Nama : Ni Luh Putu Eka Dian Anggreni

NIM : 2311031112
No. Absen : 16
Kelas : B3 Denpasar

TEKS ĀDIPARWA

Bhagawān Domya

Bhagawān Domya Hana sira brāhmana bhagawān Dhomya ngaran ira. Patapan ira ry
Ayodhyāwiśaya. Hana ta śiṣya nira tigang siki, ngaran ira sang Utamanyu, sang Āruṇika,
sang Weda. Kapwa pinarīkṣa nira, yan tuhu guruśuśrūṣa gurubhakti. Kramanya de nira
marīkṣa: sang Āruṇika kinon ira yāsawaha rumuhun, kamênā nira wehana ri sang hyang
Dharmaśāṣtra. Yatna ta sang Āruṇikāgulaha, sakrama ning masawah ginawayakên ira.
Sêdêng ahayu tuwuh nikang wīja, têka tang wah saha wṛṣṭipāta hudan adrês. Alah ta galêng
nikang sawah. Saka ri wêdi nira n kahibêkana toya ikang pari, tinambak nira ta ya, tapwan
asowe ikang wway. Alah teka tambak nikā, muwah tinambak nira. Tan wring deya nira, i
wêkasan tinambakakên tāwak nireng wway manglêṇḍö, tarmolah irikang rahina wêngi. Katon
tāwak nira ngkāneng sawah de sang guru. Mojar bhagawān Dhomya ri sira, kinon ta ya
sirāwungwa. Yasmāt kewārakhaṇḍena varadanyepi sangṣṭhitaḥ, Tasmāt vavarika bhūtvā
dhārakaḥ munin aruniḥ. Anaku sang Āruṇika, atyanta ring dhāraka. Pawungwa tānaku. Sang
Addyayatu (?) ngarananta, apan manambakakên awakta ring awway, makanimitta bhaktimta
ring guru. Śreyo’vāsyanti yo siddhiḥ Astwanêmwa kita sukha, siddhimantrā wākbajrā kita.”
Nāhan ta pamarikṣa bhagawān Dhomya ri sang Āruṇika. Tumūt sang Utamanyu pinarikṣa
nira.Ya ta kinon ira mahwana ng lêmbu. Yatna tingkah nira n pahwan irikang goh. Hāraka
sang Utamanyu mahwan; ulih nirānasi ndatan pawwat nasi tasyan sira ri dang hyang guru.
Ojar ta sang guru:

,,Anaku sang Utamanyu. Krama ning śiṣya yan gurubhakti: mawwat nasi solih nirānasi krama
nikā. Svayam aśrayamakopajīvana Solihtānasi tan yogya bhuktinta.” Mangkana ling nira mpu
guru. Manêmbah ta sang Utamanyu, umupakṣamākên i śīla nira n salah. Irikang sakatambay
eñjing lumampah ta sirāhwan, sumêlang manasi muwah. Solih nirānasi ya ta pawwat nire
dang hyang guru. Huwus nirāwwat tasyan, manasi ta sira muwah, pinakopajīwa nirāhwan
ikang lêmbu. Katinghalan tānasi ping rwa, inuhutan ta sira de sang guru, apan lobha ngaran
ing mangkana. Ndatan panasi ping rwa pinakopajīwanā nira, ling ning guru. Dadi sira minum
irikang kṣīra tatúeûa ning lêmbw anusu. Tinakwanan ta sira hāraka nira dening guru, mājar
sira yar pamöh tatśeṣa ning lêmbw anusu. Ling sang guru: ”Udū, mangkin tan yogya
ulahteku, apan malap gurudṛwya. Tan dadi ring śiṣya mangan dṛwya ning guru.” Mangkana
ling nira mpu. Mari ta sira minum susu. Hana ta wêrêh ning watsa mêtu sangkeng tutuknya
yan panusu warêg sinuswan ing indungnya. Ya tika dinilat nira, pinakopajīwa
nirāngrakṣekang lêmbu. Muwah ta sira tinañan de dang ācārya guru ry āhāra nira, mājar sira
yan pangdilat i wêrêh ning watsa n tumibeng lêmah, pinakāhāra nira. Mājar ta sang guru: ”Ai
anaku sang Utamanyu, tan yogya ike āhāranta. Ikang watsa wruh ika ri lapāntānaku. Saka ri
wêlas ny ambêknye kita, hetunyāngutahakên ulihnyānusu. Tuhun yan wêrêh ngaranya, tan
dadi ng wwang kadi kita mangêpeki pangan ing watsa. Sangkṣepanya: manghorati bhukti
ning len ngaranya. Haywa pinakāhāra ikang tan yogya upajīwanā, apan agyang akuru ikang
watsa yan mangkana.” Nāhan ling nira mpu. Manêmbah ta sang Utamanyu. Ri sakatambay
eñjing mahwan ta sira muwah, tatan pamangan sira. Saka ri lapā nira, amangan ta sira gêtih i
rwan ing waduri. Ardhāpanas pwekā gêtih ing rwan ing waduri, sumök ta ya têkeng mata.
Andhībhūta, dadi ta sira wuta tan panon deśa; hàrohara ta sirāmet irikang lêmbu. Hana ta ya
sumur mati. Ngkāna ta sira n tibā kalêbw ing sumur, apan tan panon ing mārga nira. Sore
pwekang kāla, mulih tekang wṛśabha tan hanāngiring mare kandangnya. Ndatan katon sira
mulih de nira mpu, hārohara ta sirāmet i śiṣya nira. Irikang sakatambesuk inulaten de dang
hyang guru, kapanggih ta sireng jro sumur mati. Tinañan pwa sira kāraṇa ning kalêbw ing
sumur mati, mājar ta sang Utamanyu yan wuta, amangan gêtih ing waduri saka ri lapā nira n
inuhutan de dang hyang guru mangdilata wêrêh ning watsa. Saka ri kāruṇya bhagawān
Dhomya wineh ta sang Utamanyu mantra Aświnodewarājany uccāraṇākêna nira, matang yan
marya wuta. Apan sang hyang Aświno dewābhiṣak sira, pinakawalyan ing dewatā. An
panêmu wyādhi, niyata hetu ning swastha mary anghidêp lara ikang wwang bhakti ri sira.
Nāhan matang yan wineh Aúwinodewamantra de sang guru. Ndatan madwa sang hyang
mantra, datêng ta sang hyang Aświnodewa maweh anugraha tumpihangin kinonakên
wurungan wuta. Ya ta panganên ira pinakośadhā ni laranya, niyata warasa. Pinangan ira pwa
ya ta, Cakṣur arogyaṁ bhavati Muwah ta sira paripurna indra ning mata nira, tan hana
kawikāra ning akṣi wêkasan. Sukha ta bhagawān Dhomya tumon i sang Utamanyu.
Siddhiśāṣtrānugrahomi Manganugrahāni ta sira śāṣtra siddhi lawan ,,tatan kêneng tuhātah
rūpa ny anaku.” Nāhan ta ling bhagawān Dhomya manganugrahe sire. Tumūt sang Weda
pinarikṣa nira. Kinon ira tamolaheng padangan, kumawwatakêna tadah nira sari-sari. Sakha ri
bhakti nira sang Weda ring guru, tumūtaken ike panês tīs nira mpu dang hyang, yatna ri
sapakon ira, inanugrahan ta sira sarwawidyā saha wedamantra mwang kasarwajñānan,
muwah kasiddhyan ing mantra paweh nira. Ri huwus sang Weda kṛtānugraha, mulih ta sire
patapan ira. Wruh pwa sira duḥkha ning sewaka, mangênangên ta sira: “Yan hanā śiṣyangku
dlāha, wehêngku juga sang hyang mantra, haywa pinalakwan guruyāga nguniweh pamarīkṣa
ni guruśuśrūṣanya.” Mangkanāngên-angên ira. Tadanantara hana ta śiṣya nira hañar ḍatêng,
sang Uṭtangka nama nira. Tumuluy ya wineh sang hyang Weda tan pamalakwa guruyāga.
Salwir ning āgama têlas kahaji de sang Uttangka.