Kruna Wilangan

a. Pamiteges Kruna Wilangan

Kruna wilangan inggih punika kruna- kruna sane kanggen nyinahang akeh miwah akidiknyane
pupulan barang-barang, sahananing maurip, miwah laksana pakaryan.
- Pupulan Barang minakadi : Bangku, baju, salak, gula, kucit, gunung, miwah sane lianan.
Umpami :
1. Di kelase ene ada bangku pat likur.
2. I bapa meli kucit aukud
3. Aji kuda meli gula akilo?
- Sahananing maurip minakadi : guru, kambing kedis, punyan jepun, miwah sane lianan.
Umpami :
1. Beli nenem ngelah nyama guru.
2. I Pekak liu pesan ngubuh kambing
3. Di natah sekolahne dadua ada punyan jepun.
- Laksana pekaryan minakadi : ngigel, ujian, mekarya, lomba pidata miwah sane lianan.
Umpami :
1. Tiang mare acepok ngigel di Art Centre.
2. Sampun ping lima tukange mekarya ring pura.
3. Ping pindo ia maan juara lomba pidata.
b. Papalihan Kruna Wilangan
Kruna wilangan Basa Baline kapalih dados nenem soroh luiripun (1) kruna wilangan ketekan, (2)
kruna wilangan gebogan, (3) kruna wilangan pahan, (4) kruna wilangan tan janten, (5) kruna
wilangan panta, (6) kruna wilangan pepasten.
1. Kruna Wilangan Ketekan
Ring bahasa Indonesia kruna wilangan ketekan kabaos kata bilangan hitung. Inggih punika
kruna-kruna basa Baline sane ketah kanggen mapetekan, asiki-asiki, ngawit saking sa utawi
besik, sekadi ring sor.
• sa, dua, telu, papat, lima nenem, pitu, kutus, sia dasa,
• salikur, dualikur, telulikur, patlikur, selae, miwah selanturnyane.
2. Kruna Wilangan Gebogan
Sane kabaos kruna wilangan gebogan ring papalajahan basa Bali saluir kruna wilangan sane
nyinahang pangkah barang sane kabaos ngebog saha maderbe wasta niri-niri nenten nginutin
wasta kadi dudonan wilangan ketekan sane tiosan.
Sane ngranjing ring kruna wilangan gebogan minakadi :
a. 25 (selae)
b. 45 (setiman)
c. 75 (telung benang)
d. 150 (kerobelah)
e. 200 (satak)
f. 800 (domas), miwah sane lianan.

3. Kruna Wilangan Pahan

Kruna Wilangan pahan mawiwit saking kruna lingga pah sane mateges dum, pecah, utawi bagi.
Dadosnyane kruna wilangan pahan mateges saluir kruna bahasa Bali sane nyinahang pah-
pahan utawi bilangan pecahan (sajeroning bahasa Indonesia). Kruna wilangan pahan sajeroning
basa Bali ketah kasurat nganggen huruf kadi conto ring sor puniki.
a. Belin tiange maan nyilih pis limang juta, tiang baange atenga.
b. Tuah atugel telah ban naar biu gadange ane gede lantang ento.

4. Kruna Wilangan Tan Janten

Kruna Wilangan tan janten mateges saluir kruna basa Baline sane nyinahang pupulan barang
miwah sarwa maurip sane akehnyane durung pastika utawi nenten sida kajantenag akeh
akidiknyane.
Umpami :
a. Makire ngelah gae gede ngelah baas tuah abedik.
b. Maan mancing be limang ukud suba ngorahang liu.

5. Kruna Wilangan Panta

Kruna wilangan panta inggih punika kruna-kruna basa Baline sane nyinahang panta utawi
tingkatan wilangan ring bahasa Indonesia kabaos bilanagan tingkat.
Conto wilangan Panta :
a. ekan (satuan)
b. dasan (puluhan)
c. tusan (ratusan)
d. peon ( ribuan)
e. laksan ( puluhribuan)
f. keten (ratusribuan)
g. yutan (jutaan)
h. bara (puluhjutaan)

6. Kruna Wilangan Pepasten

Kruna Wilangan pepasten puniki tan seos wantah saluir kruna basa Baline sane prasida
nyantenang akeh akidiknyane pupulan barang antuk pastika.
Conto kruna wilangan pepasten :
a. I bapa ngubuh sampi akit sesai anggona matekap di carike.
b. Aji kuda beli meli bebek aukud ?