Cecimpedan lan Wewangsalan Bali

Oktober 28, 2014

Cecimpedan
Cecimpedan inggih punika wantah babaosan kanggen matebag-tebagan.
conto cecimpedan:
1. ape ke anak cenik maid cacing? cawisan: jaum misi benang
2. apa cekuk kajengitin? cawisan : caratan
3. apake jangkrik ngecik di duur gununge? cawisan: anak macukur
4. apa anak cenik ngemu getih? cawisan : klepon
5. apake madaar acepok, wareg sai-sai? cawisan : galeng
6. apa anak cenik matapel? cawisan : blauk
7. apake anak satak maka satak matlusuk? cawisan : iga-iga
8. apa anak satak maka satak maudeng putih? cawisan: bungan ambengan
9. apa anak cerik maid enceh? cawisan : caratan
10. apa anak cenik pantigang ngurek gumi? cawisan: gangsing
11. apake anak bongkok kereng nyuun? cawisan: sendi
12. apake done amun pedang buahne amun guungane? cawisan: punyan jaka
13. apake bale gede matampul abesik? cawisan: pajeng
14. apake cekuk baong, godot basang, pesu gending? cawisan: rebab
15. apa ane negen nongos ane kategen majalan? cawisan: pancoran
16. apa ane kajepes idup ane nyepes mati? cawisan: pagehan
17. apake base alukun ulung seka bidang? cawisan: pusuh biu
18. apake ngamah uli basang pesu uli tundun? cawisan: panyerutan
19. apa don ne srining-srining buahne amun gon? cawisan: punyan jempinis
20. apa don ne amun tutup, buahne amun sirah? cawisan: waluh
21. apa don ne utusan, buahne aturan? cawisan : punyan ental
22. apa don ne amun tlapak lima, buahne amun sigi? cawisan: base
23. apa di cerikne mapusung, di kelihne magambahan? cawisan : padi
24. apake awakne kulit, matane kulit, kupingne kulit, batisne kulit konyangan kulit?
cawisan: wayang kulit.

Wewangsalan
puniki pateh sakadi tamsil ring Bahasa Indonesia. Wewangsalan kruna lingganipun
"wangsal" sane artinipun "lampah", polih pangiring "an" dados "wangsalan",
kaduipurwayang dados "wewangsalan", artinipun lelampahan saparipolah kalih
kahanan janma, sakadi sasimbing sane sada pedas suksmanipun.
Wewangsalan puniki kawangun antuk lengkara kalih palet utawi carik. Lengkara
sane riinan sakadi "sampiran", indik daging kahiun sang ngucap, kewanten kantun
makubda (ilid) suksmanipun. Lengkarane sane pungkuran punika daging sajati, sane
nerangan suksmanipun tur mawirama kalih mapurwakanti (bersajak). Wenten taler
sane nenten ngucapang lengkarane pungkuran, antuk kasengguh sami anake
sampun ngerti ring suksmanipun. Ring asapunapine kawangun antuk lelampahan
ring pawayangan. Ki Dalang ngawi satua bawak babaudan, nyimbingin sinalih
tunggil sang nonton sane saud (iwang) laksananipun. Wenten taler sane mawangun
gambar (karikatur).
Ring sor puniki wenten makudang-kudang wewangsalan luiripun :
1. Asep menyan majagau, suksmanipun = nakep lenggar aji kau
2. Ada tegeh masui kaput, suksmanipun = ada keneh mamunyi takut
3. Bakat kocok misi isen, suksmanipun = awak bocok tuara ngasen
4. Bangbang dadua ken ceburin, suksmanipun = bajang dadua ken anggurin
5. Be lele mawadah kau, suksmanipun = suba jele mara tau
6. Bedeg majemuh bangsing di banjar, suksmanipun = jegeg buin lemuh langsing
lanjar
7. Baju gadang potongan gantut, suksmanipun = tuyuh magadang tuara maan entut
8. Buangit kali gangsa, suksmanipun = magae lengit ngamah gasa (kereng)
9. Buah sabo mawadah klukuh, suksmanipun = awak bodo buin angkuh
10. Cekcek poleng temisi bengil, suksmanipun = desek ngereng gisi nengil
11. Clebingkah beten biu, suksmanipun = gumi linggah ajak liu
12. Dagdag candung selem samah, suksmanipun = berag landung kereng ngamah
13. Delemk sangut merdah tualen, suksmanipun = medem bangun ngamah dogen
14. Dija kacang ditu komak, suksmanipun = dija pejang ditu jemak
15. Eber-eber ilih, suksmanipun = bebeger baan nyilih
16. Gamongan kladi jae, suksmanipun = omongan dadi gae
17. Gedenan padange teken gondane, suksmanipun = gedenan tandange teken
gobane
18. Gonda godeg bakat kukur, suksmanipun = goba jegeg baan pupur
19. Idup kedele mati kacang, suksmanipun = idup jele mati sayang
20. Cempiit batan biu, suksmanipun = ngajengit ajaka liu