ADALAH

(Suara Hati Allah)

Sodara, ale tahu sabuah carita

Ini tentang ale deng beta
Tentang Antua pung cinta
Yang seng akan pernah ilang sampe dunia tutup mata

Sebelum angkasa tercipta

Di bayang-bayang Bapa
Antua mau siapkan satu buah tampa
Supaya samua hal indah ada
Dan yang paling utama
Adalah ale deng beta

Katong adalah tenunan yang dikerjakan langsung oleh Allah

Dengan benang-benang kasih Antua bentuk dari rahim mama
Karja-karja deng pono cinta
Antua biking ale deng beta, mirim macam antua, seng ada sisah
Biar dapalia beda, mar tetap satu jua

Katong adalah antua pung biji mata

Dimana antua pake par lia kebenaran
Kenyataan dalam dunia katong saksikan
Ketidakadilan katong pertimbangkan
lalu katong biking pilihan
Kalu batul bilang batul, kalu salah bilang salah
Karna seng ada yang tasambunyi di mata Allah

Katong adalah Antua pung talinga

Yang antua pake par dengar ratapan dunia
Dengar Tangis seorang anak kacil
Keluhan pengemis dan gelandangan di mata-mata jalang
Di bawa jembatan penyebrangan
Di keriuan kota-kota basar atau kebisuan kampong-kampong tatinggal
Simak bae-bae
Ada banyak seruan dalam doa-doa yang merindukan kesejahteraan
Katong adalah Antua pung buah bibir
Yang antua pake par sampaikan firman dan sukacita
Kasih penghiburan par sodara yang berduka
Kasih penguatan par tamang yang alami kekalahan
Bukang par bakuhujat, bakukata, bakukasalah, bakumaki, bakukasjatuh
Ale pung lidah itu api
Akang bisa jadi tarang yang memberkati
Atau galap yang bakar diri
Jang salah pilih

Katong adalah antua pung tangan

Yang antua pake par jadi sanjungan bukang sandungan
Antua pake par melayani sesama
Ale bisa bage kalu ada pung labe

Katong adalah antua pung kaki

Yang antua mau sakali katong iko antua sampe mati
Biar jatuh ulang-ulang kali, jang pernah barenti

Katong adalah antua pung isi hati

Antua pung kekasih
Dimana antua tanam cinta lebe dari
Antua mau katong merasai
Jang kaskaras hati macam batu kali
Ale seng akan kehilangan ketika ale memberi

Ini hanya refleksi

Supaya natal taong ini bukan sekedar moment
Tapi juga komitmen
Supaya natal taong ini
Ale deng beta mau jadi serupa macam Kristus