Bahan Sermon HKBP Ressort Hutabaru

Minggu, 3 Maret 2024 Minggu Okuli .

Evangelium : Psalmen 19:8-15
Epistel : 1 Korint 1:18-25
Sun Denggan Do Patik Ni Jahowa
Firman Tuhan Itu Sempurna

Patujolo
Psalmen 19 on sada psalmen na mansai uli namangendehon huasoni Jahowa dohot Uli ni hata ni
Jahowa dohot patik na. Jala dipungka do psalmen on marhite ende namandok na dihatindanghon angka langit
do huaso ni Jahowa sitompa angka langit i. Mansai balga do huaso ni Debata di portibion, dang adong na buni
sian huasoni Debata. Dung dipapatar Jahowa dirina marhite nasa na tinompa na, diudut Tuhan i do papatarhon
diriNa manang dipatandahon dirina tu jolma manisia marhite hata-Na. Turpuk psalmen 19 on dipamasuk para
ahli teolog do tu horong “Mazmur Madah” manang ende, puisi puji-pujian paboahon hinadenggan ni
pambahenan ni Jahowa.1 Secara khusus ende psalmen on disoarahon asa mangalehon angka perasaan na marlas
ni roha marhite liturgi pamujion di ganup ganup inganan mezbah manang baik Allah. Marhite ende on do halak
na mangendehon manubuhon komitmen laho mansoarahon karya Allah tu sude halak na managihon jala
mangolu ma ibana sian Hata i. 2 Di buku Jesaya laos patar doi didok “Ingkon songon i do hataKi na ruas sian
pamanganHu: dang mulak boti tu Ahu, ingkon bahenon na do lomo ni rohangku, jala manjadi tu na hutongos.
(Jes 55:11). Ia hata ni Debata naung sahat tu hita ganup jolma ima hatani Debata na Badia, napolin, nasingkop,
natigor, na sintong, jala namanghorhon huhut manjadi di ngoluni jolma.
Hatorangan Ni Turpuk
Diendehon Raja David do hinadenggan ni patik manang hata ni Jahowa na manjadi tu bagasan ngolu na
songoni nang tu angka namanjalo hatani Debata. Molo ta jaha di psalmen 19 on, adong piga pandohan
namartudu tudu tu patik ni Jahowa di turpuk on ima, panindangion ni Debata, uhum ni Debata, tona ni Debata,
dalan ni Debata, aturan ni Debata, parenta ni Debata dohot hatigoran ni Debata. Dihatindanghon Raja David do
hinadenggan hata ni Debata naung dijalona dibagasan ngoluna, songon angka jolma naung manjalo jala
manghaporseai hata ni Debata.
 Hata ni Debata do na tau pasabam roha
Hata ni Debata dao tumimbo sian parbinotoan ni pingkiran ni jolma, timbo jala bagas do hata ni
Debata sahat tu roha. Dipasabam do roha ni angka namanjalo hata ni Debata songon parmahan na denggan
pasabamhon roha ni biru biru mardalan di dalan hatigoran asa jumpang jampalan na lomak dohot aek
hasonangan.
 Tigor do hata ni Debata na margogo gabe sipalas roha ni jolma.
Tigor namarlapatan doi, hata ni Debata ndang adong gabus, dang adong nego-nego, ido umbahen
didok hata ni Debata tigor, jala boi mangalehon pos ni roha tu jolma na manghaporseai Ibana. Hata ni
Debata do palashon Rohana ala nunga targoar ibana dibagasan goar ni Debata Jahowa. Disohali ibana do
hata ni Debata songon sipanganon partondion na, ala diantusi ibana hata ni Debata na mandok “Ndada
holan sagu sagu hangoluan ni jolma, mangolu do tahe jolma i sian ganup hata na ruar sian pamangan ni
Jahowa” (5 Musa 8:3).
 Ayat 14 – 15: Mangido Haluan Sian Debata
Dirajumi Raja David do na sai adong musuna na boi mangagohon ibana. Godang do na naeng
mandabuhon Raja David sian harajaon nai, alai ido umbahen mangaranap parnidaan na dompak Jahowa
mandok: Palua ma huhut naposom sian angka haginjangon ni roha, asa unang ahu dirajai! (Ayat 14). Nang
pe sahalak raja si David jala sahalak na miniahan ni Jahowa dang na gabe malua ibana sian pangunjungan
mangulahon dosa. Dibahen i ringkot do manjalo pangurupion sian Debata laho pasidinghon diri sian angka
dosa i.
Panimpuli
Taharingkothon ma hata ni Debata marhite turpuk on na mandok: Mangantusi hata ni Debata,
Manghatahon hata ni Debata. Godang pasahaton ni Debata molo taradoti hata-Na. Tutu ringkot do hamoraon,
hasangapon, dohot hagabeon alai ingkon jumolo do ta haringkothon hata-Na jala unmarga do hata I sian
haportibion. “Salpu pe sogot langit dohot tano on, ianggo hata-Ki ndang na olo salpu!” (Markus 13:31), Amen.

1
Matthew Hennry Commentary, Tafsiran Mazmur 19, (Worldpress, 2017)
2
www.academia.edu: Marcellius Ari Christy, Ringkasan Mazmur, (2010), hal. 1-14.