“Marende ma hamu di Jahowa”

(2 Musa 15: 19-21)

Jamita Evangeliumdi Minggu Kantate, 15 Mei 2022
Ginurithon ni Pdt Dr. Robinson Butarbutar, Ephorus HKBP

Hamu angka Dongan sahaporseaon di bagasa Kristus Jesus Tuhanta i.

Dipalumehon Debata do tu hita jolma tinompaNa i hatauon/talenta marende, i ma

dalanta patolhashon isi ni rohanta na marragam i. Marragam do isi ni rohanta na
tasoarahon marhite endenta jala marragam do hasahatan di endenta i.

Hasahatan na parjolo na boi goaron, i ma halak na tahaholongi, endenta gabe

ulaulanta patolhas holong ni rohanta tu nasida. Mansai godang ende na digurithon
jala diendehon sian tingki tu tingki na songon i hasahatanna, tarlumobi alai ndang
holan tu angka sundut na umposo, angka generasi muda. Adong do tong
hasahatan ni endenta ndang apala halak na tahaholongi, alai baliksa, i ma na
tahasogohon, i ma halak marsasahalak, manang marsapunguan, i ma angka na
manusai ngolunta. Taendehon ende i dalanta mamanghulingi nasida asa unang be
nian diuduti patupa na so denggan. Adong do tong hasahatan ni endenta i, i ma
natorop, dakdanak, remaja, naposo bulung, natoras, manang natuatua na tongon
mangadopi parungkilon na balga, isara angka bencana, asa ende i ulaula/dalan di
hita laho patoguhon roha ni na torop unang mandele, baliksa asa togu, asa unang
agoan panghirimon, huhut laho pasahat tona tu parhuaso asa muba so ingkon
didok hatana tusi. Tarsongon i do hasahatan ni Ende ni Amanta Parende Indonesia
na tarbarita, Ebiet G. Ade, “Parjalanan ini terasa sangat menyedihkan”:
“Perjalanan ini trasa sangat menyedihkan; Sayang engkau tak duduk
disampingku kawan; Banyak cerita yang mestinya kau saksikan, Di tanah
kering bebatuan; Tubuhku terguncang dihempas batu jalanan; Hati
tergetar menampak kering rerumputan; Perjalanan ini pun seperti jadi
saksi; Gembala kecil menangis sedih. Kawan coba dengar apa jawabnya;
Ketika ia kutanya mengapa; Bapak ibunya tlah lama mati; Ditelan
bencana tanah ini; Sesampainya di laut kukabarkan semuanya; Kepada
karang kepada ombak kepada matahari; Tetapi semua diam tetapi semua
bisu; Tinggal aku sendiri terpaku menatap langit; Barangkali di sana ada
jawabnya; Mengapa di tanahku terjadi bencana; Mungkin Tuhan mulai
bosan melihat tingkah kita; Yang selalu salah dan bangga dengan dosa-
 dosa. Atau alam mulai enggan bersahabat dengan kita; Coba kita
bertanya pada rumput yang bergoyang; Kawan coba dengar apa
jawabnya; Ketika ia kutanya mengapa; Bapak ibunya tlah lama mati
Ditelan bencana tanah ini; Sesampainya di laut kukabarkan semuanya;
Kepada karang kepada ombak kepada matahari; Tetapi semua diam tetapi
semua bisu; Tinggal aku sendiri terpaku menatap langit; Barangkali di
sana ada jawabnya; Mengapa di tanahku terjadi bencana; Mungkin
Tuhan mulai bosan melihat tingkah kita; Yang selalu salah dan bangga
dengan dosa-dosa; Atau alam mulai enggan bersahabat dengan kita;
Coba kita bertanya pada rumput yang bergoyang.”

Alai laos adong do hasahatan ni ende i, i ma sahalak na so apala digoari,

natuatuanta manang Debata i sandiri na patogu na marende i. Sada sian ende na
tarbarita di hita di abad pa-21-hon on, i ma ende na ginurithon jala niendehon ni
Josh Groban (2003), “You Raise me up to more than I can be,”
Dipagodanggodang ho do ahu tu lobi sian na tarbahen ahu.” Songon on do hatana
na dipaulakulan mangendehon:
“You raise me up, so I can stand on mountains
You raise me up, to walk on stormy seas
I am strong, when I am on your shoulders
You raise me up to more than I can be”
Batak: “Dipagodanggodang ho ahu asa tarbahen ahu jongjong di angka dolok,
dipagodanggodang ho ahu, asa tarbahen ahu mandalani laut na margalumbang
nab alga, margogo do ahu di na di abaram ahu, dipagodanggodang ho ahu tu na
so tarbahen ahu.”

Songon i do na pinatupa ni sahalak panurirang parompuan di tongatonga ni

bangso ni Debata dung malua nasida sian pangaleleion ni angka sordadu
pinarentahon ni raja Misir Pharaoh laho manusai bangso naung malua sian
parhatobanon Misir laho mamboan nasida muse mulak tu Misir, i ma si Miryam.
Dung diida ibana rap dohot bangsona haluaon pinatupa ni Debata tu nasida, i ma
mambahen aek laut mangalingkupi angka sordadu ni Misir naung sanga tuat tu
laut pinahiang ni Debata, alai palua bangsona nilele ni sordadu i di laut naung
pinahiangna i hot di tano di laut na hot mahiang so dihahua aek laut i, sada
halongangan na so dung masa, na mambahen angka alo ni bangso i uju i angka
hitir, dibonai si Miryam ma patupa parendeon na hasatanna i ma Debata i sandiri.
Dipungka ibana ma mambuat odap (Indonesia: rebana), i ma sada uninguningan
na somal di pangke angka bangso di Timur Tengah, dung i dipatupa angka
boroboru ni bangso i na dos marudurudur, dung i marende ma Ibana jala dijouhon
tu angka parompuan i asa marende tong tu Jahowa marhite na patorangkon sialana
boasa pujion Jahowa, i ma: “Ai marmulia situtu do Jahowa.” Hubege do Elihana
Eli, “Song of the Sea” laho manggombarhon las ni roha ni si Myriam uju marende
tu Jahowa. Diondolhon Ibana: “Ashira la’Adonai ki ga’oh gaah”: Huendehon tu
Jahowa ai marmulia do Ibana. Tarida do hamuliaonNa i di ulaonNa na
mangalingkupi hoda dohot hureta ni angka parangan ni raja Misir i.

Pengalaman ni si Myriam i ma na gabe jamita di hita angka ruas ni Huria Kristen

Batak Protestan, i ma dijouhon tu hita asa marende tu Jahowa ala marmulia do
Ibana, na tarbahen patupa angka ulaonNa na di duru ni hatauonta patupaonsa, i ma
paluahon hita sian mara na bolon di bagasan ngolungolunta na marragam i,
songon pinatupaNa palua bangsoNa Israel sian pangaleleion ni parangan ni raja
Pharao na naeng mamboan nasida mulak tu parhatobanon di Misir, na so
dihalomohon Debata.

Boasa ma ringkot di bagasan partingkianta nuaeng dipanghulingi Debata asa

marende tu Jahowa na marmulia i?
Parjolo, suraon do ala ni dokdok ni angka parungkilon na taadopi gabe ndang
tarbahen hita be marende tu Debata, siala ndang taida jala ndang tapanghilalahon
be/dope ulaon ni Debata Pargogo na so hatudosan i di ngolunta, tarlumobi dung
taadopi jala sai marusaha dope hita ruar sian Covid-19 dohot panghorhonna di
ngolungolunta siganup ari, songon i nang ala gabe lam so tarbahen hite be/dope
mangolu di partingkian digitalisasi, na mambahen majo angka na marhatauon tusi,
alai gabe tartading angka na so marhatauon tusi? Tung beha pe, tong ma talehon
tingki marnida tu pudi angka ulaon ni Debata naung palua hita sian ragam ni
angka hamaolon ni ngolu na ro tu diri nang punguanta be marsasajabu manang
marsasasektor parhuriaon nang sahuria? Ai di bagasan ngolunta songon halak
Kristen mamungka sihadakdanahonta mansai bahat do angka na boi tapangke
marnida hamuliaonta ni Debata i masa/dipatuduhon/tapanghilalahon di pardalanan
ni ngolunta.

Paduahon, suraon do siala di angka kesuksesan ni ngolunta mandungdung na

pinarsinta ni halak Kristen Batak di portibion tamba ni hangoluan na manongtong
i dung hangoluon nuaeng di portibion, isara mandungdung hamoraon, hagabeon,
hasangapon marhite huasa na marragam i na adong di hita, gabe ndang marende tu
Debata na marmulia na patau hita, mandongani hita dohot na mamasumasu
ngolunta mandungdung angka i be na taendehon, alai nunga gabe hatauonta
sandiri, ndang gabe Debata i taida na mangula tong di bagasan ngolunta be, dohot
di angka dalan ni ngolungolu na marragam i na tapangke mandungdung angka
sintasintanta i?

Patoluhon, suraon do siala ndang apala ringgas be hita marende tu Jahowa atik pe
bahat do angka endenta di Buku Ende HKBP i, jala ndang marroan be/dope angka
ende sian angka parende dohot sipatupa ende sian tongatonga ni halak Kristen, na
mambahen Debata na mangula marhite angka dalan na so hasuhatanta i gabe
hasahatan ni angka endenta, nunga gabe gumodangan angka endenta i
marhasahatan ndang tu Debata, alai baliksa angka na marragam na asing i
sambing nama/do? (Boi do tagoari dison aha na jotjottan gabe hasahatan ni
endenta).

Molo songon i kondisi ni parendeon di angka generasi ni HKBP di abad padua

pulusadahon on, tarlumobi di dekade patoluhon on, di na tahilala paborathu
tantangan ni ngolungolu na taadopi, gabe ndang tarbahen hita be marnida Debata
na mangula, jala gabe bahatan rohanta mandiori hasahatan na asing ni angka
endenta, i pe angka ende na mambahen tumatangis hita, lungun rohanta do, isara
mambahen hasatan ni angka endenta i ma Amang dohot Inong nang donganta
saripe naung parjolo monding, jala parmonding nasida masa uju tung parir situtu
parngoluonta?

Paopathon, suraon do siala ndang apala taboto be na tu angka na ringgas, hobas,

jala sihot situtu rohaNa marende tu Jahowa siala hamulionna sandiri do – asa
ndang apala holan ala dipatupa Ibana pangurupion na gok halongangan umbahen
marende hita tu Debata -, asa ala tama do endehononta Ibana: “Marende ma hamu
tu Jahowa, ai marmulia situtu do Ibana,” na tarida di ulaonna palua bangsoNa sian
pangaleleion ni parangan ni raja Misir, alai dohot ma ndang apala ala nunga taida
ulaonNa nabalga situtu di ngolunta marsadasada, alai ala tama do marende hita tu
Debata na marmulia i. Dipargogoi Debata ma hita marende tu Ibana di angka
ariari ni ngolunta, songon halak Kristen na lomo roha marende. Amen.