AKSARA, BASA, LAN SASTRA

AKAH BUDAYA BALI

Om Swastyastu
Bapak Dosen sane wangiang titiang. Taler para sameton sinamian sane tresna sihin
titiang. Rasa pangayubagia aturang titiang ring Ida Sang Hyang Parama Kawi, riantuk
sangkaning sih pasuecan-Ida, iraga sareng sami prasida mapadu wedana sakadi mangkin.
Malarapan pangastuti Om Awignamastu, titiang jagi midartayang ‘’Aksara, Basa, lan Sastra
Akah Budaya Bali’’.
Maosang indik kabudayan Bali nenten dados pasahang ring panglimbak basa Baline.
Patut kaangkenin, basa Bali pinaka wadah miwah wahana kabudayan Baline. Yening basa
Baline rered manggen ring desa pakraman, majanten taler kabudayan Baline pacang rered,
mawastu kasuen-suen pacang padem. Punika mawinan basa lan sastra Baline patut kaplajahin
tur katelebin mangda tetep rajeg ring Bali. Kaptiang pisan mangda parajana Baline miwah
para yowanane pageh mikukuhin kajegan aksara, basa, miwah sastra Baline. Yening sampun
asapunika pemargine, majanten kawentenan basa, aksara, lan sastra Baline sayan werdhi,
mawastu pacang sida ngrajegang budaya Balinne pinaka dasar ngrajegang budaya nasional.
Ida dane sareng sami sane wangiang titiang. Yening karingkes atur titiange iwawu,
wantah basa, aksara, miwah sastra Bali marupa pahan budaya Baline. Basa Bali marupa
wadah utawi wahana kabudayan Bali. Basa taler pinaka srana utawi piranti ngwangun
kasusastraan Bali. Punika mawinan kabaosang, mungguing aksara, basa, lan sastra Bali
pinaka akah budaya Baline.
Inggih Ida dane sinamian sane wangiang titiang, wantah kadi asapunika atur pidartan
titiang, mogi-mogi wenten pikenohipun. Manawi wenten atur titiang sane nenten manut ring
arsa, titiang nunas geng rena sinampura. Puputang titiang antuk parama santih.
Om Santih, Santih, Santih, Om.