Ensera mayau enggau 

chit

Mayau enggau Chit

    Dulu kelia, mayau enggau chit tu bepangan bendar, dataika sida nyau besaum
pengidup sereta begulai pemakai. Nyadi tu cherita ti madahka kebuah alai mayau
enggau chit badu bebakih enggau pangan diri agi lalu bemunsuh.

    Nyadi sekali bisi siku chit diau begulai enggau pangan iya mayau. Seduai iya
berumah dalam lubang kayu ti besai, lalu jauh mega ari jelu bukai. Ngelama seduai
iya udah begulai, sekali pen enda meh kala mansutka jaku jai nganu pangan diri.
Genap hari seduai iya endang nurun begulai bejalai ke kampung ngiga pemakai.

    Hari siti, lebuh seduai iya bejalai ngiga pemakai, dia seduai iya bisi tepedaka
budu dagin jelu. Gaga meh ati seduai iya meda diri nemu utai bakanya. Ku runding
seduai iya, dagin nya deka ditaruh ngambika bisi pemakai seduai maya hari
runggur ujan ila. Maya nya ila pemakai tentu pedis bendar alai ngiga.

    Dagin nya tadi lalu ditaruh seduai iya dalam lubang kayu. Udah nya seduai iya
lalu angkat pulai ke rumah.

    Nyau kelama udah nyau, dia tudah chit tu tadi bisi berunding deka nguji ensepi
asai dagin ti ditaruh seduai iya nya tadi. Nyau kapuas iya berunding deka makai
dagin nya, iya pen bulih runding siti. ”Pagila aku deka nguji ensepi dagin nya,” ku
ati iya. Liur iya pen lalu neritik ngenang diri deka makai dagin nya.

    Nya alai, hari siti chit tu lalu madahka mayau, iya enda ulih enggau bejalai
ngiga pemakai sehari nya. Kenu ku iya, iya udah dipadahka orang, kaban iya bisi
rabat lalu iya deka enggau orang nyenggai orang ke mati nya. Mayau lalu tusah ati
ninga pemati kaban chit munyika dipadahka iya. Iya pen lalu enda mega mai chit
bejalai sehari nya.
Enda lama udah nya, dia deh tudah chit tu tadi pen lalu nurun. Iya enda enggau
orang nyenggai orang ke mati kenu ku iya nya tadi tang lalu bejalai nuju pun kayu
ti endur seduai iya ngelalaika dagin. Datai iya din, iya lalu berengkah makai dagin.
Udah iya kenyang, iya lalu mulaika diri ke rumah seduai iya.

    Hari siti enda lama udah bekau nya, chit lalu bejaku baru enggau mayau,
madahka diri pedis isi, pedis pala enggau pedis perut. Iya madahka diri deka
berubat ngagai manang. Amat mega iya munyi nya, tang tuju ati iya endang sigi
deka napatka pun kayu nya tadi, ngambika ulih makai dagin ti tinggal dia. Nyadi
sekali tu, iya makai dagin nya sampai abis. Mimit pen nadai meh agi tinggal.

    Nyadi hari siti, dia mayau bejaku, ku iya, ”Semua pemakai tua tu udah abis, lalu
kampung pen basah endur ngiga pemakai. Badas tua ngambi dagin ke ditaruh tua
dalam lubang kayu suba.”
    Seduai iya lalu mupuk ga bejalai berimbai-rimbai nuju pun kayu nya tadi. Nyau
kelama, seduai iya pen datai ba pun kayu nya. Tudah mayau lalu ngachukka jari iya
ke dalam lubang kayu nya tang jari iya nadai tegamaka utai. Udah nya baru iya
tepedaka bekau kaki chit ba mua lubang kayu nya. Iya lalu malik ngagai chit.

”Nuan tu meh orang penchuri!” ku mayau nganu chit. ”Aku ngelamatu arap
bendar ke nuan, tang nuan dua kali udah ngemulaka aku. Nuan makai dagin tua
melakangka aku. Nuan tu meh orang rangka. Nya alai enti bakatu mati meh tua tu
laban pemakai nya nadai agi. Dagin tua abis ditengali nuan kediri,” pia ku mayau
nganu chit. Tudah mayau pedis amat ati. Iya lalu deka nerekam chit dia tang meh
chit tu lanchat bendar, lalu engekechit tama lubang kayu nya.

     Lalu belabuh ari maya nya, mayau endang selalu begigaka chit, laban agi deka
bebalaska diri ti udah diakal siku nya. Nya meh pun mayau bemunsuh enggau chit.