GBKP KLASIS PEMATANGSIANTAR

Tahun 2016
Tema : KataNdu Kap Tendang Man Nahengku
(Masmur 119 : 105a)
Sub Tema : Ketubuhen Yesus, mpengasup kita tetap nggeluh
ibas Kata Dibata maka terang kegeluhenta.
 LITURGI NATAL UMUM
GBKP KLASIS PEMATANGSIANTAR TAHUN 2016

I. PERSIKAPEN.
- Penjelasen Liturgi Natal
- Ngaturken petugas ibas kebaktin : simaba doa syafaat, kolektan,
sinagani lilin ras sidebanna.

II. PENARUH KUBAS KEBAKTIAN.

1. Kata Penaruh
Senina ras turang, Natal umum tahun 2016 enda enggo ilebei
piga-piga Natal si ikuti kita ibas Runggunta. Tentu enggo mbue bekalta
ibas mpelimbarui geluhta, maka reh teguhna kinitekenta man Dibata
bagepe kiniersadanta ras temanta manusia. Ibas ndalani tahun 2017
sireh enda, percuban ibas kegeluhenta tetap reh kompleksna. Maka
marilah ras-ras kita mpesikap dirinta, jabunta bagepe perpulungenta
gelah ngasup ngalaken tantangen alu nggeluh ibas Kata Dibata. Kata
Dibata tetap jadi jemakenta sinegu-negu geluhta guna tetap paguh
erkiniteken man Dibata. Alu bage Dibata ermulia dingen dame geluhta.
Mejuah-juah dage man banta kerina ras damelah pusuhta ngikuti
Kebaktin ras Perayaan Natal Umum enda.

2. KEE No 114 : 1 - 3, Sendah Jumpa Kita Wari Raya E

(Barisen prosesi bengket ku ingan Kebaktin). Perp. tedis
Sendah jumpa kita wari raya e
Peringetten tubuh Tuhan Yesus e
Nusur ndahi kita manusia e, keriahen kap e
Ermulia me Tuhannta, e sipuji me gelarNa,
Perdamen ibre Dibata, Tuhan Yesus kap e
Mari kita ku kuta Betlehem e
Muji nembah man Tuhanta Yesus e
E tinenges Tuhan si perkuah e, Dibata Bapa e
Ermulia me Tuhanta, e sipuji me gelarNa
Perdamen ibre Dibata Tuhan Yesus kap e
Sembah kami man banNdu si tubuh e,
Kam si maba dame ku pertibi e
Bengket min ku tendi ukur kami e, dameNdu o, Yesus
Ermulia me Tuhannta, e sipuji me gelarNa
Perdamen ibre Dibata, Tuhan Yesus kap e.

2
III. KEBAKTIAN
1. Votum + Salam + Invocatio
Lit. : Kebaktin Natal Umum enda ibenaken Ibas gelar Dibata
Bapa, AnakNa Yesus Kristus ras Kesah Si Badia. Penampat
man bandu rehna ibas Yahwe nari singkawali perberkat ras
permulihndu genduari nari seh rasa lalap, amin.
Perp. : Amin … amin ….amin …
Invocatio : Kata eme ulu kegeluhen, janah kegeluhen e maba terang
man manusia (Johanes 1 : 4).
3. Rende : PEE No. 27 : 1, 2
Siendeken ‘nde-‘nden simeriah,
Man Tuhanta si ‘nggo tubuh bas pelangkah
Sabab patut nge k’rina kita nembah
Ban babaNa terang ngaruh ras pe tuah
REFF.... Dage mari kita kerina, lah sipuji gelar Dibata
Ulanai ukur erbera, Tuhan Yesus me kap Rajanta
Tuhan Yesus metunggung dat pujin
Perban IA si ngajari kita kin
Kek’lengenNa la erkeri-kerin
Adi pakelah pedahNa seh pagin. Reff....
4. Kegeluhen si isuruh Dibata Perp. kundul
Lit. : Dibata erdahin nehken kiniulin kubas kegeluhen doni enda
guna nelamatken doni enda.
Mamre : Si inget maka Yesus Kristus eme Kata Dibata enggo reh ku
doni enda jadi sekalak manusia.
Moria : Bagepe iarapkenNa maka kita pe kerina nggeluh ibas Kata
Dibata maka terang kegeluhenta.
Lit. : Tandana kita ersada ras Kristus kita ngasup ngelakoken si
mehuli guna dirinta bagepe kalak si deban.
Permata &: Pengasup kami Tuhan ibas kengudan kami engkuasai diri
KA-KR kami ras pesikap kami guna makeken kataNdu jadi gelemen
kami.
Lansia : Reh tuana kami, reh erguna min kami ibas kegeluhen enda.
L+P : O Tuhan, tuhu seh ulina kegeluhen kami adi ngasup kami
nandai diri kami ilebe-lebeNdu, janah nggit mpesikap geluh
kami alu tetap nggeluh ibas Katandu.

5. Rende : KEE No. 471 : 1 – 3

Terpujilah Dibata ibas surga si meganjang
Janah dame i doni man manusia si ngena ateNa
Ref Terpuji Tuhan, terpuji Tuhan, terpuji rasa lalap
Terpuji Tuhan, terpuji Tuhan, terpuji rasa lalap
3
 Ia tubuh ku doni enda, jadi seri ras manusia
Maba b’rita si meriah, man gunanta si jera
Ref…
Emaka ota dahi, Yesus Kristus si enggo tubuh
Janah b’ritaken man kerina manusia, anakNa nggo tubuh
Ref…
6. Koor/Vokal Group :
7. Kinilangasupen manusia nggeluh ibas Kata Dibata
L : Kinata nggeluh paksa enda eme kesibuken ngkuasai
kerina jelma, la erndobahen perbapan, pernanden, anak
perana, singuda-nguda bagepe anak si kitik denga.
Kesibuken geluh lanai ratur ngoge Kata Dibata. Lanai bo piga
kalak si ndalanken kebaktin ibas jabu.
Mamre : Megati erkiteken pendahinku ras kesibukenku lanai aku
ngasup ndalanken Kata Tuhan dingen ngaturken
kebaktian ibas jabungku.
Moria : Kidekah enda, enggo bias kuakap alu ngikuti kebaktin-
kebaktin ibas gereja saja. Emaka enggo pe illitken bahan
paksa teneng labo kupakeken.
Permata& : Aku pe si jadi ibas kegeluhen bagi kegeluhen orang tuaku.
KA-KR Labo lit waktuku ngoge Kata Dibata.
Lansia : Kami pe lenga bo ngasup tetap ngoge ras ndalanken Kata
Dibata.
L : Kegeluhen si erpalasken Kata Dibata bagi mbangun rumah
ibabo kersik. Reh lau mbelin ras angin meter, rumah e
minter runtuh.
P : Bagem kidekah enda geluh kami Tuhan, reh perbeben
min kami kote.
Rende : KEE No. 283 : 2, 3
Aloken tendingku, kata ni Dibata
Ia kap setia, adil perbahanNa
Benar me kap Ia, padanNa pe tetap
Si ngikutken Ia, dame rasa lalap
Nggeluh I bas doni lalap lit si kurang
Di nadingken Tuhan, geluh kin pe rontang
I bas Tuhan ngenca, ullu pengarapen
Si ernalem baNa, ndatken kesangapen
8. Pengakun dosa
L : Tuhan, tuhu enggo erdosa perpulungenNdu man baNdu, la
iperdiatekenna pengajarenNdu, ukurna saja ngenca
ipementasna. Sura-surana idalankenna. Tuhan alemilah
perpulungenNdu

4
 P : Rende : KEE No. 376:1
Kuakuken me dosangku, ilebe Tuhan
Megati aku lalar bas kegeluhenku
Keleng atendu pengarapenku
I teruh perkuahNdu malem me pusuhku
Keleng atendu pengarapenku
I teruh perkuahNdu malem me pusuhku
L : IpersingetiNdu perpulungenNdu gelah patuh man
pengajarenNdu, tapi la iperdiatekenna. Erdalan ia ibas sura-
surana labo ibas peratenNdu.
P : Rende : KEE No. 376:2
Erlebuh aku baNdu, o Yesus Tuhanku
Alemi min o Bapa, salah ras lepakku
Keleng ateNdu pengarapenku
Tedeh ‘teku ngidah belinna perkuahNdu
Keleng ateNdu pengarapenku
Tedeh ‘teku ngidah belinna perkuahNdu
L : Kalak si ngakuken dosa-dasana ras kinila tunggungenna i
lebe-lebe Dibata, ialemi Dibata ia ibas dosa-dosana nari
P : Rende : KEE No. 440: 1 , 3
O Bapa salah lepakku ku ‘teh nge
Dosangku pe rusur kuinget
Man baNdu aku erdosa
Reff Mekuah ateNdu min erkiteken liasNdu
SasapkenNdu min, k’rina dosangku o Tuhan
O Bapa geluhku dem alu dosa
Ibas bertin nari pe aku
Enggo ikuasai dosa Reff
9. Koor/Vokal Group :
10. Berita Pengalemi Dosa & Ketubuhen Tuhan Jesus
L : Nina Dibata man bandu kerina kam singakuken dosandu:
“Malem me ate kalak si la megiken pedah kalak jahat, si la
ngusih perbahanen kaak perdosa, si la erteman ras kalak
megombang man Dibata. Tapi keriahenna eme matuhi
undang-undang Tuhan dingen ngukurisa suari ras berngi
(Masmur 1 : 1 – 2).
Perp. : Bujur o Tuhan, nggit kami matuhi undang-undang dingen
ngukurisa suari ras berngi. Pelimbarui dage tetap pusuh
kami.
L : Ibas kerehenNa ku doni enda, enggo idahiNa permakan-
permakan. Ija siidah maka permakan eme simbol derajat
manusia si meterukna ibas budaya Israel, enda
encidahken man banta maka Ia selaku Dibata mediate Ia
5
 nandangi kalak si meteruk. Emaka kam pe bage, ula kam
mbiar sebab kerehenNa e nehken berita si meriah
simereken keriahen si mbelin man kerina manusia. Emaka
kam pe arus ngasup nehken berita si meriah si maba
keriahen man kerina isi doni enda.
Perp : Bujur o Tuhan, nggit maba keriahen I tengah-tengah doni
enda, gelah radu ras kami nggeluh ibas keriahen.
L &P : “Terpujilah Dibata ibas surga si meganjangna. Janah
dame idoni man manusia si ngena ateNa”. Amin.
11. Rende : Rende KEE. No 193:1–3 “Bas Sinasa TinepaNa”
Bas sinasa tinepaNa, tetap k’rina rende t’rus
‘Nde-enden pujin badia, muji gelar Penebus
Reff: Glo……ria, muliaken Tuhan!
Glo……ria, muliaken Tuhan!
Bas ingan si meganjangna, bala Tuhan i surga
Rende m’riah ia krina, man Tuhanta Penebusta
Reff: Glo……ria, muliaken Tuhan......
K’rina ginenggem Dibata, pehaga si Tubuh e
Surga doni rende ia, k’rina alokenNa pe
Reff: Glo……ria, muliaken Tuhan......
12. Narasi Natal (Perp. tedis)
L : Enggo ka seh paksana kita ngerayaken ketubuhen Yesus
Kristus i doni enda. Melala persikapen-persikapen si
ibahan kita guna perayaan e, termasuk me ije pohon
natal si ihias alu lampu-lampu si erndilap, i tamaken
irumah-rumah, i kantor-kantor, i toko-toko, i gereja, la
ketadingen pe mall-mall si galang ras si kitik. Acara ibas
perayaan natal e ikemas semeriah mungkin, ibahan
Festival koor, Vokal Group ras itampilken ka drama ras
sidebanna. Konsumsi si cukup galang danana ras
penampilen si luar biasa. Enda kin i kataken Natal?

......paksa teneng (musik si melenget)......

L : Usahanta ngerayaken natal megati enggo tertuju man

banta saja, keluarganta, sektorta ras runggunta. Emaka
suasana keriahen e kita ngenca ngenanamisa. Kalak si
deban lalit inanamina keriahen natal e. Situhuna natal
nuduhken kinierdiaten Dibata man kerina manusia, i
perjuangkenNa kita gelah bebas ibas ketertekanen nari

6
 baik ketertekanen sosial, politik, ekonomi, terlebih
ketertekanen dosa nari. Siniarapken ibas kita ernatal
enda gelah kita ngasup ngelebeken sura-sura Dibata ibas
kegeluhenta. Reh terangnalah pengangkanta kerna sura-
sura Dibata maka kita maba keriahen man kerina
manusia.

.....Musik Malam Kudus......

Rende : KEE No. 135 :1 – 3 (Lilin isagani) (Perp. tedis)

Berngi e, nggo kepe, Yesus reh ku doni e.
Nusurlah ngangkut dosanta me kin,
Jadikap musil lah sangap pagin.
Asa sitek Tuhan e } 2x
Anak e, bujur pe, si ngena me aku e
Kini ulinNdu tading ken kam kap
Bengket ku doni lah t’rang sigelap
Aku daramenNdu e } 2x
Berngi e, nggo kepe, Tuhan reh ku doni e.
Padan Dibata teridah tetap.
KinikelengenNa banta me kap.
Tuhan si puji gelah } 2x
13. Renungen Natal : a. Ertoto ope Khobah (Perp. kundul)
b. Khotbah
c. Ertoto kenca Khotbah
14. Pengakun kiniteken (Perp. tedis)
15. Persembahen Natal : 100% guna dana pensiunen GBKP (Perp. kundul)
L : Kata Dibata si jadi palas ibas kita ngendesken persembahen
ibuat ibas Matius 2:11, Emaka bengket ia ku bas, iidahna
Anak ndai ras Maria nandeNa. Jenari erjimpuh ia nembah
man anak e. ibuatna erta-erta si ibabana e, jenari
ipersembahkenna man Anak si mbaru tubuh e, eme: emas,
kumenen ras mur.
Rende : KEE No. 115:1 – 3
Keriahen si mbelinna, si kuberitaken e.
Enggo tubuh si Permakan, eme Tuhan Yesus e.
Pujilah min Dibatanta, ras dame, dame, dame man banta
Dibatanta si erkuah ate, man kita jelma e.
Mamre& Ibas berngi enda terang, Bintang si mehelhel e
Moria T’rangna seh ku perukuren, si lanai erlayas pe
Kerina Pujilah min Dibatanta, ras dame, dame, dame man banta
Dibatanta si erkuah ate, man kita jelma e.

7
 Permata, Tuhan Yesus persadanta, em isuruh Bapa e
KA-KR&Lansia Si nasapken k’rina dosa, ibas golgota kepe
Kerina Pujilah min Dibatanta, ras dame, dame, dame man banta
Dibatanta si erkuah ate, man kita jelma e.
16. Pertoton persembahen ras Pertoton syafaat
Topik Pertoton Syafaat:
- Kerna Runggun
- Kerna BP. Runggun, BP. Klasis ras Moderamen.
- Kerna Persekutuan Kategorial
- Kerna jabu si lakuh, anak melumang
- Agama Islam, Budha, Hindu, Katolik, Konghucu.
- Kerna Pemerintah, rsdna.
17. Koor/Vokal Group/Puisi
18. Tekad ras pengutusen (Perp. tedis)
L : Natal mabai kam nggeluh ibas kata Dibata jadi tendang man
nahendu.
P : Tetap aku nggeluh ibas Kata Dibata maka terang ukur kami
dingen terang geluh kami.
L : Ketubuhen Yesus mpengasup kam tetap nggeluh ibas
Kata Dibata maka terang kegeluhendu.
P : Kualoken Yesus ibas pusuhku si mabai aku tetap nggeluh ibas
Kata Dibata.
L : Kata eme ulu kegeluhen, janah kegeluhen e maba terang man
manusia
P : Tetap aku nggeluh ibas Kata Dibata maka kegeluhen si rasa alap
jadi sikerajangen kami.
L : Kalak si nggeluh ibas Kata Dibata malem atena dingen geluhna
erguna ku kerina tinepa Dibata.
P : Tetap aku nggeluh ibas Kata Dibata maka malem ateku ndalani
kegeluhen tep-tep wari ras malem ate kami
kerina.(Sisalamen kawes ras kemuhen janah melasken: Kata
Dibata Tendang Geluhta ).
19. Rende : PEE No. 204 : 1 - 3
Kata ni Dibata, seh kel e perluna ‘bas geluh enda
Ogelah Pustaka, je Ia ngerana man banta k’rina
Gegeh ibas geluhku, katandu si tuhu-tuhu
Ras pasu-pasuNdu
Kata ni Dibata, e jadi senjata bas geluh enda
Lawanlah musuhta, la arah gegehta ipemenangNa
Tetap kal ukur kami, la lit kebiaren nari
Tuhan si nampati
Mari kita k’rina, si begi kataNa tutus ateta
‘Di nggit ngalokenca, b’rekenNa dameNa ku bas pusuhta
8
 Ola lupa min dage, Kata Dibata si pake
Si petetap ate
20. Pertoton Tuhan
21. Pengutusen & Pemasu-masun
L : Berkatlah, tetaplah kam nggeluh ibas Kata Dibata dingen
pembarkenlah kataNa e ibas kegeluhenndu tep-tep
wari.Tetaplah ukurndu, Dibata si ngarak-ngarak
kegeluhenndu. Guna jadi gegehndu, alokenlah pasu-pasu
idur Dibata nari: Dibata, si mada perkuah ate, si enggo
nenahken kam ku kemulianNa si rasa lalap, Ia lah si
njadiken kam tetap, megegeh dingen paguh. Ia nge si
mada kuasa rasa lalap. Amin
Perp : A...min... A...min... A...min... (iendeken)

PERAYAAN NATAL IATURKEN PANITIA.

Selamat Hari Natal, 25-26 Desember 2016

&
Selamat Tahun Baru, 1 Januari 2017