PENGELAYASI PESTA KERJA RANI GBKP RUNGGUN TEBING TINGGI

Minggu, 04 Juli 2021

Pelaksanaan Kerja Rani ibas gerejanta enggo merupaken sada kegiatan “wari
raya” si ilaksanakan gerejanta tiap tahun. Kerja Rani e pe imaknai sebage
ungkapen persembahen pengataken bujur man Dibata erkiteken sigejapken Dibata
enggo masu – masu kegeluhenta ibas kerina ulih pendahinta, subuk e ibas hasil
juma, usaha ntah pe gaji si idat arah pendahin si ilakoken kita ibas setahun, jenari
erpengarapen ka kita maka ibas tahun – tahun si reh pe Dibata tetap simasu –
masu kerina ulih pendahinta.

Uga bentuk kerna pelaksanaan Kerja Rani ibas gerejanta situhuna labo soal kel
man banta, sebab si pentingna ibas perayaan e situhuna eme pelaksanaan
Pembuktian pengakun kinitekenta, maka tuhu sigejapken Dibata simasu – masu
kegeluhenta ras erkiteken sie me maka si sehken pengataken bujurta sebage
tanda pengakun kita la pernah lupa nandangi keleng ate Dibata si isehkenNa man
banta.

Sejarah Pustakanta Si Badia nuriken man banta kerna pelaksanaan Kerja Rani si
ilakoken kalak Israel, lit pe kerna makna ras pelaksanaan Kerja Rani si ilakoken
kalak Israel ibas eme :

 Pelaksanaan Kerja Rani e eme pedah si isehken Musa man kalak Israel ras arus ilakoken bangsa e kenca
bengket kubas taneh Kanaan. Salah sada pedah si isehken Musa e, eme gelah kalak Israel tetap nginget ras
mpehaga Dibata, si enggo mulahi bangsa e ibas kerina kiniseranna i Mesir (Kel. 23 : 19, 34 : 26, Bil 18 :
21).
 Kerja Rani eme perentah ntah aturen si arus ilakoken bangsa e ibas tep – tep tahun dingen setiap kalak
Israel si la ngelakokenca, ia ianggap kalak si la mematuhi aturen siberlaku nandangi kalak Israel (Kel 23 :
16, 19 ; 34 : 22, 26).
 Kerja Rani eme sebage tanda pengataken bujur ras encidahken kepatuhen ras penghormaten man Dibata
ras di kune la ilakoken maka kalak Israel situhuna menolak ntah la mengakui maka Dibata me si enggo
masu – masu bangsa e ibas kerina kegeluhenna.
 Ibas nehken persembahen si isehken arus simehulina la banci mekarus ras arus alu pusuh si ermeriah ukur
(Ul 16 : 9 – 12). Ibas konteks sie ka me Paulus ningeti kalak Korintus alu ngataken “sekalak-sekalak
iberekennalah sue ras si enggo itetapkenna i bas ukurna; ola alu pusuh jungut-jungut entah pe bagi si
terpaksa, sabab Dibata ngkelengi kalak si mere alu ukur meriah” (II Kor 9 : 6 – 9).
 Kerja Rani e pe imaknai sebage sada kiniersadaan (pemersatu) kerina kalak Israel erkiteken sie me maka
Kerja Rani imeriahken bagi sada kerja – kerja mbelin. Ibas konsep kiniersadan e me maka kerina kalak
Israel radu ras memeriahken dingen menikmati ulih Kerja Rani e. Bagepe la banci lang bagin ulih Kerja
 Rani e pe arus isehken nandangi budak, kalak pertandang, anak yatim ras diberu balu – balu (Kel 23 : 16,
34 : 22, Ul 16 : 9 – 12, Im 27 : 17).
Ibas awal tulisen enda ndai isingetkan man banta, uga bentuk pelaksanaan
Kerja Rani e labo perlu si ipersoalken, maksudna eme gelah ula kita hanya
terkesan ndabuh kubas perayanna saja, tapi marilah silakoken Kerja Rani e lebih
kubas makna si ni iarapken Dibata eme sebage Pembuktian pengakun kinitekenta,
maka tuhu sigejapken Dibata simasu – masu kerina kegeluhenta, janah erkiteken
sie me si sehken pengataken bujurta sebage bukti kita la pernah lupa nandangi
keleng ate si isehken Dibata man banta.

Alu bage maka amin ibas bentuk amplop pe si sehken persembahen Kerja Rani situhuna labo salah, sebab
cara e mungkin lebih praktis ras banci menampung kerina hasil pendahinta, si salah eme adi la si sehken
persembahen e dingen la merekenca la dem alu pengataken bujur man Dibata.
Emaka tep-tep keluarga ngendesken persembahan pengataken bujurna man Tuhan rikutken kai si enggo si
aloken ibas Tuhan nari, la alu pusuh si jungut-jungut entah pe terpaksa, sabab Dibata engkelengi kalak si mere alu
ukur meriah. Kalak simuat bagin ngendesken persembahen kerja Rani e enggo ikut ibas nehken perbahanen
simehuli sebab selain guna mpehaga Dibata persembahen kerja rani enda igunaken nampati kalak musil,
pertandang, diberu balu-balu ras anak melumang. Pasu-pasu si enggo ialoken ibas DIbata nari lit ije bagin kalak si
musil-musil janah sienda iendesken arah persembahen kerja rani.
Ibas GBKP persembahen kerja rani enda 40 % isetor ku Moderamen via klasis ras 60 % tading ibas
runggun gunana kerina nampati dahin pelayanen GBKP. Muat bagin kita ibas ngendesken persembahen kerja
rani, ertina kita pe enggo muat bagin ibas ndahiken dahin pelayanen gereja Tuhan.
Alu bage dage, Ibas minggu Kerja Rani enda si sehkenlah dage kai kin si arus
si sehken man Dibata alu dem pengertin ras pengataken bujur man Dibata ras
sebage Pembuktian pengakun kinitekenta, ibas penggejapen Dibata nge simasu –
masu kegeluhenta. Sebab ibas ngelakoken Kerja Rani e kita pe enggo ikut mereken
dukungenta nandangi kerina pelayanen gerejanta subuk ibas tingkat Runggun
bagepe tingkat Sinode ras sie kerina sue kel tupung sisehken perpadanenta tupung
kita ingawanken maka kita nggit nanggung tanggungenta i bas GBKP enda.
Selamat Kerja Rani man banta ngawan perpulungen GBKP, mari si sehken
persembahken persembahen Kerja Rani-ta ibas tahun enda, dingen si itotoken pe
gelah pelaksanaan Kerja Rani ibas runggunta erdalen alu mehuli dingen dem alu
keriahen ukur. Sehken dage simehulina man Dibata saja sebab e me tandana kita
mpehaga Tuhan dingen malem me ate kasa kalak sibage ukurna sebab
Dibata me sisimasu-masu kegeluhenna.
.