KERJA RANI

Kai kin Kerja Rani e?

Isingetken ibas Padan Sindekah, Ulangen 16 : 9, Kerja Rani eme wari raya kenca pitu (7) minggu bangsa
Israel mbenaken mperani gandum, janah kenca bage la banci lang harus ibahan Kerja Rani GUNA
PEHAGAKEN TUHAN DIBATANDU, alu maba persembahen meriah ukur man Tuhan. Buena rikutken PASU-
PASU TUHAN SI IBEREKENNA MAN BANDU. (Ulangen 16 : 10 ).

Tujun pesta enda, guna ngingetken bangsa Israel nandangi keleng ate Dibata, uga nai bangsa enda jadi
budak i Mesir, uga serana kegeluhenna tupung paksa sie. Janah nai kadena pe labo lit asum ia jadi budak I
mesir. Tapi erkite-kiteken lias ate Tuhan, ibaba Tuhan bangsa enda ndarat I mesir nari. Itaruhken Tuhan
bangsa enda ku taneh Kanaan. Janah ipasu-pasu Tuhan kerina si idahiken bangsa enda, seh maka simpar
pasu-pasu Tuhan e man bana. Pesta enda pe ngingetken kita maka taneh e Dibata kap empuna. Ngejapken
kerina pasu-pasu e, maka bangsa Israel wajib guna nehken persembahen man Tuhan, ibas ulih peraninna.

La hanya man kalak israel, kita pe iajuk guna nggejapken pasu-pasu Tuhan e ibas geluhta. Erbage-bage pasu-
pasu Tuhan si isehkenNa man banta ibas sada tahun enda, arah kerina pendahinta, arah jadu-jabu ta, arah
kesehatenta, rsdna. Uga dage responta ibas kerina pasu-pasu Tuhan e. salah sada si ituntut ibas kita nari
eme nehken Persembahen Kerja Rani. Guna ngingetken kita maka tuhu-tuhu mbelin pasu-pasu Tuhan e man
banta.

Uga carata nehken persembahen Kerja Rani.

Adi misalnya si ergai pasu-pasu Tuhan e Rp. 1.000 saja perwari, ibas enggo ipasu-pasuna geluhta, iberekenna
kesehaten man banta, sehat-sehat kita, anak-anak ta pe sehat-sehat, kemputa sehat-sehat, si ergai pasu-
pasu Tuhan e 1.000 rupiah saja per wari, e ertina persembahen kerja ranita ibas sada tahun e Rp. 365.000. e
hanya Rp. 1.000 per wari, bahkan jajan anak-anakta pe lebih asa si e per wari ibas zaman sigenduari enda.
Hanya labo enda jadi patoken tapi tetap ibas kita nehken persembahen, harus erpalasken keriahen ukur.

Target capaien kerja rani ibas runggunta tahun enda eme: Rp. 12.000.000. Janah bagi semalna maka, 40 %
ulih kerja rani ibas runggun enda nari isetorken ku Moderamen GBKP guna nampati seluruh pelayanen I
belang-belang GBKP enda, janah si 60 % e tading ibas Runggunta guna menunjang pelayanen-pelayanen I
Runggunta. Jadi adi misalna sidat kerja rani I Runggunta Semangat Gunung Tahun enda Rp. 12.000.000
(sepuluh dua juta), Rp. 4.800.000 (empat juta waluh ratus ribu) si setorken ku Moderamen GBKP.
Rp. 7.200.000 (pitu juta dua ratus ribu) tading i Runggunta guna dahin-dahin Runggun.

Tahun enda kerja ranita si mulai ibas bulan September (9) enda, alu pengarapen maka ibas bulan Oktober
(10) enggo si setorken ku bendahara sektor ntah pe ku bendahara Runggun.

Mungkin reh nina ukurta, bagenda kel situasi covid, agag sulit kita nehken persembahen bage belinna, hanya
penting ka pe guna si inget, maka luar biasa mbelin situhuna pasu-pasu Tuhan e ibas geluhta, seh ibas paksa
genduari enda aminna pe situasi Covid lenga ngadi tapi tetap kita ijagai Tuhan, iberekenna kesehaten man
banta ras seisi jabuta, mejuah-juah kita seh ibas paksa enda.

Mari sisehken persembahenta simehulina man Tuhan Dibata

Tuhan simasu-masu kita, Amin

GBKP Runggun Semangat Gunung,

Pdt. Joe Charis Ginting, M.Th