Turiturian ni Batu Gantung

Turiturian ni Batu Gantung

(Marno Siagian, 2021).

"Hahahahah,..! Aba, nunga be i Ito, geok! Hahahahah," ninna si Seruni tu si

Bona huhut mengkel-engkeli, tagan nasidanadua marmeam-meami, boru ni
parhuta Dolok Sibaganding i; andos so leleng muse ibana namartabuni,
donokhon ni sada liang.

"Ito Runi, ruar ma jolo ho hasian bah, sian partabunianmi, asa lehet hita jolo
manghatai!?" Ninna si Bona, huhut diomarhon simalolongna tu saluhutna
desa, laho mangalului si Seruni na tompu i marsuguti donok sada liang
tungkan topi ni tao Toba nabolahi.

Dung dibege si Seruni hata ni si Bona naung piga-piga hali i manggaut,

ujungna ruar ma ibana mandapothon si Bona.

"Na didia do ho Ito marsuguti?" Ninna si Bona manungkun si Seruni, alana ro i

ibana sian pudina, "Songonon Ito, ala nunga lam mangholom ari, paima
tongkinnari muli be hita tu hutanta, dohononhu jolo nian tu ho hatanghu!?"

"Ba dok ma!?" Ninna si Seruni mangalusi.

"Tutu do Ito dang adong roham tu paribanmu si Lian i, kan?" Ninna si Bona
nanget, huhut rohana holsoan, "Ai dung hubege daba baritami, gabe songonna
maol do huhilala tu joloanon hita muse pajumpang!?" Ninna si Bona lam
marsak.

"Ido Ito! Alai diau do hinsuni i sude. Molo so olo au huroha, boha? Agia pe sai
digogo halak Among au tusi, ba molo bungkas au sian jabu, boha haroa!?"
Ninna si Seruni mambahen roha ni si Bona lam margogo.

Alai sai tong do lalap manderse leat ni baoa parhuta na dao i. Nang songonon
ma lelengna si Bona namardongan dohot si Seruni, alai tung so hea ma
dipaboa ibana tu angkora i manangna parhuta dia do ibana sasintongna. Jala
si Seruni pe, dang pola haru ringkot didok rohana laho umboto i; manang
parhuta dia pe si baoadi pinarmunung ni rohanai.

"Ito, muli ma ho, nga bot ari! Dilagai ho annon," ninna si Bona tu si Seruni.

"Olo Ito!" Ninna si Seruni, huhut tibu ibana borhat namardalan i. Paja hian
diida si Bona pardalan ni si Seruni na laho muli i sian inganan parhundulanna;
mangalaosi angka rungga-rungga ni hau i laho tu hutana.

Dung maremong daona si Seruni diida si Bona namardalan i, sai leleng dope
ibana hundul-hundul disi mamingkir-mingkiri pardonganonna dohot angkora i.
Alai dang sadia leleng, mardaras ma sada dangka metmet ni hau
simarhalimponon dibaen hulihap namangangkat diginjangna. Laos dekdek ma
i tongon tu jolo ni si Bona; na laos songon namambahen ibana i tarjolma, ala
nunga lam tarida matana lampu ni salimpotpot na habang binahen ni naung
lam manggolap ari.

'Didia do nangkin naing ibana namartabuni i?' ninna roha ni si Bona, huhut ma
dituju ibana tungkan parro ni si Seruni sian huduk hundulna sinangkiningan.

Dapot ma dung disihiri ibana tujui sada liang batu; dunghon adong hira piga
dan tardok ibana namanopis tao i. Dung diboto ibana adong inganan i, manigor
muli ma nang ibana pe sian i, laho tumopot botean ni soluna; ai dang mangate
ibana manuruk liang i dibagasan golap-golap ni ari i, ro tu bagas rohana: bait
dia laos adong dibagasanni i maon songon isarana ulok, sombaon
panginganina.

Sahat di bagas na si Seruni, dilaga-lagai Ama dohot Inana ma ibana. "Ai na

sian dia do ho boru ni asu!? Tutu ma ho boru-boru hatoban! Laos songoni sude
ulaon i dipantadinghon ho!" Ninna Amongnai posi hatana tu ibana.

"Ai boasa songoni hatam tuau Among? Ai dok do ala tarsor sahalion au dang
dapotmu dijabu on, alai nunga pintor songoni parmuruk-murukmu tuau!" Ninna
si Seruni mangalusi hata laga ni Amana i.

"Mangalus-alusi dope disi pamanganmu..! Atehe, paboa jo tu si, atik na alani

aha umbahen na pola songoni murukhu tu ibana!" Ninna Amanai hatana
mandok tu Inana; asa ibana didok rohana napabotohon tu si Seruni sialana.

Dung i, ditogu Inanai ma tangan ni borunai asa bongot nasida tu bagasan

bilut.
"Asa diboto ho, da boru,...! Sadarion, pola do humaleteng hami mangalului ho
tusan-tuson! Ai ro do naarian halak Amangborum dohot Paribanmu, si Lian!
Jala nunga diboto ho, nunga leleng dunghon namarbulan Amongmu tu
Amangborumi; asa di si Lian ho, laho bahen parsondukna. Ndang na lupa nian
ho disi, kan?" Ninna Inanai hatana paingothon si Seruni.

Sai tangis ma si Seruni dung dibege hata ni Inana i. Tung marisuang nama
muse didok rohana: molo pe gabe dipabotohon tu nasida natorasna i naung
adong bogasna disadaan dohot si Bona.

"Nunga dipaboa ho be tu ibana, dohot na laho ro muse marsogot nasida

Amangboruna raphon paribannai tuson, kan?" Ninna Amanai hatana mandok
tu Inanai, sian duru ni bilut i.

"O, tahe! Marsogot boru,... Mangulahi ro do muse halak Amangborumi tuson!

Asa diboto ho, paradongan do nasida Amangboru dohot paribanmi, Runi!? Jala
muse, jojo do nang tompa ni paribanmi pe! Sandok, dang tung gabe manolsol
ho bahenonnami natorasmon di pudian ni ari!" Ninna Inana i hatana, huhut
dipature-ture sitarupon ni boruna i marhite sada suri pangko; binahen sun
hinaganjang ni sitaruponna.

"Toe, martapian ma jolo ho, salpu i asa patupa parpaiogonan!?" Ninna Inana i
tu ibana muse hatana.

Borhat ma si Seruni samon-samon i laho martapian, huhut ma sai diihut-ihut

panangga na si Toki langkana sian pudi. Sai somal do pananggana nasasadai
sai mangihuti bogas ni pat ni Ompuna; tagan so disarihon dope manang aha
diibana laho baen daon ni butuha malena.

Sai dipingkir-pingkiri si Seruni ma paribanna na ro i marsogot tu bagasna, laho

mangalap siboru naung pinaorohon ni Amana i be. Dang marna mansadi dope
iluna na sai perek i, nang pe naung mengge dagingna tu bagasan aek
partapiananna na borgo i.

Di dalan laho tu bagasna pe ibana ro sian paridiannai, sai i do na sinarihon ni

rohana. Alai, tompu ma soluk tu rohana hata nanidokna tu si Bona naarian,
ima namandok: asa bungkas ibana sian bagasnai; molo so lomo do rohana tu
anak ni Namborunai diibana bahen siadopanna. Hibul ma tahina didalan i
mandok: laho bungkas ibana di marsogotna, jala tongon ma di tingki parro ni
nasida Amangborunai ditahi rohana parborhatna. Asa dohot diboto nasida: na
so lomo do rohana saut tu paribannai bahen parhalanguluna.

Disi dibege si Seruni martatahuak jambe mira sialtong piniaro nasida hira di
ombas buha-buha ijuk i, ngot ma ibana. Diopani ma api di nadua
pangalompaan di tataringnasida i, manogot i. Dihodohon ma tu atas ni
tataring pangalompaan nasada aek di bagasan susuban, ia di nasadanari,
dihodohon ma hudon pangalompaan ni indahan. Dung sidung dihariri jala
digasinghon ibana indahan i, diompaphon ma muse sabiiji parbue ni torung
api, laho bahen ingkau ni Amana; andos so ditutu muse dohot lasiak, bahen
donganna.

Dang leleng, hehe ma di punsu ni dolok adui sidumadang ari. Marhobas ma

laho ro nasida Amangboru dohot pariban ni si Seruni, huhut ma nasida
marboan sere palangki marpiga-piga rantiti; na pinangampehon nasida
dibagasan tas diatas palano ni hodana.

Tuktak jala mariheihe ma tarbege soara ni angka hoda na ro mandapothon

bagas ni si Seruni; tagan mamolus dope sian tonga ni huta Sibaganding. Ima
uduran ni nasida Amangborunai.

Dung diambangi nasida Ama dohot Inanai halak Amangboru dohot paribannai
di jolo ni bagasna i, marlojongi ma si Seruni tu inganan parjumpaanna rap
dohot si Bona.

Dung i, sai dijoui nasida Amanai ma si Seruni, alai dang disi be. Didior nasida
ma tu saluhutna desa di harangan i. Didalani nasida ma dohot saluhut dalan-
dalan metmet naadong disi; nasa na boi boluson ni jolma. Dapot ma taranggo
ni si Toki dalan nanidalanan ni si Seruni i, jala diihut-ihut nasida ma tudia
dompak laho panangganai. Ujungna, dapot ni panangga i ma tutu si Seruni.

"Ito,.. Ito Bona?" Sai maos ninna si Seruni laho manjou-jou tu si baoadi
hinaholongan ni rohanai, alai dang adong balosna dibege. Dung i, lam
manjonok ma nasida Amana na ro i mandiori ibana; ai tarbege nasida ma
saringar ni soarana, na sai jou-jou i so pola dao be.

Dung hira naing dapot ibana didok rohana tahopon ni nasida Amana asa
boanonna muli tu huta, lam di padalan si Seruni ma patna nanget-nanget
manopot bibir ni tobing di ginjang ni liang ingananna martabuni i sian si Bona,
asa timbungonna.

Dung i, sai dielehelek nasida natorasnai ma si Seruni: asa unang nian saut
dituntun borunai manimbung sian tobing i.

Alai, ditulus si Seruni do manimbungsa. Dang panagamanna, sangkot ma

sitaruponna na sarbe i di suhi ni batu tu batu. Gabe gaung-gaung ma si Seruni
ditoru; dunghon jolo antuk simajujungna tu dingding batu, biding ni tobing i.

Marnida namasa i, sai tangis ma nasida natorasnai di ginjang. Naing do

rohana buatonnasida sian i bangke ni boruna na gaung-gaung i, alai ndang ise
pe sian nasida nadisini na mangate laho mambuatsa.

Songoni ma bangke ni si Seruni i disi, leleng sai gantung. Ro pe si Bona muse

di sada tingki laho mangusoi siboru hinasolohon ni rohanai, alai nunga batu
nama disi didapot ibana gantung, ima nadonok tu liang i.
Dilaon-laon ni ari, diboto si Bona ma: na sahat tolpus do liang parsugutan ni si
Seruni i tu sada huta, na so binotona hian dope manang aha goarni huta i.

Dung ditingki naparpudion, didok ma goarni huta i: Sigualon.