Bahan Alkitab: Keluaran 3 : 13 – 14

Apa Arti Sebuah Nama

Apa Battuananna tu Misa ‘ Sanga

Ianna den anakta ba’tu ampota dadi, ditanga’; apa la disanganni. Ba’tu ditanga’ dolomo dikua ianna den
anakku ba’tu ampoku iato tu la kusanganni. Tantu iatu sanga dipassanaganni den battuananna ba’tu den
patunna, den tu dirannuan , den tu napenggaronto’i.

Iatu sanga inang melo sia parallu. Belanna mendadi tanda manassana, tanda malesona dinii untandai
mindanna anak, piran na dadi, umba nanii dadi. Melo pole opi ke iatu sanga dinii untandai kumua to
melo penawanna, mabalele, marampa’, to kinawa, to melo penggauranna, ma’perangi kedenni melona
dipokadanni. La’bi mellong pole opi ke to ma’patongan na papayanni tu kapatongananna unnolai
penggauran. Unturu’I kadanNa Puang Matua, tangia pa’poraian penawanna kalena. To umpudi Puang,
tangia kumua na ia dipudi sia pabali-bali lako Puang Matua, unturu’I bang ia pa’poraianna.

Tarru’ maballo poleopa tu kareba napokada Sura’ Madatu lan Katassuran pasala’3:14 belanna Puang
Matua Puangna Abraham, Ishak na Yakub umpapetandan kalena: Aku Den tu inang Denna’. Apara
battuananna tu: Aku Den tu inang Denna’ anna dikua tarru’ maballo, tae’ kamaballoan, tae’ kameloan
undaoanni. Ianna pokadaI Puang Aku Den tu inang Denna’ battuananna:

- Iatu Puang Matua, tempon diomai nangden sia mengkarang, mengkarang sae lako totemo (
band. Yoh. 5:17) Tae’ anNa tikkaru’du’ ba’tu leppeng ( band. Pa’pudian 121:4). Mintu’ inan Nanii
tongkon, sia untandai angge maritik ( Pa’pudian 139)
- Puang misa-misanna Makuasa, anNa tae’ kuasa ussau’I tu kuasanna.
- Iatu Puang mamase. Anna iatu pa’kamaseanNa tae’ nalambi’ tanga’ta ( Yoh.3:16).

Tae’ napokada mannai Sura’ Madatu kumua iatu Puang Matua tempon diomai nangde sia mengkarang,
makuasa sia mamase anna tae’ buktinna. Mammi’ bangri dirangi. Iatu Puang tae’ anna ma’pakappa,
nabuktikan Puang tu kuasanNa, kamamaseanNa, sia kama’diorenanNa. Nasolan tu to Israel diomai Mesir
diomai inan dinii umkaunanni. Misa’ pengkarangan kapua lako to Israel. Tontong ma’dioren ,
mengkarang, tontong na rondong sia naongnni pani’ kamamseanNa. Naben tu naparalluinna,
napassakke sia napasalama’.

Iatu Puang tu misa-misanna Puang, Puang tempon diomai nangden, sia mengkarang, makuasa sia
mamase; Nabuktikan lan kasaeanNa Puang Yesu. Nala’bakmoki’ diomai gau’ tangkebattuananta unnolai
rara mala’bi’Na Kristus ( 1 Pet. 1:18,19). Puang Yesu, Iamo Anak dombana Puang Matua tu ussarapai
kasalanna lino (Yoh. 1:29). Disanga Immanuel battuananna Puang Matua urrondongki’ (Mat.1:23).
Nakua Puang Yesu Akumote tu Alfa sia Omega, kadanNa Puang Kapenomban, tuDen, sia inang Den,
tempon dio mai sia la saeMo, Iamo tu umpoissan angge maritik ( Wahyu 1:8 ). Iatu Puang Kapenomban
maindan , umpoissan anggemaritik tu inang Den tempon dio mai, sia Den sia la saemo (Wahyu 4:8).

Iake susito, umba susi tanan penawanta lako Puang Matua sia lako tu apa dadi lan katuoanta.
- Tontongki ma’patongan lako kaleNa, disorong tu mintu’ katuoanta sia rannunta lako Puang moi
umba susi a’gan katuoan dioloi susi tetotemo.
- Latontongki’ matangkin unturu’I tu apa napokada to ma’parenta, dokter, perawat, keamanan,
pesumbung pudukNa Puang Matua la’bi-la’bi kadanNa Puang Matua.
- Tontongki’ ma’kurre suanga’ lako Puang unnolai penggauran melo, sikamali’ sikamasean lako
misa’ na misa’. Tae’na kaleta manna, rapunta manna , ba’tu kelompo’ta manna.
- Tontongki’ ungkataku’ Puang. Ungkataku’ Puang, tae’na pada keungkataku’ saki, ba’tu
ungkataku’ kamatean. Ungkataku Puang battuananna diangga’, dikabangnga’ na dipudi, dituru’
tu pa’poraianNa sia ma’kurre sumanga’ lako kaleNa.

Apa biasa tolinori, polisiri tu takataku’. Susinna kedenni kasirampunan maleki’ ungkulambui kaleta
tapogau’I tu tangnaporainNa Puang. Male tau ma’gereja, nakuai malekan ma’minggu. Ianna den
sara’ dipogau’ tangia Puang tu dipudi, apa didaka’ tu cara dipogau’ dikua na kita tu dipudi. Iamo te
tu tangnaporai Puang.

Inang tae’ undaoani tu Puang Matua tu mangka ma’kada: Aku Den tu inang Denna’ Amin.