SERMON HKBP RESSORT SIMARMATA

JAMITA MINGGU XXIII DUNG TRINITATIS, 15 NOVEMBER 2020

TOPIK: PATULUSHON HADUMAON
(MEWUJUDKAN KESEJAHTERAAN BERSAMA)
EP: JAKOBUS 5: 1-6 EV: JEREMIA 29:1-7
I. PATUJOLO
Jeremia ima sahalak Panurirang anak ni Hilkia sahalak malim sian Anatot di luat Benjamin. Na
tarjou do ibana songon sahalak panurirang di tongatonga ni bangso Juda (Israel Selatan) andorang so
tarbuang dope tu Babel sahat tu na tarbuang nasida tu Babel alani haginjangon ni roha dohot dosa ni
bangso i dung salpu panggomgomion ni raja Josia (612 SM) ima di taon 586 sM. Na tarjou do si Jeremia
gabe panurirang ni Debata laho mansoarahon haimbaruon nang hamubaon ni roha di tongatonga ni
bangso Israel. Ala tongon ma nasida mangolu di bagasan haporseaon na manomba ganaganaan, dewa
Baal dohot angka pengaruh ni panurirang pargapgap na manjamitahon hata naso tutu, holan
pasonangsonanghon roha ni bangso i, gabe ndang diboto pardosaonnasida. Alani, marhite panurirangon ni
si Jeremia, naeng diarahon do bangso i asa mangolu di bagasan hasintongan, unang be di bagasan dosa.
Asa naeng jumpang ma hamubaon ni roha di bangso i. Ai nunga tangkas diparade Debata haluaon di
nasida ima paboa na ingkon mulak nasida tu Jerusalem, bona pasogit/huta nasida i dung 70 taon lelengna
tarbuang.
II. HATORANGAN
Ditongos panurirang Jeremia do surat sian Jerusalem tu angka pasipasi ni sintua na tarbuang
dohot angka malim, panurirang dohot bangso Juda (Israel Selatan) na tarbuang di Babel, ima naung
binuanghon ni si Nebukadnesar sian Jerusalem tu Babel na ginimgomanna i. Ditongos si Jeremia do
suratna marhitehite si Eleasa, anak ni si Sapan dohot si Gemarya anak ni si Hilkia uju panggomgomion ni
raja Sedekia di Juda hatiha i. Marhitehite surat na tinongos ni si Jeremia on, naeng patoguonna
haporseaon ni bangso Israel na tongon tarbuang di Babel hatiha i. Asa unang mandele, jala lam mandao
nasida sian dalan ni Debata. Ingkon margogo do nasida mandalani habuangan i, dalan nasida
marhamubaon ni roha, jala ingkon mulak do nasida sian habuangan i tu Jerusalem muse di ujungna.
Dipabangkit Debata do si Jeremia bahen panurirangNa laho pasahathon tona/hata ni Debata tu bangso
Israel na tarbuang i. Angka dia ma tona ni Debata i? Idaonta ma marhitehite turpuk on, ima:
a. Pauli bagasmu laos ingani, pungka porlak laos pangan ma parbuena! (Ay.5)
Bagas/jabu ima inganan ni parmianan ni sasaripe, jala gabe kebutuhan Primer manang na
rumingkot di parngoluon ni jolma. Atik pe halak na tarbuang do bangso Juda di Babel, disosoi Debata do
marhitehite panurirang Jeremia asa di pauli nasida bagas di nasida ganup ima inganan parmianan di
nasida be. Memang ndang adong tano manang pangulaan na gabe hak milik nasida, hak mamangke do
adong dilehon panggomgomi Babel tu nasida, ala Nebukadnesar raja na mamboan nasida tarbuang sian
Jerusalem tu Babel mangalehon inganan disi. Jadi ingkon ringgas do halak na tarbuang i mulaulaon, jala
berjuang laho pauli angka bagas di nasida be asa inganan ni nasida. Suang songon i disosoi do nasida asa
mamungka porlak, ra kemungkinan besar mata pencarian di Babel ima di bidang pertanian do. Ido
umbahen sian pertanian do mangula jala mangolu pangisi ni luat i. Apostel Paulus pe didok ibana do: Na
so ra mangula, unang ma ibana mangan! (2 Tes.3:10). Jadi, mansai ringkot do perjuangan dohot kerja
keras asa jumpang ngolu na berkualitas.
b. Marpinompari asa sopar pinompar ni jolma i (ay.6)
Disuru Debata do bangso Juda na tarbuang i marhitehite si Jeremia asa marpinompari,
marhitehite na mangoli dohot marhamulian. Saonari na gabe sungkunsungkun di hita, tu ise do nasida
mangoli dohot marhamulian? Molo halak Juda (Israel Selatan) polin dope manjaga uhum dohot ruhut-
ruhut ni aturan ni Israel. Atik pe tarbuang nasida tu Babel, na so jadi buaton nasida parompuan sian
bangso sipelebegu ima na so manomba Debata gabe ripe nasida. Jadi, tontu ingkon sesama nasida
pinompar ni Israel do marhot ripe. Jala ingkon lam sopar do pomparan ni Israel di Babel, jala ndang jadi
moru bilangan ni nasida. Gabe taingot ma hata ni Debata uju di panompaon ni portibion, didok do tu
jolma na parjolo i: Dung i dipasupasu Debata ma nasida: marpinompari ma hamu, asa sopar hamu, jala
gohi hamu sandok tano on, jala patunduk hamu; jala rajai hamu … di atas tano on (1 Musa 1:28). Suang
songon i na masa di halak Israel pinompar ni si Jakob di Misir, lam torop do nasida, marpinompari jala
lam deak, jala lam marhuaso situtu pola digohi nasida tano Misir ujui (2 Musa 1:7). Jadi, na sai tongtong
do Debata mamasumasu bangso na hinaholonganNa i. Atik pe ingkon tarbuang, songon uhuman ni dosa
ni halak Juda hatiha i naung manimbil sian Patik ni Debata, tongtong do marparmuati roha ni Debata. Jala
naso jadi mansohot pasupasuNa di hita jolma pardosa. Dalan patanghon haporseaon, asa jumpang
hamubaon ni roha do molo pe tung diuhum Debata hita satongkin ala ni dosanta i. Ai nunga jumolo
dipatuduhon holongNa na balga i tu bangso Israel najolo jala ndang mansohot sahat tu sadarion.
c. Mangharingkothon hasonangan ni huta didia hita maringanan huhut tumangianghon huta i (ay.7)
Dilehon Debata do tanggungjawab di halak Juda na tarbuang i, ima ingkon mangharingkothon
hasonangan (kesejahteraan) ni huta habuangannasida i, ima Babel i. Jala ingkon tangianghononnasida do
huta i dohot pangisina pe. Na marlapatan, ingkon gabe siboan pasupasu do bangso Israel manang tudia pe
nasida maringanan, bahkan tu inganan na so hinalomohonnasida pe. Babel ima inganan habuangan, ndada
huta ni halak Israel manang Bonapasogit di nasida. Alai ingkon mangolu jala mangula do nasida saleleng
maringanan disi. Ndada holan dirinasida sambing disarihonnasida, jala ingkon diharingkothon nasida do
kesejahteraan ni luat i. Isarani, marhitehite kerja keras, tekad dohot perjuangan ni halak na tarbuang i,
gabe taruli hamajuon do nang luat i dohot pangisina. Jala idaon pangisi ni luat Babel ma na tama halak
Israel na tarbuang i gabe tiruan di parngoluon siganup ari. Ndada holan ngolu pardagingon na ingkon
siluluannasida, alai di ginjang ni i ingkon luluan nasida do ngolu partondion, marhitehite lam
mangharinggashon ngolu partangiangon, huhut tumangianghon luat parmianannasida dohot pangisina.
Jumpang ma ngolu na berkualitas, ima ngolu pardangingon dohot partondion na berkualitas di adopan ni
Debata. Amen.
III. PANIMPULI
Topik Minggu “Patulushon hadumaon”, na tarjou do halak Kristen di bagasan ngoluna ndada
holan mangharingkothon ngoluna sandiri, alai ingkon dohot do sumarihon ngolu di humaliangna. Jumolo
ma dirina disarihon marhitehite na mangalului na ringkot di ngoluna dohot keluargana, jala manarihon
humaliangna. Ido tanda ma paboa gabe pasupasu hita tu humaliangta be. Isarani angka na mangaranto di
luat parserahan i, molo halak Kristen do ibana ingkon gabe siboan pasupasu ma ibana di humaliangna,
jala ingkon rap manangianghon do hita di huta/luat parmiananta suang songon i negaranta Indonesia on.
Di masa Pandemi Covid 19, marpanghorhon do i tu ekonomi masyarakat. Godang ma halak na agoan
parkarejoanna. Jadi, ingkon sipardohot do halak Kristen laho tumangianghon negaranta on asa
marhasonangan jala patupa na boi sipatuaonna hombar tu gogona be. Asa tanda ma hita gabe pasupasu tu
humaliangta, songon bagabaga ni Debata tu si Abraham, Hubahen do ho gabe pasupasu (1 Musa 12:2).
Amen.