PAPLAJAHAN 2

LAPORAN

Teks Laporan

Laporan Ketua Panitia Porjar Lan PSR SMK NEGERI 1 DENPASAR Tahun 2015
Om Swastyastu
Sane murdayang titiang kepala SMK Negeri 1 Denpasar
Bapak Ibu Guru/ Staf management sané wangiang titiang
Para Atlit, aktris miwah pengurus OSIS sane tresna sihin titiang
Ring rahina sané becik puniki ngiring sareng
sami ngaturang pangrastiti ring Ida Sang Hyang Widhi
Wasa, santukan wantah sangkaning pasuécan Ida, iraga
sareng sami prasida masadu ajeng iriki jagi maosang
indik parikrama pamargin PORJAR lan PSR Kota
Dénpasar tahun 2015 sané sampun kamargiang.
Titiang sané kasudi pinaka ketua panitia, ring
rahinané puniki, lugrayang titiang nelatarang indik pamargi lan hasil sané sampun
kakapikolihang antuk kontingén SMK Negeri 1 Dénpasar ring sajeroning PORJAR lan PSR kota
Dénpasar tahun 2015.
 Dasar hukum
Surat édaran saking Kepala Dinas Pendidikan Pemuda dan Olah Raga Kota Dénpasar
nomor : 426.1/ 322/ Dikpora tanggal 30 Januari 2015 indik pemargin Porjar lan PSR
Kota Dénpasar
 Tetujon sané kaaptiang
1. Nincapang rasa oneng para sisyané ring widang olah raga lan seni
2. Nincapang kewagedan sisya ring widang olah raga lan seni
3. Pinaka cihna sisyané purun macentok kawikanan sareng sekolah lianan
 Waktu
PORJAR lan PSR Kota Dénpasar tahun 2015 kamargiang tanggal 20 s/d 25 April 2015
 Cabang olah raga sané kamiletin
Atlétik, Volley, Catur, Bulu Tangkis, Sépak Takraw, Panjat Tebing, Baskét, Pencak Silat,
Senam, Karaté, Yudo, Taékwondo, Ténis Méja, Krikét.
 Cabang seni sané kamiletin
Nyurat Lontar, Tari Teruna Jaya, Tari Jauk Manis, Dharma Wacana, Makekawin, Rindik
Berpasangan, Kendang Tunggal, Lagu Pop, Melukis, Tata Busana, Baca Puisi

Hasil sané kakapikolihang makadi : Emas 25, Pérak 13, Perunggu 2 . SMK Negeri 1
Denpasar mikolihang juara umum 2. Asapunika indik pamargi PORJAR lan PSR Kota Dénpasar
tahun 2015.

Dénpasar, 1 Méi 2015

Panitia PORJAR lan PSR SMK N 1 Denpasar
Ketua
I Gede Sunarya
2.1 Teges Laporan
Laporan inggih punika wangun bebaosan lisan utawi tulis ngenénin sekancan pariindik
pinaka sarana informasi utawi pertanggung jawaban saha mutusang sahananing wicara sané
sampun kamargiang sajeroning organisasi. Laporan mawiguna kaanggén nelatarang sahananing
pangerencana parilaksana miwah hasil sané kakapikolihang ring sajeroning pekaryan sané
sampun kalaksanayang.

2.2 Wangun laporan

Wangun laporan wénten makudang-kudang soroh sakadi:
1. Laporan mawangun formulir/utawi matrik, inggih punika laporan sané sampun maduwé
blangko. Sang sané nyurat laporan punika wantah nagingin blangkoné kémanten.
2. Laporan mawangun memorandum utawi nota, inggih punika laporan sané daging ipun
cendek utawi bawak. Laporan puniki sering kaanggén antuk pejabat ring para
karyawané kémanten.
3. Laporan mewangun surat inggih punika laporan sané katelatarang sakadi surat, tur
dagingnyané dados ngunggahang sakancaning pariindik.
4. Laporan mewangun naskah inggih punika laporan sané sakadi makalah, daging ipun
kepah dados topik miwah sub topik.
5. Laporan mewangun buku inggih punika laporan sané kasusun sakadi buku.

2.3 Tata Cara Nyurat Laporan

1. Pangrencana laporan
 Napi sane jagi kalaporang
 Napi mawinan patut kalaporang
 Malih pidan jagi kalaporang
 Indik napi sane jagi kalaporang
Yening sampun sida nyawis pitakene puniki pacang prasida maosang indik latar
belakang, pikobet, tetujon laporan.
2. Mupulang sapariindik (mengumpulkan bahan)
3. Sistematika utawi nudonang daging laporan
4. Nyurat laporan