IBADAH KELUARGA GBKP

JUMAT, 24 PEBRUARI 2023

1. Rende : KEE No. 123 : 3 “Ipasu-pasu Tuhan Dibatandu”
(Ibabai Nande )
1. Meriah kal iakap orangtua adi anakna ngikut ajar e
E malem ukur si mesui lupa, ‘di la njuruken lagu anak e
Senangna e ‘di Tuhan si perkuah
Rembak kin rusur ras dahinna e
Ipasu-pasu Tuhan daten tuah,
Je malem-malem me ukurna e
2. Ertoto (Ibabai Anak)
3. Renungen (Ibabai Bapa)
Teks : Kejadin 27:1-29
Tema : Meherga Kal Kap Pasu-pasu Orangtua
Lit lagu si cukup terkenal kira-kira bagenda lirikna “harta
yang paling berharga adalah keluarga, istana yang paling megah
adalah keluarga” lagu enda tercipta guna jadi lagu tema sada film
si erjudul Keluarga Cemara. Engkai makana lagu enda cukup
melala kalak si menyukaisa? Selain nada na gampang kata-katana
ntah pe lirikna e melala kalak setuju, ntah pe pas iakapna lirikna
e. Bas keluarga e lit bapa, nande bage pe anak.
Kalak Kristen pe cukup jelas nerangken kerna sada keluarga
terkhusus hubungen antara orang tua ras anak, bage pe sebalikna
anak nandangi orang tua. Salah sada contoh i bas kitab Padan Si
Ndekah arah sepuluh pedah Dibata si nomor 5 ikataken man anak,
“gelah ngaloken kejuah-juahen ras umur nggedang/cawir metua,
e maka aruslah mehamat man nande ras bapa” (Ul. 5:16). Labo
terjeng bas Padan Si Ndekah, i bas Padan Si Mbaru pe melala
iterangken hubungen antara orang tua ras anak, uga orang tua
arus engkelengi anakna, ula pesega-sega si erbanca ia merawa
(Ep. 6:4).
I bas bahan renungenta sendah, jelas iidah cerita i bas
keluarga Ishak (Bapa), Ribka (Nande), Esau ras Jakub (anak). Bas
keluarga kalak Jahudi seh kel pentingna, mehagana, mehergana
kerna ngaloken pasu-pasu arah orang tua (Bapa). Mungkin adi si
oge cerita bas Alkitab e ndai, si idah lit kecurangen si ibahan Jakub
ras Ribka nandangi Esau ras Isak. Tapi di luar si e (renungenta
sendah la si bahas ku cerita antara Jakub ras Esau) cerita enda
encidahken uga mehergana ndatken pasu-pasu arah orang tuanta
nari. Adi nggo ndatken pasu-pasu e, enggom kita ngaloken si
mehuli-mehulina bas geluhta, pasu-pasu si utama nggo me jadi si
kerajangenta. E maka Jakub rusaha kal ndatkenca, gelah ia
ngaloken pasu-pasu e.
Arah reningenta sendah iingetken man kerina kita subuk
orang tua terkhusus si lit denga orangtua na bas doni enda, bage
pe nandangi anak-anak itengah jabu, marilah sikelengi orangtua
 nta. I bas kita engkelengi ia, merawat ia (adi nggo metua/sakit),
ntah pe i bas kita megiken katana, bage pe mehamat man bana,
kita ngaloken pasu-pasu orang tua nta e. Gelah seh toto si
belaskenna ndube ku kita anak-anakna tentuna si reh idur Dibata
nta nari. Ula min sempat turah morah-morah ta segedang-gedang
geluhta adi kari enggo lawes orangtua ta nadingken kita. Tuhan
ermeriah ukur, Tuhan nemani, janah Tuhan mereken pasu-pasu
si simpar kempak anak si mehamat nandangi orangtuana. Amin
4. Rende: KEE No. 249 : 1,5 “Ajar Aku O Tuhanku” (Ibabai
Nande)
1. Ajar aku O Tuhanku, make kata ras pedahNdu
Kueteh payo as sentudu, kuikutken bas geluhku
Reff : Si ngikut pedah Dibata daten me kerembakenNa
Pedah kata tangkas k’rina, em jadi gelementa
5. Mata ukur nare baNa, gelah peratenNa siangka
Adi g’luhta ikepkepNa, tentu malem kel ateta
Reff : ………
5. Pertoton Sapaat ras Pertoton Tuhan (Ibabai Anak)