Ratu Ester

“ Berani di saat Bahaya “

Dolo-dolo ada satu orang parampuang, dia paleng cantik skali ….

Dia pung nama to Ester, Ester ni dia su seng ada mama deng papa lai dia tinggal deng
dia pung om. Dia pung om ni nama Mordekhai. Ester tinggal di kota Persia tapi dia ini bukan
orang Persia, dia tu orang Yahudi. Satu kali ni Ahasyweros Raja Persia biking pesta paleng
basar lalu Raja undang samua orang par datang, Raja ni kasih kaluar parenta supaya Ratu
Wasti ni pake dia pung Mahkota la datang di pesta. Tapi Ratu Wasti ni dia seng mau, dia bale
biking pesta di dia pung istana sandiri. Akhirnya Raja paleng marah paskali, Raja langsung
biking undang-undang par lapas Mahkota dari Ratu Wasti pung kapala.

Akang pung sore-sore bagini, Raja ni parenta dia pung ana-ana buah par pi kumpul
cewe-cewe yang cantik di kota Persia tu supaya Raja bisa pilih satu par ganti Wasti jadi
Ratu. Raja ni lia Ester yang paleng cantik rupawan, langsung Raja suka dia. Lalu Raja ambel
Mahkota la taruh di dia pung kapala. Ester pung om tu janji par dia bagini “ diam-diam sa
jang bilang par sapa-sapa e… kalo ester ni orang Yahudi.

Ester pung om Mordekhai ni duduk di muka pintu gerbang istana, lalu Mordekhai ni
dengar ada dua orang yang rencana mau bunuh Raja. Mordekhai langsung pi kasih tau par
Ratu Ester, lalu Ratu Ester bilang akang par Raja atas nama Mordekhai. Pas pengawal pi
priksa bagini yang Mordekai bilang samua tu batul, lalu dua orang itu dapa hukuman,
sedangkan perkara ini dong tulis akang di buku sejarah kerajaan.

Abis kajadiang itu ada satu orang dia pung nama Haman dia orang Agag. Dia paleng
kaya deng dia pung pangkat lumayan basar lai di istana, kalo dia lewat di pintu gerbang to
samua orang musti tundu par dia, karna memang itu parenta dari Raja. Tapi Mordekai ni dia
sandiri-sandiri seng mau tundu waktu Haman lewat, lalu Haman paleng marah skali… pas
Haman cari tau bagini dia dapa tau kalo Mordekai ni dia orang Yahudi. Lalu Haman mulai
biking rencana par kasih musnah samua orang Yahudi yang ada di Persia. Haman pi di Raja
la hasut Raja par biking undang-undang supaya kasih musnah orang Yahudi. Haman berhasil
biking Raja supaya akang undang-undang tu kaluar.

Waktu Mordekhai dengar kabar itu, Mordekai paleng sedih, Mordekhai pake pakiang
perkabungan la datang di muka gerbang istana. Ratu Ester suruh dia pung dayang-dayang pi
tanya Mordekai kanapa dia pake pakiang perkabungan?. Mordekhai kasih tau samua par
akang dayang-dayang tu supaya pi bilang par Ratu Ester, Mordekai jua minta Ratu Ester
supaya minta karunia par bela dia pung bangsa. Lalu Ratu Ester bilang bagini, “ seng ada satu
orang lai yang bisa pi baku dapa deng Raja kalo seng dapa panggel, kecuali Raja kasih ulur
antua pung tongkat emas saja “. Lalu Ratu Ester bilang par Mordekhai bagini “ kumpul
samua orang Yahudi lalu puasa par beta selama tiga hari, supaya beta pi menghadap Raja biar
beta pung nyawa jadi taruahan”. Lalu Mordekai biking kaya apa yang Ratu Ester suruh.

Pas hari ke tiga Ester pake dia pung pakiang Ratu la pi menghadap Raja. Waktu Raja lia Ratu
Ester datang langsung Raja ulurkan dia pung tongkat emas tu, la Ratu Ester pi sonto akang
ujung tonkat tu. Lalu Ratu Ester undang Raja deng Haman par pi datang di perjamuan, Raja
deng Haman penuhi Ratu Ester pung permintaan. Lalu malam itu to Raja seng dapa tidor, lalu
Raja parenta pengawal par pi ambel buku sejarah istana. Waktu Raja baca akang buku tu,
Raja dapa tau kalo Mordekai pernah tolong Raja. Akhirnya Raja kasih kehormatan basar par
Mordekai. Akang pung beso Raja panggel Haman, Raja bilang mau kasih hadiah par orang
yang pernah slamatkan Raja pung hidop. Haman ni paleng sanang dia kira dia yang dapa
hadiah itu padahal bukang. Raja kasih pakiang deng kuda par Mordekai, la bajalang kaliling
kota tu. Lalu akang pung sore Raja deng Haman dapa jamu dari Ratu Ester, Lalu Ratu Ester
bilang Haman pung rencana samua par Raja, Pas Raja dengar itu Raja paleng marah skali,
pas Haman lia Raja marah dia mohon-mohon par Ester supaya ampuni dia pung nyawa.
Akhirnya Raja kasih hukuman par Haman, tiang yang dia siap par gantong Mordekai tu,
akhirnya dia yang dapa gantong di situ. Lalu Raja biking undang-undang supaya orang
Yahudi tetap tinggal di situ saja. Samua orang Yahudi paleng bersyukur, karna Ratu Ester su
kasih slamat dong dari ancaman Haman.

- Jadi beta mau bilang par katong samua ni : katong harus hidop kaya Ratu Ester, biar
su jadi Ratu lai dia seng pernah sombong dia tetap bela dia pung bangsa. Deng Ratu
Ester tu paleng barani rela korankan dia pung nyawa par dia pung bangsa.
- satu lagi tamang-tamang kantong mesti sama seng ratu ester, yang rajin berdoa par dia
pung bangsa.
Katong jua musti bisa berdoa par katong pung bangsa dng Generasi nih..

Dangke lai tamang-tamang su mau dengar beta pung carita

Syalom
Tabea