1.

0 Panyun Jaku

Jaku Iban udah dipelajar berengkah ari era perintah Brooke ba sekula misyen Kristian di

pelilih menua Simanggang (Chemaline, 2013; Nelson Tandang, 2019). Bepun ari ubah

dalam pengawa transformasyen perintah, Jaku Iban udah dipasukka nyadi siti ari mata

pelajar dalam sistem pelajar sekula lalu dikerembai nengah mayuh bengkah institusyen

baka palan pelajar tinggi enggau palan matih pengajar. Berindik ari Akta Pendidikan 1996,

Jaku Iban mujur dikemansangka lalu bulih penuduk ti tegap ba sistem pelajar menua

Malaysia. Urung taun 2011, mata pelajar Jaku Iban nyadi siti ari mata pelajar elektif (Eltherty

Philip, n.d.). Nya alai, Jaku Iban mega dipelajarka ngagai nembiak bansa bukai di sekula.

Beserimbai enggau pengawa transformasyen, Opis Menteri Pelajar Malaysia, nyilih KBSR

ngagai KSSR lalu berindik ari nya, DSKT dikena dalam semua mata pelajar ti ngundan

kurikulum, standard isi enggau standard pelajar. Nyadi, DSKT Jaku Iban dikena dalam mata

pelajar Jaku Iban ke ngundan langkar kurikulum, pedagogi enggau tisih betukuh

evolusionari. Kebuah DSKP tu ditusun dikena narak nembiak ngambika sida ngembuan

pengelandik berkomunikasyen ngena Jaku Iban standard dalam mayuh bengkah konteks.

Nambahka nya, ngambika nempa nembiak ti ngembuan pengelandik dikena napi pengawa

ba abad ke-21 lalu ulih besemekih ba dunya global. Nyadi, DSKT Primari 2 udah dipilih kena

ngaga serenih analisis senentang pengelandik jaku dalam DSKT nya.

2.0 Serenih Analisis Pengelandik Jaku enggau Isi DSKT Primari 2

2.1 Pengelandik

Chemaline dalam Chemaline enggau Padang (2011) mantaika penemu iya madahka

pengelandik jaku mai reti nyebut munyi jaku ti dipansutka nengah rengka artikulasyen.

Pengelandik macha siti ari pengelandik ti udah ditusun dalam DSKT Jaku Iban sereta

beguna bendar ba proses ngajar enggau belajar. Taja pia, pengelandik bukai baka mending,

bejaku enggau nulis patut mega ditarak enggau menuku. Nitihka Diksionari Dewan renggat

ke-4 (2005), macha ngemai reti nemu meretika teks lalu belematika reti iya. Nitihka Atan
Long, macha nya bekaul enggau penemu ngelala entak sebut sereta nerangka entak sebut

ke dikenataika dalam teks chelak lalu Leferre (1973) madahka macha nya siti proses ti

bekaul bendar enggau jaku dikumbai a language related process (Inggit Barau, n.d.).

Belematika dalam DSKT Primari 2, tumpu pengelandik macha ari aspek dikena nguji tikas

pemereti macha lalu ulih meri respons, nengkua mayuh teknik macha sereta ulih mansutka

penemu senentang teks ke dibacha ngena jaku ti nemban. Nya kebuah, tuju ngembuan

pengelandik macha ari sukut guna komunikasyen lebuh berinterasyen, nerima enggau

mantaika buah runding. Nya alai, pengajar patut nyungkak pengeransing nembiak macha,

betatika pengelandik sida macha ari nyebut munyi urup, patah sebut enggau leka jaku

sereta dikarapka ulih nyerenih reti ari teks ke udah dibacha. Bala nembiak patut nengkua

pengelandik macha nitihka atur dalam Pelan Induk Pembangunan Pendidikan (PIPP) 2006 -

2010.

2.2 Standard Isi

Standard Isi ngaraka tikas minimum pengelandik jaku ti patut ditarak sereta ditemu nembiak

sepengalama enam taun besekula. Standard isi ngembuan penemu ti spesifik senentang

pekara ke patut ditemu nembiak sepenembu sida belajar ke nyengkaum aspek penemu,

pengelandik enggau ukur pemanah (Noriati A. Rashid et al., 2016). Ambika chunto, nembiak

primari 2 patut ngembuan pengelandik macha enggau ngelala leka jaku nyentukka ulih

macha ayat mudah. Nambahka nya, nembiak ulih beratika sepil lalu macha enggau

intonasyen sereta ekspresyen ti seriran enggau reti iya ti nyemetak. Pia mega, nembiak

dikarapka ulih macha mayuh leman kereban literari baik ka bechelak tauka enda bechelak

ke tuju beperindang. Standard isi dalam DSKT tu betumpuka elemen neresa kurikulum baka

jaku enggau ukur pemanah. Kebuah pia, pengelandik macha ngemansangka penemu ti

dikembuan bala nembiak ari aspek bekenaka jaku lalu ngayanka pemai ulah manah ti

nyadika lalau ba pengidup ninting hari.

2.3 Standard Pelajar

Standard pelajar iya nya tikas kualiti profisiensi tauka utas pelajar ke patut dikemeran

kelebih agi ditaga ulih dikembuan nembiak ba ninting peringkat besekula (Noriati A. Rashid
et al., 2016). DSKT Primari 2 mandangka tikas penemu, ukur pemanah enggau pengelandik

ti patut dikuasa nembiak. Ambika chunto, nembiak primari 2 patut udah nemu nyediaka diri

macha. Nyadi, tikas kualiti ti patut dikembuan nembiak iya nya nentuka munyi patah sebut

sereta ngembuan pengelandik nyebut leka jaku ti ngundan siti ngagai tiga iti patah sebut.

Lebuh nembiak nyediaka diri macha, sida patut ngayanka penaluk runding ke pengawa

macha teks. Nyadi, tisih deka dipejalai belaluka standard pelajar tu dikena nentuka penuduk

nembiak ba tikas pemansang pelajar iya. Tumpu jurai standard pelajar nyungkak

pengelandik abad ke-21 ari sukut landik bekomunikasyen.

3.0 Ngajar enggau Ngemudahka chara

Kemaya hari tu, pengajar endang disadang nyadi kreatif enggau inovatif ari perspektif

bekenaka mayuh leman teknik ngajar. Kebuah pia, pengelandik abad ke-21 berfokuska

nembiak lalu pengajar ngemudahka chara langgur belajar. Pengelandik tu ulih dipejuraika

nengah eleman ke beguna bendar kemaya hari tu nyengkaum komunikasyen, sains enggau

teknologi, pemai ulah sereta pengarap ulah enggau ukur pemanah (Ainun Rahmah et al.,

2017). Nya alai, pengajar jeman diatu meseti bisi penemu senentang pedagogi abad ke-21

ngambi nyadika lalau lebuh ngajar sereta ngemudahka chara nembiak ngauk penemu (Siti

Saleha, 2019). Aktiviti baka macha beraban, macha enggau nyawa nyaris, macha ensera

sereta macha ekstensif ulih merangsang kualiti aktiviti macha. Udahnya, sanding enggau

kereban bantu ngajar ke deka dikena ngenataika isi pelajar baka bup bechelak enggau kad

leka jaku. Kelimpah ari nya, kereban elektronik baka LCD, radio enggau kereban

pengerekod mega ulih mantu ngelancharka aktiviti ngajar enggau ngemudahka chara.

Pengawa tu merangsang nembiak chakah dalam interasyen enggau komunikasyen

ngambika ulih nyungkak daya pikir nembiak sechara kritis, kreatif enggau inovatif.

Nambahka nya, kereban elektronik beguna ari aspek tarak perindang ke tau ngerindu sereta

ngelantangka ati nembiak lebuh diberi awak belajar sambil beperindang. Pengajar patut

narakka penemu pemesai guna teknologi enggau betul ngagai nembiak ngambika sida sikar

enggau chakah bekenaka teknologi baru.

3.0 Tuduh Penemu

Nya alai, lebuh pengawa ngajar enggau ngemudahka chara, pengajar patut bepegai ba

tusun DSKT ti mungkur tuju, standard isi enggau standard pelajar. Pengajar patut narakka

penemu enggau mandangka pengelandik ti betul, terang enggau nyemetak senentang

pekara ti patut dipelajarka nembiak sida. Nambahka nya, empas pemansang dunya balat

minta bala pengajar nyadi kreatif enggau inovatif lebuh ngajar nitihka singkang pemangsang

dunya teknologi ngambi ulih nyungkak nembiak ke ulih bepikir ba tikas tinggi ngujungka ulih

besemekih ba global.