Lagu-Lagu par Puji Tuhan (Mazmur) 91:1-16

Edisi Uij-Coba
1. Sapa sa yang datang batado par Allah yang Paleng Tinggi
deng yang tinggal sama-sama deng Antua yang pung
Kuasa Paleng Basar tu,
2. dia nanti bilang par TUHAN kata, “TUHAN tu beta pung
tampa batado deng benteng. Antua tu Allah yang beta
somba deng yang beta parcaya.”
3. Memang batul! Antua tu yang nanti kasi lapas ale dari
dudeso yang tasambunyi deng dari panyaki yang bisa kasi
mati ale.
4. Antua nanti bungkus ale deng Antua pung sayap sampe ale
rasa aman, macang deng ana ayang yang basambunyi di
akang pung mai pung sayap.
Antua salalu jaga ale, macang deng salawaku deng pagar
tembok yang koliling ale.
5. Ale seng parlu taku bahaya yang datang waktu malang ka
apapa yang datang sarang ale waktu siang.
6. Ale seng parlu taku par cilaka yang datang tado-tado
dalang galap, ka hal-hal seng bae yang bisa kasi ancor ale
yang datang tenga hari.
7. Biar kata saribu orang mati di ale pung sabala kiri, ka
sapulu ribu orang putus napas di ale pung sabala kanang,
mar kamatiang seng sonto ale sadiki lai. Ale tetap bae-bae
sa.
8. Ale cuma parlu buka ale pung mata sa la lia bagemana
Allah hukum orang-orang jahat.
9. Barang, TUHAN tu ale pung tampa basambunyi deng ale su
biking Antua yang Paleng Tinggi tu jadi ale pung tampa
batado.
10. Hal-hal yang seng bae seng sonto ale deng cilaka seng
kana ale pung ruma sadiki lai.
11. Barang, Antua nanti parenta Antua pung malekat-malekat
par jaga ale kamana sa ale pi.
12. Dong nanti gendong ale biar ale pung kaki seng tatumbu di
batu.
13. Biar kata ale bajalang langgar singa deng ular babisa, mar
akang samua seng bisa kasi luka ale sadiki lai.
14. TUHAN bilang, “Tagal dia batul-batul sayang Beta, Beta
nanti kasi salamat dia. Beta nanti jaga dia, tagal dia batul-
batul parcaya Beta.”
15. Kalo dia basaro minta tolong dari Beta, Beta nanti dengar
dia. La waktu dia ada dalang masala, Beta nanti ada sama-
sama deng dia.
Beta nanti kasi salamat dia deng biking orang-orang taru
hormat par dia.
16. Beta nanti biking dia sanang tagal dia pung umur panjang
deng Beta nanti kasi unju par dia kalo Beta ni yang kasi
salamat dia.