Luh Ayu Manik Mas, Tresna ring Alas

Suud ujian tengah seméster, Luh Ayu Manik lan timpal-timpalné kémah di panepi
siring. Disubané ngejang pangganggo lan bekelné, murid-muridé malaib ka sisin
pasihé. Pada girang maplalianan bias lan ombak. Luh Ayu Manik nundén timpal-
timpalné apang tusing bas ka tengah macanda krana anginné baret tur ombaké
gedé. Langité gulem, cihna lakar ujan. Ia ngaukin timpal-timpalné apang suud
manjus tur ngetis ka wantilan.

Neked di wantilan, ujané ulung mabriok. Krébék kerug tan pegatan makuwug ring
langité. Tinglis tingalina akah apiné matemu yéh pasihé. Luh Putu Suastini ngejer
ningehang kerugan krébéké. Inget tekén pajalan bapané ané ngemasin mati
sander krébék dugas nandur di cariké. Luh Ayu Manik nupdupang timpalné apang
tusing ngejer lan jejeh. Mirib di gunungé kaja ujané bales, yéh di benané putek.
Liu punyan kayuné anyudang blabar. Iseng Luh Ayu Manik malinin Instagram-né.
Ada orti blabar agung, kreteg pegat tomplok yéh

Sedih kenehné Luh Ayu Manik krana blabar agung nguwugang kreteg. Sinah
kramané kéweh luas kemu mai krana tusing ada mambaan entasin. Tingalina di
Instragramné, punyan-punyanan kayuné nylekak di tukadé. Punyan-punyananné
ento makalukan ajak leluuné. Mirib alas gunungé kagalgal kanggén padukuhan
muah abian. Punyan kayu ané kagalgal anyudang blabar ané makrana kretegé di
tebén uwug tomplok kayu. Luh Ayu Manik nyritaang unduké ento tekéning
timpaltimpalné.

Murid-murid kelas dua SMP ento cumpu lakar nandur entik-entikan, cepaka,
bunut, lamtoro lan tiosan. Tetujoné apang alasé bet. Disubané maan duman
raport, Luh Ayu Manik munduhang timpal-timpalné ané cumpu nandur entik-
entikan ka alasé. Makejang timpalné suba sregep. Suba sayaga makudang-kudang
entik-entikan lakar tandur ka alasé. Makejang cumpu galah buin mani lakar
menék gunung. Timpal-timpalné ané muani ada ngaba sekrop, ngaba tambah, ada
masih ngaba panyong. Timpalné ané luh magréndotan ngaba entik-entikan.
Ngilangang kenyelné, murid-muridé gendang gending menék gunung. Anginné
nyirsir dingin nlusup tulang. Jalan ané entasin belig, makejang ajak tragia, tusing
bani macanda. Ngeléng utawi ngléwa bisa makada labuh. Demen murid-muridé
ningalin dusuné. Uling ba duwur tinglis tingalina umah kramané di padukuhan.
Pasihé masih ngenah uling di bongkol gunungé. Di sisin alasé enu bet, kedisé
nguci sahasa ngaturang panganjali 8 tekén murid-muridé ané teka lakar nandur
taru. Neked di tengah alasé, makejang ajak tangkejut. Alasé gundul. Uling di sisi
ngenah bet nanging di tengah alasé benyah.

Tusing ada punyan kayu tileh, sajaba enu bongkolné dogén. Mirib duratmaka
ngamaling punyan-punyanan kayuné. Luh Ayu Manik sedih, yadiastun ada pos
polisi hutan nanging duratmakané nyidaang ngamaling. Apa polisi hutané kalah
macadeng ajak i duratmaka. Apa mapi-mapi buta bongol ada maling ngalgal alas.
Dot ia nyambatang unduké ento tekén uané ané dadi polisi hutan. Timpalné
masih tepukina sedih ningalin alasé usak. Luh Ayu Manik lantas ngajakin timpal-
timpalné nandur taruné. Makejang sregep magaé. Disubané makejang katanem
mara lantas marérén sambilanga ngagah bekelné soang-soang

Makejang égar. Makejang pada jaen nginyukang nasi bekelné. Sambilanga

madaar, Luh Ayu Manik ngajakin timpal-timpalné apang sawai menék gunung.
Tatujoné nyiamin tetanduranné ané wawu kapula apang mentik. Apang tusing
cara pejabaté, tuah bisa nanem punyan kayu nanging tuara ikun nyiamin disubané
suud matanduran. Eda nempa pejabat ané nanem entik-entikan anggon
pencitraan

apang ngenah tresna lan sutindih tekéning pertiwi. Nanging apang saja sutindih
lan bakti, pamulan ané katanem mentik mokoh. Makejang cumpu tur masemaya
lakar buin menék gunung nyiamin entik-entikanné.

Neked jumah Luh Ayu Manik mulisah. Marawat-rawat alasé benyah. Tusing
kapineh unduk alasé kagalgal. Apabuin ané kagalgal hutan lindung. Polisi hutanné
kija? Tusing ada polisi ngijengin posé. Uling nyumunin mamula kayu kanti majalan
mulih tusing ada polisi hutan majlawatan. Pemerintah masih ngelah Polisi Pamong
Praja, singké ada patroli kemu? Ada kenehné nylibsib ka alasé. Ia dot nawang
kasujatian ané ngalgal alasé. Yén suba tawang gelis laporang ka polisi apang
polisiné ada bukti ngejuk malingé.

Luh Ayu Manik ngalih Luh Putu Suastini ajaka menék gunung. Makejang paturu
ngaba émbér. Ring salantang jalan, Luh Putu Suastini setata ijeg motrékin jagaté.
Ia masih seleg selfie. Cekrak cekrék dogén gaéné. Makejang fotoné lantas
kapasang di Instagram. Liu timpalné ngemaang lambang jantung cihna milu
demen. Liu ané nakonang tongosné mapotrék. Genahé kaucap asri.
Nyumangkinang seleg ia masélfian. signal jelék, ento ngranaang bateré HPné
soak.

Neked di sisin alasé, tanglus pesan dingeha munyin gergaji mesinné kraung-
kraung. Luh Ayu Manik lan Luh Putu Suastini tangkejut ningehang. Pastika suba
ada jatma corah ngebah punyan kayu di tengah alasé. Ipun makadadua lantas
majalan adéng-adéng ngalihin tongos anak ngebah punyan kayu. Uling di selagan
punyan kayuné gedé, murid SMPné ento ngintipin. Tinglis tingalina anak muani
ajak dadua ngebah punyan kayuné nganggon gergaji mesin. Luh Ayu Manik
nyeluk kantongé lakar nyemak HP. Ulian sépan-sépan majalan menék gunung
HPné kecag jumah. Ia lantas nyilih HPné Luh Putu Suastini.

Di kantor polisi, Luh Ayu Manik lan Luh Putu Suastini nuturang jejaeg lan goban
anaké ané ngalgal alas. Nanging polisiné tusing ngugu, tur nyambatang ngemauk
ento dosa. Sing dadi ngemauk. Apabuin nyambatang ada anak ngamaling kayu di
alasé. Petugas polisiné nyambatang pembalakan liar nglawan hukum. Nyén ja
ketara ngamaling kayu di alasé majuk tur mabui. Kadi ngémpélin raos petugas

polisiné resepanga tekén Luh Ayu Manik. Yén ketara majuk tur mabui, yén sing
ketara sinah malingé sakita-kita ngalgal alas. Singké polisiné mautsaha nuréksain
tur nyelidikin apabuin ada kramané nglaporang.