SASTRA TUTUR KECAMATAN BAYUNG LENCIR

KABUPATEN MUSI BANYUASIN

“ASAL OSOL NAME DOSON LUBUK SANGGAR”

Assalamualaikum Wr. Wb

Mamak, Bebek, ngen Kopek, Koyong, aku kak nak ngenalke diri nameku Lidia
Apriliani, aku nak becerito tentang Asal Osol Name Dosonku, Iyolah Lubuk
Sanggar, Kopek Koyong, Lubuk Sanggar ikak iyolah Doson yang berade diojong
Bayung Lencir.

Name Lubuk Sanggar diambek dai Ughang-ughang dulu yang galak ngenjuk sesajen
ditepi sungai, yang dalamnye ade ayam, nasi, bobor abang, bobor puteh, dan mase
banyak lagi. Sesajen itu ditarok dipocok anyaman bambu, tujuannye iyolah ontok
ngehormati arwah nenek moyang yang ade disitu. Karne dulunye Lubuk Sanggar
ikak didiami oleh suku anak dalam yang nganut animisme, selaen itu tujuan dai
nyanggar ikak iyolah ontok ngoser roh-roh jat, karne mun ndak paghak magrep
galak tedengo suaghe ughang nyemolong, ade pule suaghe ughang mintek tolong,
ade lagi suaghe ughang dang beperahu, tapi segalek yang tedengo ikak dak suek
wujudnye, Cuma ade suaghenye bae. Gawe nyanggar ikak diadeke ditepi sungai
medak yang panjangnye 100 km, Lubuk Sanggar ikak iyolah ojong dari Sungai
Medak.

Edop ughang suku anak dalam ikak sederhana nia, die manfaatke alam-alam ontok
edopnye, mulai dai makanan sampe tempat tinggal galeknya maanfaatke alam.
Ughang suku anak dalam laju pindah karne aseknye teganggu. Sekitar 1950 ade
ughang merantau kesikak, ade yang datang dai Palembang, ade pule yang datang
dai Jambi, tapi kebanyakan datang dai Palembang, khososnye dai Oki. Die datang
kesikan nak nontot kayu balok, karne di Lubuk Sanggar ikak alamnye mase rengke
nia lom diolah siape pun. Sekitar taon 1955 ade yang mati disikak kene bono, dan
ditaon berikutnye iyolah 1960 ade pulek yang mati kene saleng bono mangke ditaon
1965 ade yang mati tenggelam, mayatnye teunde aros banjer sampe ke aspal.
Beberape malam batu ditemuke, yang buat ughang sikak bingung ngapelah waktu
ditemuke mayatnye peghotnye dak kembong, dak same sekali tetegok di ayo. Jadi
ughang sikak yaken kalu ikak ade yang nyagenye, iyolah nenek-nenek, entah
makmane rupenye. Sejak itulah ughang sikak nyebutnye Lubuk Sanggar.

Kopek, Koyong, serte segalek penonton yang ade disikak, terimekaseh lah nak
dengoke cerito aku, mare mun nak singgah ke doson aku kire-kire dai sikak ke
doson aku 6 jam. Awas kanti-kanti kagek tepeliwat ke Jambi, karene dosonku kak
berade diperbatasan Palembang Jambi. Terimekaseh Wassalamualaikum Wr. Wb.