ZALA SALIB

STASI ST. YOSPEH OLAKILE

PAROKI ST. FRANSISKUS XAVERIUS BOAWAE
JUMAT, 7 APRIL 2023

1. Nyanyian Pembuka
2. Tanda Salib
P: Ne’e ngaza Ema, Ne’e Ana, Ne’e Ngai Santo
U: Amin
3. Pengantar
Ine Ame, Ka’e Azi, ana- ana, ta Ga’e Yesus wuamesu. Leza nge’e kita
sama-sama mo’o dheko zala salib, ne’e Ga’e Yesus ta negha so’i imo
ko’o ola sala kita. Mai ne’e toto ate, gula one weki kita, bhila ba ena
zala salib Yesus?
Kita bhila Yudas, ta teka Ga’e Yesus?
Kita bhila Pilatus, ta ti’i huku Ga’e Yesus?
Kita bhila rasul –rasul, ta to’o lia Ga’e Yesus?
Kita bhila Petrus, ta mona dheko pata pele Ga’e Yesus?
Atau kita bhila Simon, ta laka fa’o Ga’e Yesus?
Kita bhila Veronika, ta pezi izu nia ko’o Ga’e Yesus?
Ne’e Ine Maria, ta ate bha, dheko sama ne’e Ga’e Yesus ena zala
salib?
Kita ngusa he uzu ko’o ola sala kita negha bai woso, mai kita pai
ampun Ema Dewa nee buju ngaji no’u.

Hening sejenak...

Oo Ga’e Nga’o ne’e Dewa nga’o, nga’o no’u tebbhe-tebhe ko’o sala
nga’o. Uzu pu’u sala ke, ngusa gena huku ta molo, wali nga’o no’u
so’o nai, uzu ne’e sala ke mogha, nga’o negha tau mea Kau, ta mesu
tebhe ne’e nga’o.
 Nga’o koka sala ke, wali ne’e laka fa’o ko’o ngawu surga Kau, nga’o
he tebhe-tebhe, mo’o tau molo walo, ko kema tau nga’o ne’e mona
wali ele sedeka laga ko’o pareta Kau. Amin.

Doa Pembuka:
Mai sa’i kita buju ngaji
P: O Yesus tebhe kau negha bana zala salib pu’u de bo’a Yerusalem
nuka zele keli Kalvari.
J: Kami ai dheko kau zale one ate kami.
P: Kau negha sa’a Salib ta date, wali ata toka mata Kau zeta salib mo’o
lama imo sa kita ata, ne’e lama kami mogha.Tau sa’ikami no’u
tebhe-tebhe, imo ko’o sala kami. O Santa Maria, tu sai kami nuka
zele keli Kalvari Jeka de au Salib ana kau.
J: Kami fonga nesi susa mogha sama-sama nee kau ine kami ta ate
susa.
U: Amin.

STASI TA WUNGA-WUNGA : ATA HUKU GA’E YESUS MATA DE SALIB

P: Kami tau uku-ada ne’e dhei Kau o Kristus
U: Uzu Kau negha so’i kami ne’e Salib Kau ta so’o Santo
P: Ata Yahudi wuku: Salib sai imu! Salib sai imu! Pilatus e’e ata ta pai.
ele imu solo negha, ata ngee sala mona.
P: Yesus, Kau ana Dewa tebhe. Ata Yahudi bhia dheko Kau. Demu zoka
dhoa Kau.
J: Toto ate kami dheko Kau.
P: Kami dheko mogha napa leza ta wa’u epo Kau to’o walo dia wawo
tana, tau geti huku ata ta muzi ne’e ata ta mata.
J: Pea sa’i weki Kau ena kami bhila moi tau zia, mona bhila moi geti
huku.
U: Amin.
P: Ema kami ta latu ena surga, pai-pai imo sa iwu, tau milo ngaza Kau,
wali pereta Kau, dhu dia kami, ne’e ola fonga kau, bale dia wawo
tana, bhila ena surga, ka inu kami leza-leza, ti’i kami de leza nge’e
 ne’e ti’i ampun sala kami, bhila kami ti’i ampun ata, ta tau sala ena
kami, ne’e ma’e tu kami ena tau zapa ate kami, bholo tau zeu sa’i
kami pu’u ta ee. Amin.
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA ZUA: GA’E YESUS SA’A SALIB IMU

P: Kami tau uku-ada ne’e dhei Kau o Kristus
U: Uzu Kau negha so’i kami ne’e Salib Kau ta so’o Santo
P: Ata gho Salib siba se’a de wawo wigu Ga’e Yesus. Toto ai gae Yesus
simo Salib ke. Ne’e ate keli imu dheko ata nuka zele wolo Kalvari.
P: Yesus, Kau ngasi peka: “ sai ta fonga dheko nga’o, imu ngusa sa’a
Salib imu de wigu imu ge-ge leza” .
J: Kami ai dheko Kau ne’e Salib kami.
P: Salib kami ke; ola kema ghawo, petu laza, bojomo, ne’e ta pesa-pesa
wali.
J: Kami mo’o nesi imo ko’o susa ke, uzu mesu Kau.
P: Ema Kami...
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA TELU: GA’E YESUS TEGU NEE SALIB IMU TA WUNGA-
WUNGA
P: Kami tau uku-ada ne’e dhei Kau o Kristus
U: Uzu Kau negha so’i kami ne’e Salib Kau ta so’o Santo
P: salib ko’o gae Yesus date tebhe, wali weki imu negha moo peka, uzu
koo a woso ta gedho. Imu siba tegu ne’e Salib imu. Yesus, kau ngasi:
ola fonga kita ata modhe pau, bholo weki talo.
J: One wole kele ko’o setan tau keli sai kami.
P: Ngaza setan negha dheo kami ena tau sala. Tii ampun sai kami. Amin
P: Ema kami...
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala
STASI TA ESA WUTU: GAE YESUS PAPA NABU NE’E INE IMU
P: Kami tau uku-ada ne’e dhei Kau o Kristus
U: Uzu Kau negha so’i kami ne’e Salib Kau ta so’o Santo
P: Deta lele Ga’e Yesus ata dheo nuka zele wolo Kalvari mo’o tau mata
Santa Maria toto omi, kai bana sama ne’e ana imu. Gae yesus, santa
maria ate susa tebhe, nabu demu zua ine ana papa uka, sa ga’e ne’e
sa ga’e. Santa maria ate kau tolo medhu ngedha papa sabu miu zua
ine ana.
J: Kami kasi ku.
P: Kau bana sama ne’e ana kau zeta wolo Kalvari.
J: Kami hai dheko wa’u logo kau,,, Amin.

LAGU MARIA ( koor)

P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA LIMA: SIMON LAKA, SA’A SALIB KO’O GA’E YESUS
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Zala tuga ko’o watu. Leza bai petu, Ga’e Yesus sa’a mo’o talo Salib
ta date ke. Sodadu fonga ata ana aki sa ga’e ta ngaza Simon mo’o
laka Ga’e Yesus sa’a salib. Yesus ngaza salib kami tau oo de wigu
kami bai aka.
J: Laka sa’a salib kami.
P: Latu kita ata woso ta poto sa’a salib bai date.
J: Keli sa’i ate demu,,, Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala
STASI TA ESA LIMA ESA: VERONIKA PEZI NIA KO’O GA’E YESUS
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Li’e mata ko’o Ga’e Yesus faku; imo sa izu nia imu benu fa ko’o aa,
ko’o kewu ne’e ae lua ata. Veronika ta fai ga’e gula ga’e Yesus imu
mesu tebhe. Toto pau imu ala kae sa esa pu’u de sa’o imu, siba pezi
nia ko’o Ga’e Yesus de one kae.
P: Yesus, Veronika negha tau modhe ne’e kau. Kami mo’o tau modhe
nee moko doa kami, uzu mesu Kau. Veronika mona taku sodadu
ne’e ata Farisi. Kami moo poto dheko Kau, mona taku mea, ne’e kita
ata,,,Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA LIMA ZUA: GA’E YESUS TEGU TA DEKA ZUA NE’E SALIB
IMU
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Mo’o gedho bo’a Yerusalem wesa ne’e bai me. Simon welu salib,
Ga’e Yesus siba tegu. Ata bhobha Ga’e Yesus, keda ne taga mo imu
to’o walo. Yesus, kau tegu wali, uzu Simon welu salib kau.
J: Kami tau sala wali uzu kami mona bai jaga ne’e buju ngaji bhila kau
ta ngasi
P: Kau tegu bholo kau to’o walo
J: Tau sa’i kami mo’o ko ola sala, kami no’u ko sala ke,,,, amin
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala
STASI TA ESA ZUA BUTU: GA’E YESUS TAU SEBO EO FAI GA’E TA ITA
NANGI IMU
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: De logo bo’a Yerusalem Ga’e Yesus papa uka ne’e fai ga’e, mo ga’e
telu ko wutu ai. De ta demu tei Ga’e Yesus sa’a salib ta date, demu
tolo ita nangi. Ga’e Yesus male nia de fai ga’e peka ke siba punu, ‘Ee
siza, miu ma’e ita nga’o. So’o zi’a miu ita weki miu ne’e ana-ana miu.
Yesus, fai ga’e ke kasi ku kone tei kau ne’e salib ta date ke.
J: Kami mo ita nangi, kami nuzu pu’u ko sala kami.
P: Kau negha sebo eo fai ga’e ta ita nangi kau.
J: Tau sebo eo kami mogha, one susa ta mo’o leba de weki ne ate
kami,,, amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA TA ESA: GA’E YESUS TEGU DEKA TELU NE’E SALIB IMU.
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Ne’e ko zala ghili gheo nuka zele keli, weki ko’o Ga’e Yesus negha
nge mo, ata edha tali ne’e bhobha Ga’e Yesus mo imu bana so’o
omi. Imu pugu de watu siba tegu.
P: Yesus, kau tegu ta deka telu ne’e salib kau.
J: Kami kasi ku kau ngasi zala nuka zeta surga ipo ne’e bai me
Ma’e tena bholo kami dheko zala kapa ta dheo kami one api
neraka,,, amin
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala
STASI TA ESA SA BULU: ATA LEDU SADA OBA KO’O GA’E YESUS
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Sada oba Ga’e Yesus dhatu dheke keli de teka weki imu, Ga’e Yesus
lele oo wali mea nabu ata ledu ko’o sada oba imu.Yesus, sodadu tau
o’o weki Kau.
J: Kami mo’o nesi bholo, imo ko’o susa ta gena weki kami.Sodadu tau
mea Kau, ena nia iwu.
J: Kami bhia dheo ata ena tau sala meze. Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA SA BULU SA ESA: ATA TOKA GA’E YESUS DE SALIB

P: Kami tau uku-ada ne’e dhei Kau o Kristus.
U: Uzu Kau negha so’i kami ne’e salib Kau ta so’o Santo
P: Ata watu Ga’e Yesus, mene de wawo salib, negha siba toka lima nee
a’i imu ne’e paku.Yesus, Kau dheko ola fonga ata, ta mo’o toka Kau
ena Salib.Kami mo’o dheko, imo ko’o pareta Ema Kau nee ata ta
Pareta dia wawo tana. Kau tu dheo weki ne’e mae Kau ena ema Kau
tau lama kami.
J: Kami tu dheo beki weki kami sama-sama ne’e Kau. Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA SA BULU ESA ZUA: GA’E YESUS MATA DE SALIB

P: Kami tau uku-ada ne’e dhei Kau o Kristus.
U: Uzu Kau negha so’i kami ne’e salib Kau ta so’o Santo
P: Ngada sa’i nuka zeta gula sa’i Ga’e Yesus de salib ke. Ulu, lima, ne’e
imo sa weki. Aa nou nuka zale awu, tolo basa maza, to fanga, sai ta
lu mata imu mona ko’o ba’u, ngaza imu gula Ga’e Yesus de Salib?
LAGU ELI LAMA SABAKTANI ( koor)
P: Yesus, Kau eto aa Kau ta milo tau lama kami.
J: Mesi ngala kami mogha mo’o ampun ata ta tau sala ne’e kami. Kau
ngasi Ema ampun sa’i ata tau ee ne’e nga’o. Kami mogha mo ampun
ne’e ata tau sala ne’e kami. Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA SA BULU ESA TELU: ATA LO TEBO GA’E YESUS PU’U DE SALIB
P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Ga’e Yesus, nabu ngai imu peli mo’o pota, imu pea ine imu de Santo
Yohanes ne’e de imo ata serani tau ine kita. Gula sa’i ine kita ta ka’o
ana imu, ta imu dhadhi. De ta tei weki ana imu benu ne’e teka, imu
lu mata ba’u uzu mesu ne’e ana imu ta kita ata tau mata. Santa
Maria, sala kita ata, sala kami mogha tau mata ana kau. Ine kami,
pepe ghepe sa’i kami mo’o kami mogha kono de wesa surga.
J: Mo’o kami meza zale one sa’o Ame kita sama-sama ne’e kau,,, amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

STASI TA ESA SA BULU ESA WUTU: ATA TANE GA’E YESUS

P: Kami tau uku-ada ne’e dhei Kau o Kristus.
U: Uzu Kau negha so’i kami ne’e Salib Kau ta so’o Santo
P: Ata pongo tebo ko’o Ga’e Yesus Kristus ne’e kae ta nipi, siba kole
zale one ate. Santa Maria, Maria Magdalena, nee fai ga’e ta pesa, ta
dheko Santa Maria bhodhu we’e ate ke, siba ita nangi. Yesus, ata
nangi Kau, bholo mae-mae ta keze Kau ena wewa wesa surga, ate ai.
J: Ate kami tolo ga’i gole, uzu nge’e wesa surga lenga bholo.
P: De ta leza esa telu, Kau negha to’o walo ne’e ngai meze.
J: Tau sa’i kami to’o walo de leza ta wa’u epo bhila kau,,, Amin.
P: Ema kami .....
P: Mesu sa’i nee kami, o Yesus mesu sai ne’e kami.
U: O Dewa mesu sai ne’e kami ata ne’e sala

DOA PENUTUP:
Mai buju ngaji sai kita:
P: Dewa Ema zeta one surga, kami negha dheko zala salib ne’e Ga’e
Yesus Ana Kau, ta ata bhobha lebho, ne’e tolo boka to’o, jeka mo’o
mata, uzu mo’o so’i, imu ko’o ola sala kami. Kami pai laka sa’i, ne’e
tau keli sa’i kami leza nge’e ena ko’o uku ada, bhela zala agama, mo
he walo Ga’e Yesus ta mata ena salib, uzu Kristus Ga’e Dewa kami.
U: Amin.
P: Ne’e ngaza Ema, ne’e Ana, ne’e Ngai Santo.
U: Amin

LAGU PENUTUP
Malatute- Olakile, 01 April 2023
Penerjemah dari Buku Madah bahkti Jalan Salib I
Bapak Hendrikus Mite& Anselmus Lenga

Doa Tobat mo’o tau molo walo, ko Bapa Kami

Oo Ga’e Nga’o ne’e Dewa
nga’o, nga’o no’u tebbhe-
tebhe to sala nga’o. Uzu
pu’u sala ke, ngusa gena
huku ta molo, wale nga’o
no’u so’o nai, uzu ne’e sala
ke mogha, nga’o negha tau
mea Kau, ta mesu tebhe
ne’e nga’o. Nga’o koka
sala ke, wali ne’e laka fa’o
ko’o ngawu surga Kau,
nga’o he tebhe-tebhe,
kema tau nga’o ne’e mona Ema kami ta la tu ena
wali ele sedeka laga ko’o surga, pai-pai imo sa iwu,
pareta Kau. Amin. tau milo ngaza Kau, wali
JAWABAN UNTUK SETIAP pereta Kau, dhu dia kami,
PERHENTIAN ne’e ola fonga kau, bale
Memulai doa dalam dia wawo tana, bhila ena
perhentian surga, ka inu kami leza-
P: Kami tau uku-ada ne’e leza, ti’i kami de leza nge’e
dhei Kau o Kristus ne’e ti’i ampun sala kami,
U: Uzu Kau negha so’i kami bhila kami ti’i ampun ata,
ne’e Salin Kau ta so’o ta tau sala ena kami, ne’e
Santo ma’e tu kami ena tau zapa
ate kami, bholo tau zeu
sa’i kami pu’u ta ee. Amin.
Sesudah Bapa Kami
P: Mesu sa’i nee kami, o
Yesus mesu sai ne’e kami.
U: O Dewa mesu sai ne’e
kami ata nee sala