Contoh Syair/Lirik Karungut Kalteng Modern

Lirik Karungut 1

Judul:Tradisi Budaya Manyipa

Cift. :Julia Restulangi

Hetuh tinai itah hasupa

Dengan ketun je tundah kula
Isut kesah handak nyarita
Ampin tradisi budaya manyipa

Isut sarita je akan itah

Budaya dayak Kalimantan Tengah
Karen budaya je handal ingesah
Mahining karungut je bujur buah

Tege budaya uluh bakas huran

Melai intu lewu kalimantan
Sampai wayah tuh masih ihapan
Akan kakare tundah jalahan

Tege ije budaya tradisi

Je dia tau itah malihi
Aluh wayah je sasar rami
Tradisi jituh tatap ingawi

Bara huran manjadi gawi

Sampai wayah tuh je gitan ampi
Akan itah tundah pahari
Budaya manyipa je jari tradisi

Budaya jituh masih ingguna

Hapa pambuka pander sarita
Akan kare je uluh maja
Mina mama bakas tabela

Melai suku dayak biasa manyipa

Bara je bakas palus tabela
Akan pambuka pander sarita
Dengan pahari je tundah kula

Amun uluh handak manyipa

Tege nyadia ramuan kea
Bara je sirih sampai kapulaga
Uras langkap taluh nyadia

Budaya jituh jari tradisi

Dia tau inganan atawa nangkiri
Ela sampai itah malihi
Awi zaman je sasar rami

Seni budaya itah palampang

Je jari impelai awi tatu hiang
Ayu itah je hanjak rantang
Mahaga budaya dengan atei huang

Akan itah tundah pahari

Bakas tabela hatue bawi
Karungut itah je lepah ampi
Aku balaku je paramisi

Tikas tuh helu tandak sarita

Atun kakare seni budaya
Amun tege kutak ku sala
Balaku ampun barata-rata