Ngiring ngangge bahasa bali sadina-dina

Panglimbak aab jagate kadi mangkin sing sajan iraga nyidang nambakin. Arus globalisasi,
makejang patut bisa mabasa asing (inggris, jepang, korea, china, itali, msl.), patut masih bisa
mengoprasikan komputer lan piranti elektronik lianan, patut bisa nganggon smartphone, miwah
ane lianan. Makejang tatujone tuah apang iraga bisa nuutin jaman, turmaning nenten kaucap
katinggalan jaman. Men napi pengaruhne ring basa Bali?, nenten ja tios wantah arus jaman
globalisasi pacang nyosodang budaya lokal ring genah soang-soang. Kadi iraga ring Bali,
nyansan kirang para janane mareraosan nganggen basa Bali ring desa muah kota. Akehan para
janane saking alit sampun kaurukang mabasa Indonesia lan mabasa Inggris. Buin pidan apang
tusing ketinggalan panake malajah di sekolah, kenten pamineh para janane. Kadi puniki
pamargine, akeh lantas wenten para akademisi miwah praktisi lan tokoh masyarakat ring Bali
ngawentenang seminar, lokakarya, miwah pidabdab tiosan jagi kanggen genah ngalestariang basa
Bali. Napi malih wenten bebaosan "Ajeg Bali", ngajegang basa Bali pinaka basa Ibu ring
masyarakat suku Bali, akeh lantas sami ngalimbakang ring para jana Baline mangda tetep
nganggen basa Bali pinaka basa mareraosan sareng kulawarga, utaminnyane para alit-alit,
mangda nenten punah basa Balin duene.

Kusuen-suen sayan ngidikang sané nganggén basa bali. Tios pisan kadi dumun basa Bali
kantun pinaka basa utama ring sakancan bebaosan. Arang pisan anom anoman kapiragi matur
nganggen basa Bali. Punika mawinan iraga sareng sami ngutsahayang ngawerdhiang lan
ngelestariang basa baline. Anom-anomé mangda prasida dados prati sentana lestarinya basa bali
punika, mangda sampunang ja basa bali druwene sane sampun dados asset nasional sirna.
Ngiring ngawit saking iraga, kaluarga, lan karma adat mangda nganggen basa bali ritatkala
mabebaosan sedina dina, dumogi prasida ngiyusin semoton lianan. Sampunang ngantos wenten
silih tunggil sane elek mebebaosan nganggen basa bali.

Acara sekadi mangkin inggih sinalih tunggil acara sane kaanggen nguningang iraga para janane
mangda nglimbakang basa bali punika sane kautamayang ring mabebaosan sadina-dina. Yening
suluhin malih, rikala nincapang basa bali utawi budaya baline sane mangkin, iraga pacang
ngamolihang ajah-ajahan sane manut ring agama punika sane kaanggen nincapang kualitas diri
iraga saantukan dados para deha truna. Mangdaning nyiptayang parilaksana para jana sane anut
ring sesana. Asapunika wantah peranan para yowanane indik nglestariang budaya baline. Sinalih
tunggil kawagedan mabasa Bali inggih punika mabaos. Kawagedan mabaos sajeroning
paplajahan basa Bali mateges maderbe kaweruhan miwah kawagedan ngawedar ida utawi daging
pikayunan nganggen basa bali sane becik miwah patut. Becik mateges nganggen pilihan kruna-
kruna sane lengut tur prasida nudut kayun sang sane mirengang. Patut, mateges mungguing
kruna-kruna sane kanggen sajeroning pidarta punika manut grnahnyane nganutin tata anggah
ungguhing kruna basa bali.

Sane dados contoh ring pagubugan Baline : Basa bali punika madue undag-undagan basa
inggih punika alus singgih (ASI), alus madia (AMA), lan sane kaping tiga Alus Sor (Aso). Alus
singgih inggih punika basa sane patut kaanggiang ring sang sane kasinggihang utawi ring sang
sane durung kauningin, alus madia inggih punika basa bali tengahan sane kaanggen rikala
mabebaosan ring sang sane sampun kauningin nanging pasawitranyane nenten luket pisan. Alus
sor inggih punika basa sane kaanggen ngandapang raga rikalaning maatur ring sang wangsa sane
tegehan utawi matur ring pejabat sane kasinggihan. Undag-undagan basa punika sujatine
madaging indik budaya sane nyihnayang iraga patut menghormati sang sane durung kauningin
miwah membedakan wangsa ring pagubugan baline melarapan antuk ngangge basa alus puniki.
Suksmanipun, iraga jagat Baline akeh pisan madue seni budaya, sane luihin utama kabaos
adiluhung, ngawinang akeh parajanane saking dura Negara meled pisan manah ipun ngantenang
seni budaya druene, sakewanten iraga sane magenah ring Bali nenten pati rungu kapining budaya
druene, mangda nenten kadi asapunika. Basa Baline silih tunggil pinaka pangeling iraga dados
jatma Bali, punika sane mawinang iraga mangda tetep ngangge basa Bali rikalaning mabaos
sajeroning pagububan utawi pasawitran. Yening iraga nenten ngangge basa Bali druene sinah
kesujatian iraga dados jatma Bali ical utawi ilang Nenten ja ring dunia nyata kemanten pamargi
palestarian basa Bali punika kalimbakang. Kadi mangkin, aab mainternetan, ring media sosial
akeh group utawi akun-akun sane matetujon ngalestariang basa Bali, ring blogger, wordpress,
facebook, twitter, path, instagram, whatsaap, BBM, msl. Tatujone wantah, ngalestariang lan
ngalimbakang basa Bali ring media sosial mangda krama Baline ngancan waged mabasa Bali lan
nenten kemad mareraosan ring sosial media nganggen basa Bali. Yen kadi asapunika
kawentenane, wantah ja ngajegang basa Bali tuah ring raos kemanten. Nenten wenten bukti
nyata lan kekonsistenannyane. Ajeg Bali, ngajegang basa Baline tuah raos lan parilaksana kadi
"Kenyang Panyuh". Panyumune kenceng, ngancan makelo ngancan makeledan. Yen sampun
asapunika, pet prade basa Baline punah, nyen kar pelihang?! Iraga nak Bali ne pelih, ulian iraga
sing rungu ken basa daerah padidi.

Ngenenin indike punika, mawanti2 malih titiang ring para krama Baline, mangda tetep
ngalestariang basa Bali pinaka basa ibu, basa sane kanggen mabebaosan sareng kulawarga lan
sameton Bali, sampunang lek malajah yen ten bisa. Ala bisa karna biasa. Punika mawinan iraga
mangda teleb ngeresepang daging-daging sastra, pageh tan obah. Ida dané sareng sami sané
kusumayang titian, wantah asapunika prasida aturang titiang ring galahe sane mangkin, ngiring
sareng sami ngawit mangkin tunggilang kayuné ring sajeroning ngawerdiang pingkalih
nglimbakang basa Bali druéné, kandugi prasida kapanggih napi sané kaptiang i raga sareng sami.
Pradé wénten ring sajeroning atur titiang nenten manut ring kayun, lugrayang titiang nunas geng
rena sinampura.