BIBB2013R

LATIH EP TOPIK 1:
1. Pejuraika empas Filosofi Pelajar Bansa
ngagai sistem pelajar di Malaysia
2. Pejuraika empas Filosofi Pelajar Bansa
ngagai pelajar Jaku Iban di sekula.

NAMA: JESSICA ANAK JAWIE

 Pejuraika empas Filosofi Pelajar Bansa ngagai sistem pelajar di Malaysia
Meri pemansang ngagai atur pengawa kurikulum enggau kokurikulum di sekula

Filosofi tu meri empas ngagai atur pengawa kurikulum enggau kokurikulm di sekula. Empas ti ulih
diperatika nyadi ianya, pengawa kurikulum enggau kokurikulum ti diatur sekula majak mansang ari sukut
atur sereta nerima sambut ti manah ari bala nembiak. Ari juluk filosofi nya, kepala pengajar enggau bala
pengajar deka chakah agi ngemujurka pengawa kurikulum enggau kokurikulum ba sekula.

Chunto iya, ari pengawa kokurikulum. Sekula deka ngatur pengawa sukan. Bala pengajar deka ngelalau bala
nembiak ngambika ngambi bagi dalam pengawa sukan tu. Nembiak mega diberi bemacham perais ti
manah ngambika sida ransing agi deka ngambi bagi dalam pengawa ti diatur sekula. Enggau chara ti bakatu,
sekula ulih nemu potensi enggau pengelandik tiap iku nembiak sekula. Nembiak mega dilalau enggau
pengawa ti manahka pengerai enggau emosyen. Nembiak ti bisi mantaika potensi sida ba sesebengkah
sukan, sekula deka ngemujurka sida datai ba tikas ti lebih tinggi.

Pia mega maya nembiak belajar dalam kelas, bala pengajar ngena bemacham chara maya ngajar nitihka
pemansang dunya. Chunto iya, pengajar tau suah bekenaka chara mantaika video, naburka bemacham
audio nitihka topik ti deka diajar sereta suah agi ngatur bala nembiak duduk begulai dalam raban. Pengawa
beraban bakatu manah diatur suah laban bala nembiak ulih sama bekunsika penemu sereta ngemeranka
reti beserakup ngereja pengawa. Ukai semina mujur ba pengawa kokurikulum tang nembiak mega ulih
diperansang ba pemujur dalam pelajar sereta nyerap mayuh ukur pemanah ari ti diajar bala pengajar
sereta pengarap ngagai Tuhan ngambika nyadi lalau pengidup sida dataika jemah ila. Sekula ulih nempa
nembiak ti setimbang ari sukut jamani, emosyen, rohani enggau intelek, enggau nya ulih mantu nyapai
juluk Filosofi Pelajara Bansa.
 Pejuraika empas Filosofi Pelajar Bansa ngagai Pelajar Jaku Iban di sekula
Atur Pelajar Jaku Iban diatur enggau manah agi

Empas Filosofi Pelajar Bansa tu ngasuh pelajar Jaku Iban majak diatur enggau manah agi di sekula. Chunto
iya, maya nembiak belajar mata pelajar Bahasa Iban dalam kelas, bisi aktiviti ti digaga dikena nyungkak
pengelandik nembiak dalam bungai jaku baka bedindang enggau bepantun bulan. Bisi nembiak ti berani
sereta mantaika pengelandik diri maya diasuh nyadaka dindang tauka pantun bula tu, bisi mega nembiak
semina ‘malu tekuyung’ lalu nitih belubah aja. Pengajar ulih ngiring nembiak sereta meri peluang ngagai
sida ti agi malu nguji nyadaka dindang tauka ke bukai ba mua pengajar empu dikena meransang pemerani
ati nembiak udahnya baru ba mua mayu. Pia mega pengajar enda tinggal enggau jaku puji ngagai semua
nembiak baikka nya manah tauka enda.

Nyadi sekula tau ngemansangka agi atur pelajar Jaku Iban tu enggau chara nambahka aktiviti ti diajar
dalam kelas ba pengawa Minggu Bahasa ti diatur Panitia Bahasa Iban. Ambika banding, enti suba semina
bisi pekit macha ensera Iban, ngajat, ngarang tauka belagu, tang ke diatu aktiviti bukai ti dipelajar nembiak
dalam kelas baka bedindang, begigaka entelah, enggau bepantun bulan deka dipasukka dalam pengawa
Minggu Bahasa Iban tu. Bala nembiak mega ulih ngujika pemerani ati diri enggau bepekit kelebih agi maya
ti bediri ba mua mayuh. Bala pengajar ulih meratika bala nembiak ti amai ulih nguasa pengelandik ti
dipelajar ba dalam kelas nengah pekit maya Minggu Bahasa ti bakatu.

Nembiak ti landik enggau mujur nguasa Jaku Iban ari atur pelajar ke bakatu, deka nyulut sereta
ngemeranka bemacham pengelandik Jaku Iban ngambika enda pukas pia aja. Pengawa tu ulih ngasilka
peranak menua Malaysia ke bepenemu, bepengulih, beulah mulia, ulih nangkup pengawa sereta teulihka
asai pengelantang ke diri empu lalu mantu nambahka pengelantang pendiau ngagai ruang bilik sereta
raban bansa. Bala nembiak mega endang ditarak enggau bemacham pengelandik sereta penemu pelajar
laban sida tu kunchi ngagai pemansang menua Malaysia.