Ambo’na Nyawae

Ata malebbina Puang Allah SWT. ya engakae simata riammasei nennia

ripakalebbi ri Puang Allah SWT. Puang sewwae. Alhamdulillah seddi
werekkada masoro malebbi ripuada atae lao ri Puang Allah SWT. nasaba
werekkada Allhamdulillah, saba’ nasabari rilalenna iyyae essoe marajata
idi’ rupataue engkai koritu natanengengngi afaullengeng ritujunna tubu
kassara’ta enrengngetopa paimeng napassukkui koritu Puang Allah SWT.
nasaba engkana napattoi teppe mattugengkeng temmalere rilalenna tubu
alusu’ta. Saba nasabari namaringeng rifassue tubu alusu’ta malemma
ripakedo iyyatu tubu kassara’ta namanyameng kininnawaki mangnguju
baaliwi pattampa malebbina Puang Allah SWT.
Salawa pallasama sukku lao ri alena malebbina Nabitta Muhammad SAW.
Nabi iya’e degage fajana tuli maddararingeng esso wenni asalamaketta
gangkanna massarangngi alusu’na nenniaa kassara’na ri munri melona
massarang deggaga laing napuada sangngadinna Ummati.. Ummati..
Ummati.. idi maneng narampe Nabi’ta, tennia nakkitaurang afeddingetta
maneng, Tania akasiasingeng nakkitaurang Nabi’ta, naiyakia
nakkitaurang Nabi’ta ajakkammeng namatti’ manifi teppetta nadefa
riseddingngi aleta’
Ata malebbina Puang Allah SWT. seddi werekkada tareka bicarana
pa’hikmae, pa’hakikie mabiasa lettu riacculi’ta makkedae “Aja
Muassompa Narekko De’Musitettongeng Sibawa Ambon’na Nyawamu”.
iyyanae werekada sitongenna werekkada jarang engka pallebbangngi,
naikia farellu ripallebbang nasaba uppanna-uppanna dena
riballebbangngi ri pabbanuae ritau ammengngi saba nasabari engka
wedding paompoi pahassana gangkanna nasolangi akidae nalolloi teppe’e
lao ri Puang Allah SWT. nasaba iyya tu tareka’e. pikkiri’pa manre’i naiya
Tania wassele pikkiri, denapada fikkie, denapada tafsir’e, narekko fikki
engka dallelena ri kitta haddese’e, engka dallelena ri kitta aqorangnge,
makkotopa ro tafsir’e, naiyakia werekkada tareka magguru cenne tu
werekkadanna seddimi tujuanna iyyanaritu pakkogi carana nawedding
namareppe lao ri Puang Allah SWT. immagi ritella iyanaritu ma’rifatullah,
appahangnge lao ri Puang Allah SWT.
Ata malebbina Puang Allah SWT. iyyana werekada’e maponco’i naiyakia
maloangngi namasakka, marilalengngi namarisaliweng pabbettuanna,
nasaba narekko maeloki tetta’i iyyae bicara’e, engkai koritu parelluki
rewe paimeng, pekkocarana napancajiki Puang Allah SWT.
ammulangenna ancajingenna ripatau’e, mabiasa ribaca ri aqorang
malebbie surah Al-Baqarah ayat 30 Wa iż qāla rabbuka lil-malā`ikah….
Makkedai ingngerangngi riwettunna makkeda Puang Allah SWT. ri
malaikanna, majeppu sitongettongenna iyya. innī jā'ilun fil-arḍi
khalīfah… maeloka pancaji seddie pemimpin ri lebonna iyyae tanae. Niga
najello, nene’Ta Adam Alaihi Salam. iyyanae najeppui pattareka’e
ambo’na rupa tau’e. jadi idi ana eppona Adam Alaihi Salam, dua tu tubu
ritiwi lolang ri lebonna iyyae tanae, duato tu ambo’na. engka ambo’na
rupatau’e, engkato ambo’na tau’we. De’ yamanenna iyyatu ripatau’we
engkamaneng tau’. Tapi iyyamanenna tau’we engmanengngi rupatau’.
iyyatomitu macaji tau’ iyyae makessingnge paringngeranna, toddo
makessingngi teppe’na ri Puang Sewwana. Niga ambo’na tau’we iyyarega
ambo’na nyawae. Ribukka’i paimeng aqorangnge nasaba iyyatu
aqorangnge konitu onrong dasarnna agamae. Ri bukka aqorangnge
nainappa pikkiriki madeceng pekkocarana iyyaro Puang Allah SWT.
napancaji Nabi Adam Alaihi Salam, napancaji kassara’na. apa iyyatu
rupatau’we. ipancajiwi, iyyatu tau’e. denaripancaji, naseeppummi Puang
Allah SWT.
Mabiasatu engka pakkutana pattasauwuf, makkedae, mateppekki gaa
iyyamanenna lolang ri lebo’na iyyae tanae anu ripancajingenna maneng
Puang Allah SWT. makkedanitu. iyye, anunna maneng tu Puang Allah
SWT. tapi makkedaitu pattasauwuf’e, engka seddi anunna puang Allah
SWT. naiyakia denapancajiki Puang Allah SWT. teegairo. iyyanaritu tau’e.
denapancajiki Puang Allah SWT. kita buka Al-Qur’an Surah Shad
nappannesangakki Puang Allah SWT dalam ayat 71, 72. Makkedai Puang
Allah SWT. Iż qāla rabbuka lil-malā`ikah…. pada inggirangngi wettunna
makkedai Puang Allah SWT ri malaika’na makkeda innī khāliqum
basyaram min ṭīn… majeppu sitongengttongenna maeloka pancajiki
rupatau’we pole rialusu’na tanae, rupatau’we ripancaji Puang Allah SWT
pole rialusu’na tanae. Nainappa narekko sukku’ni. Agasi naseng Puang
Allah SWT. ayat 72, Fa iżā sawwaituhụ wa nafakhtu fīhi mir rụḥī ….
Narekko sukku’ni kassara’na, engkani uluwa’na ganngka cappa kanuku
ajena. Aganaseng Puang Allah SWT. wanafahtufiiruh…. Useppungenni
koritu saisanna pole ri alusu mappancaji’ku. Iyyanae napake mannyawa.
Nasaba iyya kassara’e depa naulle kedoe. Napake mannyawa ritella’ni idi
rupatauwe makkedani nyawa, makkeda pattasawuf’e. tau. Niga asenna
iyyatau’e wabubansyy…… Nabi Isa napedangngi bani israil, engkatu matu
riaseng ahmad, makkeda pattareka’e ambonna tauwe ritella’i ahmad. De
napancajiki Puag Allah SWT. naseppummi Puang Allah SWT. iyyatonatu
biasa pattasawuf’e napuada makkeda Naiyya Massompae Ri Sompae.
Seuwwai, Naiyya Makkiringnge na Mattarima’e, Seuwwai toi’. Bettuanna
ada, iyyatu atae na Puangnge. Seddimi, atae pole kometoi ri Puang Allah
SWT. Puang Allah SWT. pancajiwi. Tapi narekko denamadeceng
pahangnge mangkalingae, mabiasa ripajai massempajang, ripajaini
matturue, nasaba makkedaki aleku meto usompa, iyyameto suju’ usujuki
meto aleku. Lebbi upajai masempajangnge. Narekko tareka sala’I
paggangkanna. Narekko madeceng pahangnge, Insya Allah, pede
mareppekki lao ri Puang Allah SWT.
Ata malebbina Puang Allahn SWT. iyyanae ahmad tama’ni ri tubu
kassara’na Nabi Adam Alaihi Salam, tapi depa naisseng pasilaingengngi
tegae hallala, tegae haram, tegae madeceng, tegae maja’. Momponi
siaga eganna tajang, engka makkeda seppulo eppa sebbu duaratu tajang,
engkato makkeda siaga egana suuro napaturung Puang Allah SWT.
sikotoro egana tajang. Naseddimi kaminang matajang cahayana
iyyanaritu natellani pattareka’e nurung Muhammad. Iyyanatu ripake
pasisaalai tegae hallala, tegae haram, tegae Puang, tegae Ata’, tegae waji
ri sompa, tegae haram risompa. Jadi uppanna-uppanna, mataane’i
kassara’e, nasumpo-sumpo nyaawaki pigau’i passompae, tajeppue
madeceng makkedai madodongtu tajanna nurung Muhammad rilalenna
watakkalewe, snaaba narekko awatangeng elo ripake massompa,
meegapi namawatangpi na’idi, nekiya temmaka tane’na napasuju linrona,
narekko asogireng maelo ripake massidekka, tosogi maelu massidekka,
maeka tau peddi nakala passidekkana tau sogie. Nasaba magai, tanni’a
lahirenngnge mabbicara narekko farenta syarea. Agapale mabbicara,
iyanaritu batingnge siruntu padanna bating.
Ata malebbina Puang Allah SWT. reweki paimeng riseddei werekada
makkeda, Aja Muassompa Narekko de’ Mesitettongeng Sibawa Ambo’na
Nyawamu, purani rirampe makkeda Ambo’na Kassara’e iyaritu Adam
Alaihii Salam, Ambo’na alusu’e iyanaritu Ahmad. Taitani narekko
massompaki, ripammulainna nasaba atettong, makkeda’i pattareka’e,
tettokko ri alefu’e naribacani makkeda a’, roko’ko ri urufu h’e, naribaca
makkeda ah’, suju’ko ri urufu mim’e, naribaca makkeda ahma, nannie
tudangki ri urufu daleng’e, naribacani makkeda ahmad. Jadi bettuanna
iyatu werekkadae, werekkada makkedae nigi-nigi massompa
denasitettong sibawa Ambo’na nayawana, majeppunna sia-sia’i . puppu
linrona, makka’dara uttuna, mabbettuangi makkeda nigi-nigi tau
massempajang naseng alena, nade’gaga tettonna, ruku’na gangka
suju’na, sesuai dengan anjuran Nabi Muhammad SAW. Majeppunna tania
sempajang asenna. Jadi megatu sala Pahang, asengngi alena massepajang
narekko tudang massalekka lebba natutu matanna nainappa napake lettu
memenno rimunri telletu’mu, iyyare’ga tudang naseng alena nappa
nawanawa’i narekko momponi sulo matanna , nasengngi siruntu cayyana
Nurung Muhammad. Makkeda’i guru’ta pattareka’e makkeda pasisaalai
na’. mannawanawa, mappikkiri, nannia maringngerang. Jamajamanna
iyyae Ata’e tellu’i, tapi seddimitu lettu. Atae mabbiasa mannawanawa,
atae mabbiasa mappikkkiri, nennia atae mabbiasa maringngerang,
seddimitu napparelluang Puangnge. iyyanaritu maringngerang lao
rialena. Appikkirikengnge, anawanawae urusanna linoe, nennia
aringngerangnge tosi urusannatu atae nennia Puagnge. Oleh karena itu,
riala’i kesimpulan bicara makkeda, ajana’ tamega cenga ritujunna
tareka’e, tapakessingi tettotta, roko’ta, suju’ta, narekko faulle’i
kassara’ta. Kecuali narekko malaasa’ki wedding muaki’tu massempajang
tudang, massempajang leu, nekia narekko seha’ki, tapakessingi tettonna,
tapakessingi roko’ta, tapakessingi suju’ta, nennia tapakessingi tudang’na,
sukkunitu passompa’Ta. iyana riaseng pakkiring lettu passompa natarima
Puang Sewwae.
Ata malebbina Puang Allah SWT. makkoniro riala
asiparingngerangengngi mummuare’gi nawerengngi atajangeng ati’
Puang Allah SWT. namalomo rijama parentana. Syarea’e nennia rininiri
pappesangkana dewata sewwae. Engkaki weding mancaji ata mareppe,
mancajiki tau, tannia bawang ripatau, nasaba iyyatu ripatau’e okkomi ri
lebo’na tana’e makkeguna, iyyatosi tau’e makkeguna ri libo’na iyyae
tana’e nenniya makkeguna toi ri ahera matti. Makkoniro riala
asiparingngerang.

Barakallahu lii wa lakum fill qur’aanil azhiim wa naf’nii wa

iyyaakumbima fihi minal aayaati wa dzkril hakim. Aquulu qowlii
hadzaa wa astaghfirullaaha lii wa lakum wa lisaa iril muslimiina
min kulli danbin fastaghfiruuhu innahu huwal ghafuurur rahiimu.