Naskah Teks Pementasan Palang Pintu

IRMA An-Nasyath 2023

 Teks Pantun Palang Pintu IRMA An-Nasyath

Permohonan izin pihak calon pengantin pria masuk kediaman pihak calon pengantin
wanita

Eh … bang-bang berenti, bang …. pade budeg ape luh

Kayu gelondongan kayu cendana

Anak Belanda mati di tangsi

Nih rombongan darimana mau kemana

Lewat sini kudu permisi

Oh… jadi lewat kampung sini kudu permisi, bang.

Iye emangnye lu kate nih tegalan.

Maapin aye bang, kalo kedatangan aye ama rombongan kage berkenan di ati sudare-
sudare…Sebelomnye aye pengen ucapin dulu nih Bang…Assalamu’ alaikum

Alaikum salam…

Begini bang…makan sekuteng di Pasar Jum’at

Mampir dulu di Kramat Jati

Aye dateng ama rombongan dengan segala hormat

Mohon diterime dengan senang hati.

Liat di atas si burung nuri

Terbang tinggi ama kawannya

Kalo emang bang [nama casiba laki-laki] udah niat dateng kemari
Saya kepengen tau apa tujuannya
Oh… jadi Abang pengen tau ape hajatnya…emang Abang kaga di kasih tau ama tuan
rumahnya…
Bang, ade siang ade malem
Ade bulan ade matahari
Kalo bukan lantaran neng [Nama casiba perempuan] yang di dalem
Kaga bakalan nih laki gue anterin ke mari.

Kagak salah abang tanem ari ari

Tapi sayang udah kagak ada lampunya

Kagak salah abang [nama casiba laki-laki] dateng kemari

Tapi sayang neng [nama casiba perempuan] udah ada yang punya

Oh jadi neng [nama casiba perempuan] udeh ade yang punye..

Bang yang di cinta cuman satu satunya

Sampe di mana tetep dia belain

Biar kata neng [nama casiba perempuan] udah ada yang punya
Sampe mati tetep dia jadiin
Pengajuan syarat dari pihak calon pengantin wanita kepada pihak calon pengantin pria

Waduh bang, Mendingan abang pegi ke Cikini

Daripada ke senayan

Mendingan abang pegi dari tempat ini

Daripada maksudnya kagak kesampean

Menurut Abang, keliatannya aye bakal nyerah aje gitu bang?

Ibarat baju udah kepalang basah

Masak nasi udah jadi bubur

Biar kata saya mati bekalang tanah

Setapak kagak bakalan saya mundur

Laen dulu laen sekarang

Cari orang cari mantu

Pasang kuping biar terang

Adepin dulu saya punya palang pintu

Oh… jadi kalo mao dapet [Nama casiba perempuan] saratnye kudu bekelai dulu Bang…?

Iye … kalo lu takut, lu pulang…

Jawara saling menunjukkan jurus

Takut? Ya kagak lah bang

Awan putih adanya di atas

Awan item nongolnya waktu ujan

Abang punya jawara papan atas

Yang siap adepin palang pintu neng [nama casiba perempuan] di depan

Bintang bekulit seawan awan

Gak keliatan karena tempatnya di hulu

Nih kenalin bang [jawara pihak perempuan] sang jagoan

Siap adepin jawara abang atu atu

Si pitung Rawa belong

Terbangnye tinggi kaya kalong batu

Si pitung gak takut lawan elu sampe bolong

Paling serepan nyawa elu tinggal atu

Buah kelape di pu’un ade delapan

Dipetik kudu pake galah
Ayo kite bekelai di depan

Siape tau ade yang langsung kalah

Ayok, lah

/berantem
Pihak calon pengantin wanita minta dibawakan sike

Gimane Bang…rase-rasenye jagoan Abang udeh pade rontok semua nih…

Ape aye ame rombongan udah boleh masuk?…ape masih ade saratnye lagi Bang?…

Ntar dulu Bang, enak aje… pan lu tau…

Buah delima dikupas kupasin

Jambu mede dipinggir rawa

Syarat pertama udah dipenuin

Tapi masih ada syarat kedua

Sebutin dah bang jangan lame-lame

Tukang lakse dagangnye malem

Jalannya muter ke pasar kranji

Gue minta elu jangan cume bise berantem

Tapi gue pengen denger lu bise ngaji

Kalo mao gelap tandanya bedug magrib kudu dipukul

Artinya kita orang kudu masuk rumah gini hari
Saye emang orang betawi bukan cuman jago pukul

Tapi aye bise juga ngaji

Orang idup pasti diuji

Sembayang lima waktu kudu taatin

Kalo abang emang bisa ngaji

Lagu sikeh saya minta ditarikin

Tumbuk ketan jadinye uli

Ulinye juge kudu ditapein
Betaun-taun anak kampung gue pade bisa ngaji

Lagu yang Abang minta aye bawain

(baca sikeh)

***
Gimane Bang… soal berantem aye udah ladenin, soal ngaji abang udah dengerin

Ape aye ame rombongan udah boleh masuk, ape masih ade saratnye lagi, Banh?
Pihak calon pengantin wanita memberi izin pihak calon pengantin pria masuk
kediamannya

Cukup-cukup dah Bang…rase-rasenye kage sie-sie aye bebesanan ame Abang

Soal silat Abang jago…soal ngaji Abang bise…aye cuman bisa bilang…

Buah mangga bukan sembarang mangga

Buahnye satu tulung petikin

Aye bangga bukan sembarang bangga

Mantu yang begini yang aye arep-arepin

Ahlan wasahlan buat Abang ame rombongan…

Assalamu, alaikum…
Informan

repository.upi.edu

Nama : Bachtiar
TTL : Jakarta, 16 Maret 1971 Pendidikan Terakhir : SLTA

Alamat : Jalan Yusuf I RT 02/RW 03 No 100 Rawa Belong Jakarta.

https://setubabakan.wordpress.com/2012/05/30/tradisi-palang-pintu-kalo-elu-mao-masuk-
adepin-dulu-jagoan-gua-satu-persatu/