SAMBRAMA WACANA BAPAK KEPALA SMKN 1 SUKASADA

SAJERONING PAMUNGKAH BULAN BAHASA BALI WARSA 2023

Matur suksma majeng ring pangenter acara. Sadurung nglantur ngiring sareng-sareng
ngastiti bhakti majeng ring Ida Sang Hyang Widhi Wasa, Nunas ica mangda iraga sareng
sami ngamolihang kerahayuan taler prasida mamargi antar sekancan pamargi acara rahinane
mangkin. Kawitin titiang antuk ngaturang panganjali,

Om Swastiastu,
Assalamualaikum Warahmatullahi Wabarakatu,
Shalom,
Namo Buddhaya,
Salam Sejahtera Bagi Kita Semua,
Rahayu.

 Bapak/Ibu waka sane wangiang titiang,

 Ibu analis SDM sane wangiang titiang,
 Bapak/Ibu guru lan pegawai sane wangiang titiang,
 Punika taler para pamilet wimbakara lan samian sisya SMK Negeri 1 Sukasada
sane tresnasihin bapak.

Angayubagia aturang titiang majeng ring Ida Sang Hyang Widhi Wasa, duaning
sangkaning asung kertha waranugraha Ida, titiang miwah ida dane prasida mapupul ring
genahe puniki. Gargita pisan manah titiang prasida masadu ajeng ring galahe sane becik
puniki sajeroning pacang nglaksanayang Wimbakara Bulan Bahasa Bali warsa 2023 (duang
tali telu likur) SMK Negeri 1 Sukasada.

Ida dane sareng sami sane mustikayang titiang,

Parikrama Bulan Bahasa Bali puniki pinaka silih sinunggil program pemerintah
provinsi Bali sane kalaksanayang nyabran awarsa inggih punika ring bulan Februari. Ngawit
warsa kalih tali plekutus (2018) sampun kamedalang Pergub. Bali nomor 80 tahun 2018 indik
Perlindungan dan Penggunaan Bahasa, Aksara lan Sastra Bali taler Penyelenggaraan Bulan
Bahasa Bali. Malarapan antuk Pergub punika samian sekolah taler Desa Pakraman ring
sajebag Bali patut nglaksanayang Bulan Bahasa Bali puniki. Kawentenane punika matetujon
mangda iraga dados krama Bali sayan urati indik kawentenan Basa, Aksara lan Sastra Bali,
utaminnyane majeng ring para yowana Bali. Yening selehin ring kawentenan jagate sekadi
mangkin, akeh para yowana Bali sane nenten midep mabasa Bali, kantun buta sajeroning
ngwacen aksara Bali taler kantun kirang pisan uratiane indik sastra Bali. Yowana Bali pinaka
generasi penerus sane dados ujung tombak sajeroning nyaga lan nglestariang kawentenan
Basa, Aksara lan Sastra Bali punika. Napi malih Bali pinaka daerah sane kaloktah antuk
kaluihan budaya sane kadruenang, yening nirgamayang Budaya punika satmaka taru utawi
pohon, Basa taler Aksara lan Sastra Bali punika pinaka akah nyane. Yening akah druene
sampun rusak pastika sampun taru punika kasuen-suen pacang padem. Punika mawinan
ngiring sareng-sareng sikiang kayune iraga dados krama Bali mautsaha nyaga kawentenan
Basa, Aksara lan Sastra Bali punika mangda tetep ajeg lan lestari nyantos kapungkur wekas.
Malarapan antuk Bulan Bahasa Bali puniki dumogi prasida nudut kayun ida dane sareng sami
pamekas para sisya SMK Negeri 1 Sukasada mangda sayan urati indik kawentenan basa
Baline. Sampunang madue manah kimud ritatkala mabebaosan nganggen basa Bali.

Ida dane sareng sami sane wangiang titiang,

Kawentenan Bulan Basa Bali warsa duang tali telu likur puniki ngambil unteng/tema
”Segara Kerthi; Campuhan Urip Sarwa Prani”, Sane maartos Bulan Bahasa Bali pinaka
jalaran sajeroning pemuliaan Bahasa, Aksara, miwah Sastra Bali antuk nyelehin Segara utawi
laut pinaka pangawit lan pamuput kawentenan samian sarwa maurip iriki ring jagate (Bulan
Bahasa Bali sebagai altar pemuliaan Bahasa, Aksara, dan Sastra Bali untuk memaknai Laut
sebagai awal dan akhir kehidupan segenap makhluk). Malarapan antuk pamargi Bulan
Bahasa Bali puniki sane ngawentenang wimbakara Baligrafi lan Karaoke Tembang Bali
puniki taler pinaka jalaran majeng ring para sisya mangda sayan kreatif sajeroning nincapang
kaweruhan soang-soang sane mapaiketan sareng basa, aksara lan sastra Bali. Baligrafi punika
mapaiketan sareng aksara Bali mabuat pisan sajeroning nincapang kaweruhan seni lan
kreatifitas para sisya. Nembangang tembang Bali pinaka jalaran para yowana sami sajeroning
nyaga lan nglestariang kawentenan basa Bali. Ngiring para sisya sareng sami mangda nenten
surud-surud antuk nincapang kaweruhane soang-soang.

Bapak/Ibu guru lan pegawai taler para sisya sareng sami sane tresna sihin titiang,

Titiang pinaka pimpinan dahat ngaptiang kawentenan sekolah puniki mangda sayan
nincap prestasi sane kadruenang pamekas ring wewidangan kabupaten, provinsi taler
nasional. Parikrama sekadi puniki dahat mabuat pisan pinaka ajang penjaringan sisya-sisya
sane madue kaweruhan utaminnyane ring bidang seni. Parikrama sekadi puniki patut pisan
rutin kalaksanayang. Sapunapi je antuk mangda sekolah puniki pacang prasida dados sekolah
unggul, kreatif lan berkarakter taler sayan kaloktah ring wewidangan kabupaten, provinsi
taler nasional. Ngiring sikiang kayune, sareng-sareng mautsaha mangda napi sane dados
pangaptin iraga sareng sami prasida kapolihang.

Ida dane sareng sami sane tresna sihin titiang,

Ring galahe puniki taler titiang ngaturang suksma banget majeng ring ida dane sareng
sami sampun ledang rauh nyarengin pamargi acara puniki. Dumogi parikrama wimbakara
sajeroning Bulan Bahasa Bali warsa 2023 sane jagi kalaksanayang malih jebos prasida
mamargi antar tur sidhaning don. Lianan ring acara lomba taler malih jebos pacang akeh
wenten acara hiburan sane prasida kasaksiang pastika pacang prasida menghibur ida dane
sareng sami sane rauh iriki. Kaping untat, Malarapan antuk asung kertha waranugraha Ida
Sang Hyang Parama Wisesa, titiang pinaka Kepala SMK Negeri 1 Sukasada mamungkah
acara Wimbakara Bulan Bahasa Bali warsa duang tali telu likur SMK Negeri 1 Sukasada.

Om Awighnamastu Nama Siddham,

Inggih ida dane sareng sami, wantah asapunika sane prasida aturang titiang, nenten
lali titiang ngaturang geng rna pangampura pet prade wenten iwang atur titiang iwau,
Puputang titiang antuk ngaturang paramasantih,

Om Santih Santih Santih Om