LEGENDA BATU BIDE

Batu Bide adalah gaat tampat karamat da ani deket kampong Madi, Desa
Tiga Berkat, Kecamatan Lumar, Kabupaten Bengkayang.
Jaman da uro idu kai dangah sampe buut peristiwa ikoh. Bamole bit
kegiatan pesta rakyat ka kampong Madi, maan-maan sook kampok ikut acara
pesta tutup kampong ikoh. Mole bit kangot-kangot, ayo sadama, amba-amba
maan-maan ano ka pesta ikoh. Pamole ek pesta koh bajalat lancar,aman,lamus-
lamus, pokok ek ti ani jai-jai lah, penikmat pesta sampe soke ge ripo-ripo. Namun
ani hal da kurang lamus , ani ayo da abok-abok, da banene kati lamus lalu ayo
nyam koh menghina kangot da ti ba sindo da ti ba pangama hut ani ba amba sadi.
Penikmat pesta da sombong ge da abok-abok koh mungkus kaba pangkuman
nyamge turak-turak laok da riak ni mangkat ket sakangot da ti ba pangama ijah
lakakoh ayo nyam ngolok-ngolok kangot koh.
Kangot koh lalu ure ket ramin sambil nyam munse-munse, lalu Amba
koh nyangke , kat jai Muk munse? Lalu kangot koh nyaut “ kit ni ayo kampong
ngolok-ngolok lalu ni mangkat kaba-kaba pangkuman ge turak da sampe riak”,
Dangah koh Amba ek baji lalu banene “ jana nyam ayo kampong koh”. Amba koh
lalu naap meong lakakoh ni nyam mung ge rari da ba warna-warni deket ungke ge
janggut meong koh, nyam muji ge kangot nayu ngampasat deket ayo da sedang
pesta koh. Ano lah kangot koh ket tampat ayo da pesta ijah, ni ngampasat lah
meong koh deket ayo-ayo da rame, lalu ayo-ayo da deket pesta ikoh ti madi-madi
guluk ngalukat meong da ni ngampasat koh jah. Ti ni pane utuklah bencana ket
kampong (Madi) ikoh , angin kuat, pate guntur ge kilat, ujat durus lalu aba aso
ngantam kampong ikoh. Tiba-tiba ani da jadi patong, ani ga da jadi batu.
Sampe tuliah tampat koh maseh ani da bisa te mile, patong ge batu lalu di
ayo magaat Batu Bide. Tampat koh pun sampe tuliah maseh karamat, idu ani
pangurus kampong da biasa ni ayo muji Pak Banua, iyam ani mencoba matat
patong da ani deket batu bide ket sadat pait. Lantaran Pak Banua matat patong
koh karena nyam nga balajar ilmu agama deket Singapura, nyam nganggap patong
koh samu ge nyembah berhala lalu nyam muji ti pake ga. Pas patong koh laka ni
nangulup ket pait, ani suara ayo munse tapi Pak Banua ti pasaya sando patong koh
da munse. Tiap ngarum patong koh munse sadi –sadi biarpun nga ni nyambayang.
Lalu pas waktu Pak Banua bus inyam pimha patong koh banene ge nyam lalu
patong koh muji”jai kai ni matat deket pait, jai sara kai. Sando kup kati ngatat kai
bit pait, nyawa ikup ge kaluarga kup jadi korban”. Dangah patong koh banene
pang ikoh lalu buut lah Pak Banua meskipun patongkoh banene naru pimha.
Karena buut ge patong jah Pak Banua pun nurut jai nene patong ek lalu
iyam ngatat patong bit sadat pait lalu mangkure pantung deket tampat asal ek pake
acara adat kampong. Sampe tuliah Batu Bide tampat da karamat, ti bisa ni ayo
moto nyamge ti boleh ni ngaso.