IBADAH KELUARGA GBKP

SENIN, 20 JUNI 2022

1. Rende KEE 278 : 1, 3 “Kudahi Rumah Persembahen”
(Ibabai Anak)
Kudahi rumah persembahen
Segelah aku jumpa Tuhan
Ban Ia sumbul keriahen
Nggo b’reNa bangku kesangapen
Reff. Ersada me anakNdu k’rina
Bas kiniteken tetap paguh
Bagem biak anak Dibata
Tetap nembah ras muji gelarNdu
Begikenlah kata Dibata
Em kap si nerangi geluhta
Jadikenlah wari-warinta
Penembahenta e man baNa
Reff.
2. Ertoto (Ibabai Nande)
3. Renungen (Ibabai Bapa)
Teks : Matius 11 : 25 - 30
Tema : Reh Ndahi Yesus
Pernah nge kam ngenanami kendelen ate? Latih dingen kote
iakapndu erkiteken mberatna persoalen si arus inanamindu i bas
geluh enda? (bere kesempaten man bapa ntah nande bage pe
anak-anak si atena nuriken perbebenna). Banci jadi mulai medak
erpagi-pagi seh ngayak muat tunduh berngi mbue masalah si
iukuri kita. Banci jadi persoalen keuangen keluarga, usaha
mandek, beban pendahin, kesehaten si terganggu erkiteken
penakit si ndenden, persekolahen si la erngadi-ngadi ibereken
tugas-tugas, ras sidebanna kerina. I bas ketutusen ate ku Dibata
pe megati siakap kehadirenta i bas dahin gereja bagi tempa sia-
sia, labo lit kemajuanna, jalan di tempat saja nge, ntah seh ka
nge perukurenta guna surut i bas ketutusen ate ersembah man
Tuhan. Seh maka kebiaren, kearun ate lalap si ngarak-ngarak
perdalanen kegeluhenta si reh dekahna reh kotena.
Sekalak rohaniwan Amerika gelarna Abraham L. Feinberg, nulis
kerna sepuluh cara guna menikmati kegeluhen enda. Salah sada
ikatakenna e me : “berhentilah khawatir”. Kebiaren banci
meneken kegeluhen. Pustaka Si Badia pe ngatakenca maka
kebiaren ntah pe aru ate e la lit gunana erkiteken aru ate
erbahanca keriahen lesap (Kua. 12:25), janah sekalak pe kita labo
ngasup nambahi umurta alu aru ate ntah kebiaren (Mat. 6:27).
Alu bage dage marilah siampeken kerina kearun ateta man Tuhan,
sebab nina Tuhan, endeskenlah kerina kearun atendu man
bangku. Asa ndigan pe labo kam Kutadingken. Teklah kita maka
Tuhan Yesus e keleng atena kita kerina. Doni enda banci saja
 berubah, tapi lit kap Dibatanta si tetap keleng ateNa, kuasaNa,
gundari nari seh rasa lalap.
4. Pertoton Sapaat asa bancina doa berantai, mulai bapa
notoken si arah kawesna, bage seterusna
5. Rende KEE No. 197 : 1 - 4 “Kesah Tuhan Nusurlah”
(Ibabai Nande)
Kerina : Kesah Tuhan nusurlah, ku bas perpulungenNdu
Ukurna pe tetaplah, ernalem saja baNdu
IdiloNa perdosa, niNa kapen man bana
“Kam si latih ras mberat, Aku bandu Penampat”
Bapa : Kesah Tuhan erdilo, ibas dalin mesera
Adi aku terpanto, bas dalin geluh enda
Lalap kap daramiNa, aku ilebuhiNa :
“Kam si latih ras mberat, Aku bandu Penampat
Nande : Kesah Tuhan bengketlah, ku bas pusuh kami e
La lit gegeh la kesah, ngasup Kam nampati pe
Tangkas sora Pendilo, Tuhan kapen erdilo :
“Kam si latih ras mberat, Aku bandu Penampat”
Anak : Kesah Tuhan erkuasa, la tersipati kita
Arah e pe Dibata, nemani geluh enda
Mari oge Pustaka, je ngerana Dibata :
“Kam si latih ras mberat, Aku bandu Penampat”
6. Pertoton Tuhan (Ibabai Nande)