah, ada akang air susu lah kasi minum par ade”. Abis dong pung
mama bilang itu, antua lalu buang diri ka laut. Mama lia batu basar akang timbul di air,
mama naik di akang batu basar tu lalu duduk manangis deng manyanyi “batu
badaong….. batu lah batangke…buka mulutmu talang lah beta… batu badaong….. batu
lah batangke…buka mulutmu talang lah beta”.Batu tu akang tabuka basar-basar, lah
mama maso abis itu bataria “tutuplah !! Lah batu tu akang tatutup abis mama bataria. O
Bia Moloku gendong dia pung ade yang ada manangis tu lah bataria-bataria panggel dong
pung mama. Tapi siooo, dong dua seng dapa dong dua pung mama lai.

Pasang dari carita ini katong seng boleh malawang katong orang tua pung parenta deng
nasehat. Seng boleh biking katong orang tua mara deng saki hati lai, karna dong su
berkorban banyak for jaga deng rawat katong.