mama kompleks, dong heboh bagosip tentang peristiwa- peristiwa terhangat di Kampung Mereka”
*Mama Radit, Mama Ester, Mama Naomi dan Mama
Luna, bakumpul duduk melantai di panggung*
M. Radit : “Eh Mama-mama, tau kaseng ada berita
terbaru di katong pung kampung?” M. Ester : “Oh iyaiya batul, tentang Mama Siska itu ?” M. Radit : “batul sudah cinta” M. Naomi : “Berita apa lai? Beta balom tau e” M. Luna : “Adoh beta baru pulang dari Bali e, jadi seng tau apa-apa” M. Radit : “Itu e Mama Siska tu su renofasi rumah deng bali motor baru, antua pung rumah su paleng bagus e cinta-cinta” M. Luna : “Astaganaga ? Yang batul ni Mama Radit ?” M. Radit : “Alamak ga percaya dia, ya benarlah bu” M. Ester : “Sadap e, tapi aneh seng Mama-mama, antua pung laki kan cuma honor di kantor camat, deng Mama Siska jua Cuma tinggal di rumah seng ada kerja apa-apa, lalu antua dapa uang banya-banya tu darimana?” M. Naomi : “Jangan-jangan antua pung laki iko rame cara pejabat-pejabat skarang, itu e yang koperasi” M. Luna : “Korupsi Cinta, bukan koperasi” M. Naomi : “Tadi kan beta bilang bagitu tu” M. Radit : “Eh tapi katong seng boleh bicara sabarang, jang sampe itu batul e” M. Ester : “Ssstttssttt, Mama Siska ada jalan kasini”
*Mama Siska berjalan memasuki panggung*
M. Siska : “OMG Hellooww, Mama-mama Kudet dong
ada dudu melantai, paleng seng berkelas, astagaa. Tunggu-tunggu beta mau selfie dolo, biar upload di facebook with Mama-mama Kudet, mari samua biking gaya ‘peace’. Oke nanti beta kasi maso di facebook doo ” M. Naomi : “Eh Kudet tu apa Mama Siska ?” M. Siska : “Kudet tu kurang up to date, Hahahh” M. Radit : “astaga bicara sabarang tarus e, bilang katong kurang update, merasa diri labe tinggi deng hebat dari katong samua disini ?” (nada emosi) M. Siska : “OMG Helloww, santai kaya di pante saja e, seng usah sensi bagitu” M. Luna : “Eh Mama Siska ni antua bicara sabarang tarus e” M. Radit : “Mau par beta tarek se pung rambut karibo tu” (emosi sambil berdiri) M. Siska : “Eeh eehh jang dekat-dekat” (menjauh/menghindar)
*Ibu Pendeta masuk*
I. Pendeta : “Lho lho ada apa ini Mama-mama ?” M. Siska : “Ini ibu kebetulan datang, masa dong mau pukul beta e Ipen” I.Pendeta : “astaga brang kenapa Mama-mama ?” M. Radit : “Ibu Pendeta, Mama Siska ini dari tadi bikin katong emosi, antua bicara itu macam dia yang labe berkuasa di kampung ini” M. Siska : “OMG Helloww, ibu Pendeta beta kasini deng tujuan bae, beta mau undang Mama-mama dong ni ke acara syukuran beta pung rumah yang baru di renofasi itu e Ipen” M. Ester : “Heh tadi seng ada bilang begitu mo” I.Pendeta : “Yasudah, malu itu e dapa liat dari penonton, su tua tapi masih saja baku bakalai. Saya permisi duluan e Mama-mama, mau ada kegiatan” Semua : “Iya mari Ibu silahkan” M. Siska : “Beta juga permisi e Mama-mama” *Ibu Pendeta dan Mama Siska meninggalkan panggung*
M. Radit : “Astaga emosi skali e beta gara-gara
Mama Siska itu” M. Luna : “Sama e Cinta beta lai” M. Ester : “Biasa itu Mama-mama, kalo orang baru kaget harta tu kaya bagitu”
*masuk Mama Tari dari arah penonton/depan
panggung* M. Tari : “Pate, Patee.., Mari ada Pate baru petik ? (nawarin penonton). Hayoo Paleng sunyi e, seng ada orang yang bali. Eh itu ada Mama-mama komplek. Pate Pate, Mama Pate nya mau bali?” M.Luna : “Iih beta tu seng suka, seng enak, bau lai” M.Tari : “Ini to Pate yang beda Say, baru seng bau lai” M. Ester : “beda bagemana Cinta ?” M. Tari : “Pate Mama Tari itu khas Say, ini ada rasa mantan minta bale, ada rasa laki tambah sayang bini, deng ada rasa yang pernah ada” M. Luna : “Astagaa Mama Tari ni ada-ada saja e” M. Naomi : “Ada rasa apa tadi yang Mama bilang ? Mantan minta bale? Deng laki tambah sayang bini tu minta 2 ikat jua” M. Tari : “ini batul e Say, mari coba liat dolo e” M. Ester : “Mama Tari kanapa dari dolo bajual Pate tarus ?” M. Tari : “Par biaya skolah beta pung anak, oh iya Say, beta mau Tanya bisa ?” M. Ester : “Tanya apa Mama ?” M. Tari : “Beta pung ana ni mau jadi Guru, Jadi beta mau kasi kuliah dia, dengar-dengar ada beasiswa dari gereja par anak berprestasi ka ? Akang pung cara bagemana e ?” M. Radit : “Eh Mama Tari, seng usah bicara tlalu basar-basar kalo mau kasi kuliah se pung ana supaya jadi Guru lai, bicara pukul tinggj kaya mampu saja” M. Luna : “Mama, biaya kuliah tu paleng mahal e, balom biaya kost, makan, deng keperluan yang laeng- laeng. Apalai di Ambon sana lai” M. Ester : “Tapi Mama Tari serius ?” M. Tari : “Serius Mama, ya beta pung anak ni harus berusaha par kasi skolah dia tinggi-tinggi, Supaya jadi orang lalu beso-beso bisa liat dia pung ade-ade dong” M. Ester : “Kalau masalah itu Mama Tari coba tanya majelis jemaat saja, dong yang labe tau” M. Luna : “kalo beta boleh saran e Mama, labe bae Mama pung ana tu kasi kaweng dia sudah, cari laki yang kaya, biar muka tar bae jua sengpapa, Daripada bermimpi setinggi langit tapi tangan seng mampu” M. Radit : “Iya batul itu, biking kaya Mama pung anak lebih pintar, labe bae beta pung anak” M. Tari : “Beta tau dia pung kemampuan, makanya beta barani bilang bagini, Tapi kanapa Mama-mama dong bukanya dukung beta, malah bicara kasi jatuh beta”
*Datang Radit dari arah penonton / samping panggung
dengan gaya mabuk sambil nyanyi / dengar musik berjalan menghampiri Mama-mama* M. Tari : “Mama, itu bukannya Mama pung anak Radit to ? Yaah lebih baik anak saya lho bu” Radit : “Helloo Mamaku tercinta, helloo Mama- mama dong, Mama kasi kepeng dolo” M. Radit : “Ose bikin apa ini ? Biking malu mama aja, mari pulang !* (sambil jewer telinga Radit) Radit : “Mama Tari ka rumah e beta mau bali pate pate pateeeee” *Mama Radit + Radit meninggalkan panggung*
M. Tari : “Sudah e Mama-mama, beta parmisi mau
lanjut bajual lai, jang sampe sore” (kemudian meninggalkan panggung) M.Naomi : “Liat kaseng tadi si Radit ? Dia mama hina-hina orang pung anak eh padahal anak sandiri labe ancor lai” M. Luna : “Iya e, Tadi itu beta mau tatawa, tapi beta tahan e” M. Ester : “Makanya itu katong jang hina-hina orang kaya tadi, kan malu sandiri to. Ya sudah mari katong pulang jua, su mau hujan e” M. Luna : “Iya mari-mari” *Mama-mama meninggalkan panggung*
Narator : itu to penonton, padahalkan sebelumnya
dong kompak bacarita orang laeng, eh ternyata Ibu Radit jua diam-diam dapa carita di belakang to. Inilah kehidupan, ketika katong kompak carita orang laeng, maka katong jua nanti dapa carita pas katong seng sama-sama deng dong . Hati-hati ya penonton. Inga dunia ini berputar, seng selamanya katong slalu berada di atas. Ada saat-sat katong akan jatuh terhempas ke bawah. Beberapa Tahun kemudian ...
*Suasana di rumah Mama Radit*
M. Radit : (menangis meratapi tumpukan tagihan utang) Radit : “Ma, Beta pulang!!!!!!!!” M. Radit : “Ose seng usah pulang lai ! Pi bajalang minom mabo, bajudi, tarus sampe puas ose siksa mama ini. Lihat, lihat ini, samua tagihan hutang, bayar pake apa ? Samua barang-barang Ose su pi jual akang, rumah ni jua ose su pi gade akang lapis deng tanah- tanah samua cuma par minum mabo deng ose pung judi itu saja. Su puas ose siksa mama tua ini?” Radit : “Ma, dengar beta dolo, kalo beta menang judi nanti beta ganti Mama pung uang-uang samua yang beta su pake” M. Radit : “Menang ose bilang ? Kalo menang judi yang ose harap, Tuhan seng akan pernah kasi ose menang ! Ampong beta pung dosa jua e, kanapa beta pung anak kaya bagini e, liat Anaknya Mama Tari su sukses, su ada uang sandiri, mar ose tinggal bagini- bagini saja dari dolo, lama-lama Mama bisa gila e Radit” Radit : “Hayoo ini yang beta seng suka, mulai dari beta masih dalam poro sampe su basar bagini, Cuma orang laeng saja yang sibuk mama urus, sadiki-sadiki tinggal bandingkan beta deng Mama Tari pung anak. Ma, yang jadi mama pung ana ini beta ka dia? ! Kapan mama mau peduli deng beta ? Kapan mama perhatikan beta ? Mama slalu sibuk perhatikan orang pung hidop, mama sibuk bicara orang, sampe mama lupa kalau mama punya beta ! Skarang su bagini baru mama kasi salah beta ? Mama dimana slama ini ? Saat beta butuh mama, mama seng ada, saat beta butuh mama pung dukungan, mama acuh tau ! Beta memang anak laki-laki ma, tapi beta jua butuh mama pung perhatian.” (nada emosi) M. Radit : “Radit, dengar mama dolo, mama seng ada maksud par biking bagitu e” Radit : “Sudah jua ma, samua ini karna beta pung salah to ? mama tau kaseng bagemana beta pung perasaan? Sakit ma, sakit” (sambil pergi meninggalkan Mama) M. Radit : “Radit, radit, mau pi mana ? Ooh Tuhan, beta salah apa?, kanapa samua jadi bagini” (sambil membereskan kertas kemudian meninggalkan panggung)
Narator : “kanapa jadi menyalahkan Tuhan e
penonton, seharusnya katong selalu ingat deng ayat alkitab yang bilang bagini “Apa yang engkau tabur, maka itulah yang akan engkau tuai”, katong di ingatkan laeng kali jang talalu sibuk bacarita orang laeng pung hidop, labe bae katong sibuk memperbaiki katong pung kehidupan”
*Berkumpul Mama Ester, Mama Luna, Mama Naomi*
M. Ester : “Eh Mama-mama su dengar berita baru ka ?” M. Luna : “Kabar apa Mama Ester ?” M.Ester : “Itu e, katanya to Radit banya bautang dimana-mana, dan katanya lai dia mau dapa penjara gara-gara seng bisa bayar dia pung utang-utang tu” M.Naomi : “itu to, batul kata pepatah “Mulutmu harimau mu” M.Ester : “ Iya batul e, aah kalo bagitu beta seng mau talalu bacarita orang lai e, taku jang dapa karma” M.Naomi : “Iya batul e, katong jadikan ini sebagai pelajaran par katong jua” M. Luna : “Jadi kalo salah satu dari katong lupa, katong saling baku kas inga e” I.Ester : “Eh itu ibu Radit” *masuk Mama Radit* M.Radit : “Sio.. Mama-mama e bantu beta dolo, beta tau dong pasti su dengar kabar soal beta pung anak tu ? Beta bingung e, beta takut, beta su seng tau lai harus bagemana ?” (nada nangis) M. Ester : “Iya Mama Radit, Katong su dengar, bagemana e, beta jua ada banya pengeluaran e, jadi seng bisa bantu Mama Radit” M.Luna : “beta jua kamareng baru pulang dari Jakarta bawa uang par kacil yang ada kuliah disana, Jang kurang-kurang hati e Mama Radit” *masuk Ibu Pendeta* I.Pendeta : “Selamat siang Mama-mama, ada biking apa ini?” M.Naomi : “Eh kebetulan ibu Pendeta lewat, ini e Ibu katong ada cari solusi par bantu kasi selesaikan Mama Radit pung masalah ni” I.Pendeta : “Ooh bagus itu, sesama saudara seiman sudah seharusnya katong saling baku bantu, batul kaseng penonton ?” M. Naomi : “Kalo boleh saran ni, labe bae Mama Radit minta bantu di Mama Tari saja, antua kan su sukses, sapa tau bisa bantu Mama Radit, antua pung ana mantu jua Pengacara, sapa tau bisa bantu Radit pung masalah” M. Radit : “Tapi apa antua mau bantu beta, beta ni slalu hina-hina antua” I.Pendeta : “Katong seng akan tau sebelum mencoba Mama, tapi kalo menurut saya, Mama Tari pasti mau bantu Mama Radit” M. Radit : “Tapi beta malu e Ipen, beta takut” I.Pendeta : “Ya sudah kalau begitu bagaimana katong kami antar Mama Radit kasana, bagemana Mama- mama ?” M.Ester : “Iya boleh Ipen” I.Pendeta : “Ya sudah mari katong pigi” *Para pemain meninggalkan panggung*
*Mama Siska (berpakaian Asisten Rumah Tangga)
sedang beres2/menyapu) I.Pendeta : “Permisi, selamat siang” Mama Siska : “Selamat siang, eh ibu Pendeta, eh Mama-mama komplek ada lai, mari masuk” M.Naomi : “Hah ? Astaga Mama Siska ? M. Luna : “Ya ampun e? Mama Siska kerja disini?” M. Siska : “Iya Mama-mama, su 4 bulan beta kerja disini pas beta pung paitua di penjara. Oiya Mama- mama mau ketemu Mama Tari atau sapa e ? I.Pendeta : “Iya kami ada perlu deng Mama Tari, Antua ada ?” M. Siska : “Ada Ipen, tunggu beta panggil antua dolo e” (kemudian memanggil Mama Tari) M.Luna : “Eh ya ampun beta baru tau dia jadi asisten rumah tangga, ada pantas dia su pindah dari kompleks e, ternyata dapa tau korupsi tu” (bisik-bisik ke Mama Ester + Mama Naomi) M.Ester : “Ssstt, katong kan au janji seng mau bacarita orang lai tu M.Luna : “Ooh iya beta lupa e” *masuk Mama Tari* M. Tari : “Eeh ada Mama-mama, ada perlu apa ni ?” I.Pendeta : “Begini Mama, katong ada mau minta bantuan, maaf kalau mungkin sebelumnya katong mendadak datang tanpa kasi tau Mama Tari” M.Tari : “Astaga ibu Pendeta kaya deng sapa saja, Ini deng Mama Tari tukang jual Pate ohh, seng usah tlalu formal-formal lai. Mau minta bantuan apa Mama ?” M. Radit : “Mama Tari, sebenarnya beta yang mau minta bantu dari Mama Tari, sebenarnya beta malu deng Mama Tari, beta minta maaf e” (nangis sambil mau sujud) M. Tari : “Eeh ada apa tu Mama, seng usah bagini, beta su kasi maaf mama dong, beta jua seng ambil akang di hati oo, justru beta bersyukur, itu jadi cambukan par beta, makanya beta bisa begini, Mama mau minta tolong apa ?” M. Radit : “Beta pung ana Radit tu, dia pung kerja Cuma minum mabo deng maeng judi, skarang samua su habis dia jual termasuk rumah , dia pung utang dimana-mana, dia mau di penjara kalo sampe dia seng bisa bayar utang. Tolong bantu beta Mama Tari, sejahat-jahatnya beta pung anak itu, beta seng mau dia masuk penjara, Bantu beta jua Mama Tari” (sambil menangis dan memohon) M. Tari : “Beta turut sedih dengar apa yang Mama Radit alami, hidup memang terkadang seng selalu berjalan sesuai deng apa yang katong harapkan, Mama yang sabar e, tapi bagemana ya , beta pung ana mantu jua ada di Ambon” M.Radit : “Tolong bantu beta Mama Tari” M. Tari : “Ya sudah nanti beta coba telepon beta pung ana mantu e, tapi beta jua cuma bisa bantu semampu Beta, semoga bisa mengurangi beban masalah yang Mama Radit alami” M.Radit : “Batul Mama Tari ? terimakasih terimakasih terimakasih banyak” M. Tari : “Iya Mama Radit sama-sama” M. Ester : “katong jua minta maaf e Mama Tari. M. Tari : “Iyaiyaa mari katong saling mendukung e mulai sekarang” *Mama-mama saling meminta maaf*
I.Pendeta : “Nah penonton, katong kembali di
ingatkan, bahwa roda kehidupan masih berputar, jangan tinggi hati saat katong berada di atas, dan jangan rendah diri saat katong berada di bawah, seperti ada tertulis dalam Alkitab Pengkhotbah 3:1 “Untuk segala sesuatu ada masanya, untuk apapun di bawah langit ada waktunya”. Percayalah tidak ada usaha yang sia- sia. Tuhan Yesus memberkati katong samua.”