SUNGEI BATU MARUMI

Hong zaman horan, into daerah Seruyan ekae into Sambuluh. Tege due kabawak lewu je belom
habambai, je paham makmur tuntang damai. Lewu te iete lewu Rojha tuntang lewu Murti.
Masyarakat due lewu te paham rukun. Amun tege kasusah kapehe atawa pesta, ewen pakat
mandohop je buah kasusah atawa je pesta. Tagal gawi je kilau te, masyarakat due lewu te sasar
akrab.

Umi, bara lewu Rojha manjatu sinta dengan Maru bara lewu Murti. Labih kurang ije
minggu katahin ewen hakasene, kajariae Maru handak misek Umi. Oluh bakas Maru, manumon
kea kahandak anake Maru. Ewen palus tulak akan lewu Rojha, maja eka Umi. Sana sampai,
ewen hasansila sama manyarita ampin silsilah katurunan kaluarga ayu-ayu.

Limbah basarita panjang lebar silsilah katurunan te, ampie Maru tuntang Umi toh tege
hubungan kaluarga je agak tukep. Maru te mama Umi. Awi ewen bakaluarga tukep, maka kadue
oluh bakas dia marestui kahandak Maru ewen due Umi. Amon ewen malanggar, ewen akan
manjadi batu. Awi dia irestu, ewen badue hapakat hadari bara lewu ayu-ayu tuntang manggau
oluh je handak manikahkan ewen. Limbah mahalau panjalanan pire-pire andau huang himba,
ewen due sampai ije puduk into himba te. Puduk te inunggu awi ije biti tambi bakas. Maru
tuntang Umi, balaku tambi bakas te manikahkan ewen due.

Hanjewu andau tinai ewen due tulak malihi tambi bakas, mahalau pire-pire himba. Awi
asik mananjong mahalau himba te, dia ewen katawan andau jari nampara kaput.

Hayak dengan andau kaput, nyahu kilat hatatumbah tuntang ujan muhon labat toto. Ewen
due hadari tarus-manarus manggau eka bakalindung, sahingga sampai into saran sungei. Into
saran sungei te, ewen due basaluh manjadi handipe je paham hai.

Awi sinta ewen due paham toto, aloh jari basaloh manjadi handipe, tatap handak
malanjutkan panjalanan, aloh dimpah sungei. Katika ewen due into bentuk sungei, ewen due
basaloh tinai manjadi batu, sahingga dehes sungei te dia tau mahalau due batu te. Bentok sungei
jaton danom. Danom mahasur mahalau sansila due batu te. Sungei eka Maru tuntang Umi
basaloh manjadi batu te inyewot arae “Sungei Batu Marumi”. Wayah toh eka te manjadi eka
objek wisata je rancak inalih oloh.