Yang Harus Baru Di Taong Baru

Taong Baru
Spatu Baru
Kaoskaki Baru
Calana Baru
Kameja Baru
Rim Baru
Topi Baru
Bando Baru
Anting Baru
Jam Baru
Hidup ?

Yang Seharusnya Baru Jadi Biru

Yang Seng Harus Baru Katong Buru
Baru-Buru Masu Taong Baru
Sampe Musti Bakutaru

Bakumanggurebe Tunju Barang

Bakuambe Sampe Arang
Bakujaga Biar Jang Ilang
Satu Angka Slak Laeng Seng Palang
Sapa Pasang Palang Dia Dapa Tandang
Hari Ini Musti Tetangga Mental Bagoyang
Mangkali Itu Yang Masih Jadi Bayang

Taong Baru
Mainan Baru
Hp Baru
Pulsa Baru
Game Baru
Aplikasi Baru
Speaker Baru
Recorder Baru
Motor Baru
Mobil Baru
Hidup ?

Yang Seharusnya Baru Katong Lupa

Yang Seng Harus Baru Katong Musti Dapa
Biking Akang Macam Dupa
Lalu Katong Puja-Puja

Kalo Dolo-Dolo Perayaan Adalah Pesan

Dar Mulu Ka Mulu Deng Tangan Ka Tangan
Sakarang Manusia Lebih Suka Bicara Deng Angan
Ale Sapa Beta Sapa
Sapa Ada Pung Apa-Apa Dia Jadi Sapa-Sapa
Sapa Yang Bukang Sapa-Sapa Dia Seng Dapa Apa-Apa
Ketulusan Su Mulai Tumpul
 Kemurahan Su Mulai Rata
Yang Tinggal Cuma Carita Lama

Taong Baru
Badak Baru
Lipstik Baru
Aeshedo Baru
Pomade Baru
Gaya Baru
Stile Baru
Rambut Baru
Ini Baru
Itu Baru
Hidup ?

Yang Seharusnya Baru Katong Lapas

Yang Seng Harus Baru Katong Kupas
Hasrat Su Biking Alas
Damai Su Seng Klas

Katong Bakabas Karna Rasa Pantas

Katong Balaga Karna Katong Di Atas
Mau Sampe Kapan Simpang Peduli Dalam Kas ?
Jaman Memang Su Beda
Bukang Berarti Katong Iko-Iko Saja
Prinsip Firman Tuhan
Harusnya Jadi Patokan

Resolusi Memang Bukang Solusi

Tapi Itu Bisa Jadi Konklusi
Par Ale Deng Deng Beta Seng Salah Biking Aksi
Di Hari Nanti

Hidup Orang Basudara

Jang Cuma Di Bicara
Kalo Hari Ini Ada Yang Bakumarah
Mari Balajar Buang Suara

Tamang eee
Tuhan Su Mati Par Ale Deng Beta
Mangapa Katong Seng Mau Kasmati Manusia Lama Par Antua ?
Harta Yang Katong Punya Di Dunia
Seng Akang Katong Bawa Ka Sorga
Jang Simpang-Simpang
Kalo Ale Bisa Jadi Berkat Par Samua Orang

Taong Baru
Hati Musti Baru
Hidup Jua Baru