1 RAJA-RAJA 3 : 16 – 28
Tadi torang sama-sama so baca deng so dengar tu bagian dari Tuhan pe Firman tu ada di
kitab 1 Raja-raja 3:16-28 tentang tu raja Salomo pe hikmat waktu dia da ambe keputusan.
Kong berhubung deng torang pe bacaan skarang ini de pe tema “Tu hikmat yang dari pa
Tuhan Allah tuntun pa tiap orang for beking tu butul”.
No skarang, kiapa dang tu tema ini perlu for mo angka jadi perenungan for torang pe greja
GMIM? Mari torang pikir apa yang jadi di jaman skarang ini, dalam kemajuan teknologi
yang pe luar biasa, ada banya yang beking gampang tu bole torang samua rasa. Mulai dari
anak-anak, remaja, pemuda, orang tua sampe deng lansia. Mar tu kemudahan-kemudahan itu
cuma beking sebagian orang jadi nyanda bijaksana for jalani tu hidop tiap hari. De pe conto:
media sosial yang da pake bukang for jadi berkat pa orang laeng malatare ja pake for babuli
orang, se tau tu orang pe sala, hakimi orang, deng lei pake for batipu deng beking besae
orang pe nama. Samua tu da bilang tadi, secara nyanda sadar so babunung orang pe karakter,
itu cara yang nyanda manusiawi deng nyanda ada etika.
Tu torang pe bacaan Firman Tuhan skarang ini se cirita tentang tu kasus pertama yang raja
Salomo da mangada akang, abis dia dapa hikmat dari pa Tuhan. Di perikop seblumnya dari
ayat 1 – 15, itu da se cirita tentang raja Salomo pe sombayang, dia da minta hikmat dari pa
Tuhan. Kong Tuhan snang deng tu de pe permintaan itu, trus Tuhan kase tu Salomo da
minta: Tuhan kase hikmat pa raja Salomo. Trus skarang lewat tu torang pe bacaan di ibada
ini, torang baca kalu tu raja Salomo da mangada satu kasus, ada dua orang parampuang nakal
yang da baku rampas anak. Kalu cuma mo lia dari tu dua parampuang ini pe latar blakang,
sebenarnya raja Salomo bole ada alasan for nyanda farduli akang tu kasus ini lantaran dorang
dua itu parampuang nakal. Mar sebenarnya waktu itu saja Salomo pe kebesaran hati raja
sementara da dapa tes, paling utama tantu katu bagimana dia mo pake tu hikmat yang Tuhan
Allah baru da kase pa dia.
Hikmat, itu jadi dasar dari raja Salomo pe kekuatan waktu dia ambe keputusan for se klar
satu kasus ato masala. Dalam dia pe kewibawaan, dia lei pake tu hati yang punung deng
sayang deng kelembutan mar tegas waktu dia beking keputusan. Dia nyanda pili-pili orang,
mar dia lia samua orang itu sama. Samua orang pantas deng ada hak for mo dapa hormat
deng dapa tolong ato samua orang ada hak for mo dapa keadilan. Tu parampuang-
parampuang di cirita ini pe status ternyata katu nyanda jadi alasan for raja Salomo nyanda
mo trima dorang pe kasus. Dia tetap trima tu kasus for se klar tu dorang pe masala yang dong
samantara da mangada akang.
Tu raja Salomo pe sikap hati ini no yang beking Tuhan suka for se kanal ato se tunjung tu
Dia pe kebesaran hikmat lewat raja Salomo. Lewat raja Salomo ambe tindakan pake alat
hukum tu peda for jalang keadilan. Kalu Cuma lia bagitu, torang katu lia kalu sepertinya tu
Raja Salomo pe sikap deng cara for beking keputusan tu kasus itu, dapa lia nyanda
manusiawi deng sama skali nyanda maso akal. Dia mo se korban tu pribadi yang nyanda
berdosa for kase keadilan for dorang yang berdosa. Tu bayi yang dua parampuang da
samantara da baku rampas akang itu blum tau apa-apa. Mar di sini no tu titik awal dari
keadilan hukum Allah dalam ni cirita ini. Raja Salomo so trima hikmat dari Allah deng so
beking tu keadilan Allah itu lewat dai ambe satu keputusan. Dari tu keputusan itu bole dapa
tau sapa tu bayi itu pe mama yang sesungguhnya.
Tu dua parampuang di cirita ini sebenarnya mewakili torang samua orang yang berdosa. Mar
pertanyaan for torang samua: Di tenga-tenga tu torang pe keberdosaan, apa torang ini masi
ada hati deng tu kebenaran? Apa masi ada tampa pa torang pe hati for cari deng dapa akang
tu kebenaran? Tu dua orang parampuang di cirita ini datang pa raja deng tujuan deng lei
harapan for bole mo dapa tu kebenaran deng keadilan biar lei nyanda samua yang mo butul-
butul trima tu butul deng beking yang butul. Kadang torang lei so datang pa Tuhan, mar
torang masi tahang tu torang pe sikap hati yang sala deng glap. Torang masi jadi pribadi
yang ja iko tu suara hati yang jaha, tu pikiran yang jaha deng sikap yang jaha. Mar sama
deng tu pepatah yang bilang bagini, ‘Sepandai-pandainya tupai balumpa, tu tupai pasti mo
jatung lei.’ No bagitu lei deng tu parampuang yang so beking tu de pe anak sandiri mati
lantaran de pe kesalahan. Dia musti trima, tunduk deng malo deng tu pernyataan hikmat dari
Allah yang so kase pa raja Salomo.
Biar lei tu cirita di Alkitab ini nyanda se tau deng jelas tu akhir dari tu parampuan jaha yang
ada di cirita ini, mar pasti tu parampuang itu dapa beking “mati kutu” deng tu de pe
kejahatan sandiri. Mar biar lei bagitu, baharap katu kalu dia bole lia tu keadilan dari Tuhan
pe hukum yang tetap mo bapihak pa yang butul.
Hikmat dari Tuhan mo se tunjung sapa tu orang yang hidup butul deng sapa tu orang yang
hidop nyanda butul. Yang hidop butul, dia itu no yang mo dapa hadia kebenaran. Itu no tu
parampuang yang memang bayi itu pe mama da dapa, dia dapa hadia kebenaran. Dia dapa
ulang tu dia pe hak secara adil lantaran dia pe keputusan nimbole mo dapa ruba deng dapa
rampas dari pa dia.
Tu sayang se kala banya skali dosa …. Ini no tu bukti Firman yang setunjung pa torang
samua. Tu sayang deng hikmat yang dari pa Allah da sertai pa raja Salomo. Dia pe
kepemimpinan bukang lantaran di ape pande, hebat deng lantaran de pe papa Raja Daud pe
anak, mar dia pimpin tu de pe rakyat pake tu kekuatan deng hikmat dari pa Allah. Hikmat
dari Tuhan butul-butul da kuasai tu Salomo pe hati, itu bole dapa lia lantaran dia itu nyanda
perna gagal for se klar tu masala deng persoalan yang jadi de pe tanggong jawab sbagai
pemimpin. Tuhan so beking Salomo jadi raja yang basar lantaran waktu dia bapimpin, dia
beking Tuhan Allah jadi dia pe pemimpin deng Tuhan Allah yang tentukan samua tu dia pe
keputusan pa de pe hidop.
Torang percaya kalu Tuhan Allah deng Dia pe Firman itu dasar for torang pe hidop. Torang
bole mo se gambar tu dasar itu sama deng tu dasar dari satu bangunan. Tu dasar itu nyanda
dapa lia padahal sebenarnya itu no yang da tongka ato topang tu satu bangunan. Kalu nyanda
ada dasar yang kuat, tu bangunan itu nimbole mo badiri deng kuat. Bagitu lei deng tu torang
pe hidop, torang musti beking itu Tuhan pe firman jadi torang pe kekuatan dalam hidop .
Sbagai warga GMIM, torang bersyukur atas suksesnya satu program dari GMIM yang so
libatkan macam-macam denominasi serta samua lapisan masyarakan yang ada di Sulawesi
Utara deng dunia. Program “Rame-rame babaca Alkitab sluru PB Bahasa Manado” yang da
mulai dari mulai tu tanggal 1 Februari 2021 deng tu de pe puncak so beking kalamaring,
tanggal 26 Juni 2021. Syukur pa Tuhan lantaran lewat penayangan dari multimedia GMIM,
banya orang yang bole mo dapa berkat dari kegiatan itu deng so banya lei yang da se bagikan
tu tayangan-tayangan itu supaya lei bole mo se berkat pa orang laeng.
Banya orang yang so kase kesaksian iman kalu dorang banya dapa berkat deng tu Tuhan pe
Firman yang ternyata gampang skali for mo mangarti akang. Torang percaya kalu samua ini
lantaran Roh Kudus yang so bakarja deng so kase akang tu hikmat dari Tuhan, bae itu waktu
proses penerjemahan samantara berlangsung mar lei waktu tu terjemahan itu so jadi kong
torang pake hari-hari. Torang percaya kalu deng torang slalu blajar tu Tuhan pe Firman,
torang pe hati deng pikiran pasti mo lebe tabuka denga lebe kanal dekat pa Tuhan. So itu
mari jo torang minta trus hikmat dari pa Tuhan deng slalu beking tu Firman Tuhan sbagai
dasar hidop dari torang yang percaya. Itu supaya Tuhan bole mo tuntun trus pa torang for
beking tu butul iko Dia pe mau. Amin