Lengkara sané jejering lengkaranyané nglaksanayang pakaryan, kasinahang saking lingingnyané. Cecirén lengkara lumaksana, ketah linging lengkarannyané marupa: a. Kruna kria lumaksana upami: Erawati luas ka peken b. Kruna Tiron, mapangater ma- upami: Komang madagang di peken. c. Kruna Tiron, maseselan –um- upami: Eda Iluh sumangsaya tekén beli! d. Kruna Tiron, mapingiring –ang –in upami: Luh, gaénang kopi! Luh, ootin beblanjaan tiangé! e. Kruna Polah upami: Agus nyampat di natahé. f. Kruna Tiron mawewehan gibung ma-an upami: Kereng pesan Madé masuunan.
Conto Lengkara lumaksana (kalimat aktif):
Luh Ayu madagang di peken. Luh Ayu ngawag matimpungan, nyanan ada anak lenan kena. Para sisiane sami sedek ngwéntenang bazar ring sekolahan. Mbok Ayu ngae rujak. Bli Surya nusuk sate.
2. Lengkara Linaksana (Pasif)
Lengkara sané jejering lengkarannyané keni pakaryan, kasinahang antuk linging lengkarannyané. Lengkara linaksana, ketah kacirinag antuk linging lengkara marupa: a. Kruna Kria Linaksana upami: Bukuné aba tiang masuk. b. Kruna Tiron, mapangater ka- upami: Bukuné suba kajemak dibi. c. Kruna Tiron, maseselan –in- upami: Buku punika wus sinurat warsa 2020 d. Kruna Tiron, mapagiring –a upami: Bukuné suba abana masuk tekén I Komang. e. Kruna Tiron, mawewehan gibung ka-ang, ka-in, pa-ang upami: Piringé kasabatang di natahé. Muridé ané bengkung kadukain olih I guru. Bajuné suba pakidihang tiang.