BAB 2

TINJAU PEMACHA

2.1. Pelasar

Berindik ari penanggul teruan sekula ti majak balat nyadi, pemansik bulih idea deka
mansik penanggul teruan sekula tu ngambika penanggul tu ulih diputarka enggau
jampat sepengudah nemu nama kebuah tauka faktor penanggul teruan sekula tu
majak nyadi. Dikena bejalaika pansik tu enggau semitan agi, siti teori bekaul enggau
pansik udah dikena dalam pansik. Teori ti dikena pemansik iya nya Teori Sosial
Bandura (1986). Teori tu meri penekan bakani rampa pendiau ngelingi (persekitaran)
meri empas ngagai ulah mensia. Nangkanka nya, pemansik mega nyeritaka langkar
konseptual pansik dikena ngenataika perampa pansik sechara ngelansa ngagai
pemacha. Kepenudi, pemansik mega bisi bekunsika pansik ti udah digaga orang
bukai ba menua Malaysia enggau ba luar menua Malaysia bekaul enggau penanggul
teruan sekula.

2.2. Teori enggau Model Pansik

 B
Behavior
B = Pemai Ulah
Gaga, jampat ringat, manah ati, kepapas

P/C
E
Personal (Cognition)
Enviroment

P/C = Kerangka Kognitif E = Perampa Ngelingi

Jaku, imaginasyen, kritikal, keratif, logikal. Apai indai enggau diri sebilik, pengajar, bala bakih

Gambar 1; Komponen nempa personaliti bepelasarka Teori Sosial Bandura (1986)

Penanggul teruan sekula tu iya nya siti ulah ti enda manah sereta ulih ngenataika
penanggul disiplin ti bukai bepun ari pengawa nembiak ti enda rinduka pelajar sida.
Teori Sosial Bandura nemban dikena ngurangka penanggul teruan sekula ungkup
nembiak primari. Kebuah pia, Teori Sosial Bandura tu dikumbai kitai siti ari pengawa
ngajar enggau belajar ti nyadi ari perati. Bepelasarka teori sosial bandura tu,
perampa ti ngelingi nembiak meri biuh ngagai pemai ulah sida. Ambika chunto,
perampa ti ngelingi nembiak iya nya apai indai, pengajar, bakih ti serambau, sekula
enggau rampa pendiau sida bela meri biuh magang ngagai pemai ulah nembiak.

Nitihka Bandura (1977), lebuh nembiak meratika ulah tauka utai ti digaga orang
bukai sida iya lalu nepu utai ti digaga orang nya dalam untak udah nya, ulah enggau
pengawa nya lalu ditundaka sida iya. Ambika chunto, lebuh nembiak suah meda
bakih ti serambau enggau iya enda nurun sekula, nembiak nya mega deka nundaka
ulah bakih iya ti ngujungka seduai iya sama bela teruan sekula sereta marit nembiak
bukai mega. Bepelasarka teori sosial bandura tu, tau disimpulka nembiak belajarka
sesebengkah pengawa tauka ulah nengah perati ari orang bukai lalu ulah nya
ditundaka iya. Bepelasarka pansik Bandura (1977) mega, iya madahka nembiak
deka nitihka ulah ti agresif tauka mangah sepengudah sida meda filem tauka cherita
ka bisi bejamah sereta bebunuh. Nya alai, penanggul teruan sekula tu tau mega
dikumbai kitai biuh ari filem tauka drama ke bisi bekaul enggau teruan sekula ti
dipeda nembiak ba televisyen enggau media rama ti bukai. Lebuh beratika ulah
nembiak ti teruan sekula ba filem tauka cherita nya, dia nembiak lalu belajar sereta
nepu penemu nya dalam untak sida.

Bandura (1977) mega biai madahka pemai ulah siku-siku dibiuh ari perampa ti
ngelingi sida. Enti nyema perampa ti ngelingi sida berubah, pemai ulah pan mega
berubah nitihka perampa ti ngelingi. Nya alai, nitihka Albert Bandura (1977),
aplikasyen tauka latih sechara terus lebih manah agi dikena nempa pemai ulah
nembiak. Ambika chunto, siku nembiak datai tumu belama ke sekula sereta enda
kala ngembuan penanggul teruan sekula ketegal meda bakih iya diukum pengajar
lebuh enda nurun ke sekula. Nitihka Bandura, pemai ulah tu dikumbai kitai empas ari
perais enggau ukum. Kelimpah ari nya, Bandura mega nekanka penanggul ti
dominan baka penanggul ruang bilik, bakih serambau, sekula enggau pengajar ulih
nempa pemai ulah siku-siku nembiak. Nya alai, bepelasarka teori sosial bandura tu
apai indai, pengajar, sekula enggau semua raban bansa ke ngelingi nembiak patut
meri chunto ti manah ngambika penanggul teruan sekula ulih diputarka enggau
lengkas.

2.3. Langkar Konseptual Pansik

Gambar 2; Langkar Konseptual Pansik

Langkar Konseptual Pansik ba Gambar 2 mandangka sechara ngelansa pekara ti

deka dipansik dalam pansik tu. Keterubah, pemansik deka mansik sapa bagi
nembiak ke udu ngembuan penanggul teruan sekula sekalika nya nembiak pulai ari
tauka nembiak bemalam ba buding. Udah nya, pemansik deka mansik faktor ti
dominan mrit penanggul teruan sekula nembiak primari. Taja pan penanggul
nembiak teruan sekula tu dipeda suah bendar nyadi tang faktor ti dominan marit
penanggul tu nyadi lalu bedau ditemu. Nangkanka nya, pemansik mega deka mansik
faktor dominan ti marit penanggul teruan sekula ungkup nembiak pulai ari enggau
nembiak bemalam ba buding. Ba asil pansik tu, pemansik deka nemu nama faktor ti
dominan marit penanggul teruan sekula ungkup nembiak pulai ari lalu nama faktor
dominan ti marit penanggul teruan sekula nembiak bemalam ba buding. Ba
pengujung pansik tu, bisi dua iti faktor dominan ti marit penanggul teruan nembiak
sekula primari deka dipandangka pemansik bepelasarka data ti diulih.

2.4. Pengulih Pansik

2.4.1 Pansik ba Menua Malaysia enggau Luar Menua Malaysia

Bisi garuh ari pansik ba menua Malaysia tu ti madahka penanggul ulah ti nyadi
dalam kandang nembiak dikaitka enggau chara pengajar bejalaika pengawa ngajar
enggau belajar ba sekula. (Ab. Halim Tamuri & Khadijah Abdul Razak, 2003;
Zaharah Hussin, 2005). Kelimpah ari nya, nitihka penemu Muhammed Sharif
Mustaffa enggau Suria Abd. Jamil (2012), faktor dominan ti marit penanggul teruan
sekula dalam kandang nembiak sekula tu iya nya faktor ari bakih udahnya baru
faktor ti datai ari kaul enggau diri sebilik, faktor ari ulah diri empu, pengajar enggau
kereban ba sekula. Min faktor penanggul teruan sekula ti datai ari pengajar iya
nya ba penuduk keempat enti dibandingka enggau lima faktor teruan sekula ti bukai.
Bepelasarka pansik Bartholomew (2012), faktor nembiak teruan sekula iya nya laban
sida deka lari tauka nyeliahka diri ari pengajar ti mangah sereta enda ulih narit ati
nembiak belajar.

Nitihka pansik ti sesebengkah topik iya nya bepanggai ba proses ngajar enggau
belajar ti dipejalaika bala pengajar ba sekula. Penerang tu disukung enggau pansik ti
dipejalaika Fennema (1988) ti mandangka pengajar meri empas ti pemadu besai
ngagai pelajar nembiak. Kelimpah ari nya, bepelasarka pansik ti udah dipejalaika
Kamsiah (1989), iya mandangka empas ari chara pengajar ngajar ngagai pemutus
prestasi nembiak amat besai lalu nembiak ti enda entu nyulut endang bepanggai
ngagai pengajar ngambika ulih mantu sida nyapai pemutus peresa ti manah. Pansik
tu seriran enggau pengulih pansik Zahari Ishak enggau Low Suet Fin (2013) di
bejalaika pansik ngagai 472 iku nembiak ngayanka pemai ulah pengajar maya
proses ngajar enggau belajar meri biuh ngagai penatai nembiak ke sekula. Pansik tu
mega ngayanka pemai ulah pengajar meri empas ngagai nembiak iya ke besekula
ba sekula Felda mayuh agi ngembuan penanggul teruan sekula enti dibanding
enggau nembiak ke besekula ba luar bandar.

Nitihka Asmawati Suhid, Abdul Rahman Md. Aroff enggau Norliana Kamal (2012),
faktor ti datai ari pengajar suah agi marit penanggul teruan sekula tu majak nyadi.
Bepelasarka pemai ulah pengajar, responden madahka strategi ngajar enggau
belajar ti enda narit ati nembiak sereta enda semitan mandangka rikod min ti pemadu
tinggi dibanding enggau faktor-faktor bukai. Pengulih pansik tu mega seriran enggau
pansik Nurizam Mat Saad(2002) ti madahka faktor ari pengajar ti enda besedia
sebedau ngajar balat agi ngasuh nembiak enggai belajar sereta berasai leju diau ba
dalam kelas lalu ngujungka sida teruan sekula iya nya bepun ari penanggul pengajar
enda besedia bejalaika pengawa ngajar enggau belajar.

Ari pansik nya tadi, pemacha ulih nemu nembiak ngembuan penanggul teruan sekula
ketegal pengajar enda ulih narit ati sida belajarka subjek tauka topik sehari nya.
Kelimpah ari nya, pansik Rohani Arbaa, Hazri Jamil enggau Nordin Abd. Razak
(2010), mega ngayanka kaul antara pengajar enggau nembiak amat signifikan
dikena nyungkakka komitmen nembiak belajar. Sechara selampur, sida mega
mandangka nembiak indu ngembuan komitmen belajar lebih tinggi agi ari nembiak
lelaki. Bepelasarka pansik Abd. Karim Desa (1994), iya madahka pengajar beempu
tanggung pengawa ti besai dikena narit ati nembiak nengah chara bejalaika mayuh
bengkah startegi ngajar ti nemban sereta ulih ngerinduka ati nembiak. Ba pansik nya,
iya mega madahka nembiak nadai ngembuan penanggul teruan sekula enti nyema
pengajar nempa mayuh agi strategi ngajar ti ulih narit ati nembiak lebuh bejalaika
proses ngajar enggau belajar.

Nitihka Olweus (1978), pengajar ti mangah, selalu ngemaluka nembiak, udu nyindir
enggau ngemelika nembiak nyadi faktor ti pemadu besai ngasuh nembiak ngembuan
penanggul teruan sekula. Empas ari ulah pengajar ti baka nya ngujungka nembiak
enda pechayaka diri empu sereta enda agi bebasaka pengajar. Polit enggau Hungler
(2001), dalam pansik seduai iya ngayanka empas ari penusah ati sereta penangi
nembiak ngagai pelajar sida ngujungka sida iya begedika pengajar enggau aktiviti ba
sekula. Ari penanggul nya tadi nembiak lalu ngiga jalai dikena ngelimpangka diri ari
belajar enggau ngulu aktiviti sekula ti ngujungka sida teruan.

Taja pia, pansik Arasaythamby Vello enggau Ng Chooi Kim (2014), mandangka
faktor nembiak teruan sekula ukai datai ari pengajar tang bepun ari diri empu.
Bepelasarka pansik seduai iya, faktor teruan sekula ke datai ari diri empu nunjukka
min ti pemadu besai enti dibanding enggau faktor bukai. Pekara tu mega seriran
enggau pansik ti dipejalaika Malcolm (2008), madahka faktor teruan sekula bepun ari
ulah nembiak ti ngelusu, pengasai ati deka nemu utai ti baru kelalu tinggi enggau
jampat angat tauka ringat lebuh dilara. Nitihka Hallinan (2008), pemai ulah pengajar
ba sekula enggau chara ngajar ti enda ulih narit ati nembiak nyadika faktor bukai ti
marit nembiak teruan sekula tang iya ukai faktor ti dominan.

2.5. Simpul Penemu

Teori ti dikena bejalaika pansik patut engkeman enggau penanggul pansik.

Bepelasarka Teori Sosial Bandura, terang bendar perampa ti ngelingi nembiak
kelebih agi sekula, apai indai enggau bakih ti serambau meri empas ngagai ulah
nembiak. Nangkanka nya, teori tu mega madahka siku nembiak ulih tepejuh sereta
nundaka ulah orang ti semak enggau sida baka bakih sekelas, pengajar enggau sida
serumah. Nya alai, bepelasarka teori tu, penanggul teruan sekula tu empas ari perati
ngagai perampa ti ngelingi sida.

Taja pia, bepelasarka pansik ba menua Malaysia enggau ba luar menua Malaysia,
nyata bendar faktor dominan ti marit penanggul teruan sekula tu bebida ba tiap iti
sekula. Bisi sekeda pemansik madahka faktor teruan sekula tu datai ari apai indai,
lalu bisi mega pemansik madahka faktor teruan sekula tu datai ari bakih serambau,
pengajar enggau sekula.