PARTURE NI MINGGU

PESTA TAHUN PROFESIONALISME

DALAM PENATALAYANAN
DAN PESTA GOTILON
HKBP KEDATON RESORT KEDATON
MINGGU, 08 OKTOBER 2023

Tema :
Kerjakanlah Keselamatanmu dengan Takut dan Gentar (Filipi 2 : 12)
Sub Thema :
Dengan Semangat Tahun Profesionalisme dalam Penatalayanan, HKBP
Kedaton Resort Kedaton Semakin Gigih Mengerjakan Keselamatan
dengan Kesadaran Mempersembahkan yang Terbaik Bagi Tuhan.

I. Persiapan :
Mangarade di Konsistori (Bilut Parhobasan)
Prosesi disambut Tortor Sikola Minggu (di tingki prosesi sude ruas
naung di Tempat Ibadah jongjong di ingananna be sahat tu na sidung
Votum)

II. Ibadah :
1. Prelidium Ibadah, Ende Pujipujian dohot Votum (Jongjong)
(U: Uluan; KP : Ketua Panitia; R: Ruas)
U : Hamu angka dongan, pungkaonta ma ulaonta, ima marhite
parmingguon tingki on. Ro do hita tu Gareja on marpahean na uli,
marulos na uli. Garenjanta pe digabagabai marhite angka bunga na uli
dohot angka ulos na uli. Gok do nang angka parbue ni hauma dohot
ladang. Aha do na masa ? Dia ma ultopna, dia ma nangkatna. Dia ma
nidokna, Dia ma nang hatana ?
KP : Ima tutu Panditanami; na mandok mauliate do hita tu Debata
Amanta i na mangaramoti HuriaNa, Khususna HKBP Kedaton
Ressot Kedaton on. Dibagasan sadarion tung tama do hita
mandok mauliate tu Debata, disaluhut pandonganion dohot
pangaramotion ni Debata di sude pardalan ni ngolunta. Di ari
sadarion dipaloas Debata huria-Na, patupahon PESTA TAHUN
Hal. 1
 PROFESIONALISME DALAM PENATALAYANAN DAN
PESTA GOTILON, manghalashon pasupasu dohot denggan basa
ni Jahowa dibagasan ngolunta. Saluhutna i tung asi ni roha ni
Debata do i tu hita. Hamauliateaon ni rohanami tu Debata nunga
huboan hami pelean hamauliateaon nami be, sipasahatonnami tu
Debata marhite Huria on. Alani i uluhon hamu ma hami
Panditanami di Pestanta on. Ima nidokna laos ima hatana.
U : Antong molo i do hape, songon nidok ni umpasa ma dohonon :
Eme Sitambatua ma parlinggoman ni Siborok, Debata silehon tua,
horas ma HKBP Kedaton Ressort Kedaton, nang hami saluhutna
ruasna diparorot.
R : Emma tutu !
U : Andorang so tapungka ulaon on, jumolo ma taalualuhon tu Tuhanta i
asa Ibana na mandongani jala margogoihon hita saluhutna. Onpe
amang Parmusiknami, alualuhon damangma jolo tu Debata Ama,
Sitompa langit dohot tano dohot nasa isi na.
Parmusik : ........................................
U : Alualuhon ma muse tu AnakNa, Tuhan Jesus Kristus Sipalua i.
Parmusik : ........................................
U : Alualuhon ma muse tu Tondi Parbadia na margogoihon jala na
mangondihon HuriaNa i, marhaporseaon tu Ibana.
Parmusik : ........................................
U : Di hita saluhutna ruas ni Huria ni Tuhanta na punguon, pungkaonta
ma ulaonta marhite ende; on ma songon Tortor Mulamula, laos on ma
Tortor Sombanta tu Tuhanta Debata, marende ma hita.
(Marende sian Buku Ende No. 585:1 - 3)
1. Somba ma Jahowa Debatanta, Amen Haleluya/ Sigomgom langit
tano on ro di isina, Amen Haleluya/ Beta hita lao marsinggang tu
joloNa, Amen Haleluya/ Na songkal jala nabadia do Jahowa,
Amen Haleluya,/ Endehon; Amen Haleluya, endehon, Amen
Haleluya,/ Endehon amen Haleluya, endehon Amen Haleluya,/
Endehon Amen Haleluya, endehon Amen Haleluya,/ Endehon
Amen Haleluya, endehon Amen Haleluya.
2. Puji ma Jahowa Debatanta, Amen Haleluya/ Parasi roha na
sumurung do Ibana, Amen Haleluya/ Taendehon ma goar ni
Debatanta, Amen Haleluya/ Alani denggan ni basaNa na tu hita,
Amen Haleluya/ Endehon; Amen Haleluya, endehon, Amen
Hal. 2
 Haleluya,/ Endehon amen Haleluya, endehon Amen Haleluya,/
Endehon Amen Haleluya, endehon Amen Haleluya,/ Endehon
Amen Haleluya, endehon Amen Haleluya.
...Interlude...
3. Sangap di Jahowa Debatanta amen Haleluya!/ Na bonar jala
marmulia do Jahowa, amen Haleluya./ Tapatimbul ma goar ni
Debatanta! Amen Haleluya!/ Na tigor jala na sun gogo salelengna,
amen haleluya./ Endehon; Amen Haleluya, endehon, Amen
Haleluya,/ Endehon amen Haleluya, endehon Amen Haleluya,/
Endehon Amen Haleluya, endehon Amen Haleluya,/ Endehon
Amen Haleluya, endehon Amen Haleluya.

2. Votum :
U : Marhitehite goar ni Debata Ama, dohot goar ni AnakNa Tuhan Jesus
Kristus dohot goar ni Tondi Parbadia na tumompa langit dohot tano
on.
R : Amen
U : Songon on do Hata ni Tuhan Jesus : Martua ma angka na mauas male
mida hatigoran, ai pabosuron do nasida. Martua ma angka na ias tondi,
ai idaonnasida do Debata. Haleluya!
U+R : (mangendehon) Haleluya....haleluya....haleluya.
U : Martangiang ma hita!
Ale Tuhan Debata, Amanami na di banua ginjang! Hupangido hami tu
Ho, sai lehon ma tu hami Tondi ni hasintongan dohot dame, asa
tangkas huboto hami nasa lomo ni rohaM, jala urupi ma hami
mangulahon i sian nasa gogonami marhitehite AnakMu, Tuhan Jesus
Kristus, Tuhannami.
U+R : Amen (Huria
Hundul)

3. Marende BE. No. 128 : 4 – 5 “Ditanda Debatanta”

4. Ditanda do nasida dibaen holong sude/ Rohana di Ibana nang di
donganna pe/ Ai i do na mandasdas nasida sai tongtong,/;,;Asa tung
dipatolhas, patikNa i sintong.;,;
5. Sai songon i ditanda Tuhanta jolma i,/ Na mangoloi hataNa di nasa
bangso i./ Haporseaon i do partinandaan i,/;,;Padohot pangkirimon
nang haholongon i.;,;
Hal. 3
4. Patik :
U : Tabege ma Patik ni Debata di Minggunta sadarion na laos PESTA
TAHUN PROFESIONALISME DALAM PENATALAYANAN
DAN PESTA GOTILON HKBP KEDATON. Ia Patik i sulusulu do i
dipardalanan ni ngolunta, laos poda sipaingot na mansai arga situtu.
Didok hata ni umpasa, “tinallik bulung sihupi, pinarsaong bulung
siala; sotung sumolsol di pudi, ndada sipaingot na soada”.
R : Emma tutu !
U : Antong tangihon hamu ma Patik ni Debata di Minggunta sadari on,
ima sian na tarsurat di Epesus 5 : 8 - 9 :
Ai na holom do hamu najolo; alai tiur do anggo nuaeng di bagasan
Tuhan i: Marparange ma hamu, songon angka anak hatiuron. Ai nasa
habasaon dohot hatigoran dohot hasintongan, i do parbue ni na tiur i.
Nunga dibege hamu patik ni Debata. Dohonon ma songon nidok ni
hata umpasa“ Aek marjullakjullak, marjullakjullak sian batu; patik ni
Debata naung marsaringar, ampu hamu ma mardongan las ni roha”
R : Emma tutu !.
U : Antong rap mangido gogo ma hita sian Tuhan Debata :
R : Ale Tuhan Debata, sai pargogoi ma hami mangulahon na hombar
tu PatikMi. Amen.

5. Marende BE. No. 707 : 1 + 2 “Hagogoon dohot Apulapul”

1. Hagogoon dohot apulapul do dilehon Tuhan i tu au,/ ganup ari au
ditogutogu jala sai dipargogoi do au./ Ai hombar tu lomo ni rohaNa do
dilehon Tuhan i tu au./ Ro marsorin arsak las ni roha haporseaonku
dipatau.
...Ayat 2 Jongjong...
2. Ganup tingki Tuhan raphon ahu, jala sai dipasupasu au./Sai di togu au
molo madabu, talu musu jala monang au./ Ai pargogo nasohatudosan,
Debatangku salelengna i/ Mangalehon dame dohot tua, tu angka
nabojok roha i

6. Tangiang Manopoti Dosa :

U : Tatopoti ma dosanta tu jolo ni Debata, tapaunduk jala tapaserep ma
rohanta, Martangiang ma hita! Ale Tuhan Debata, Pargogo na so
hatudosan, Parasiroha mida hami na dangol on! Na ro do hami tu
Hal. 4
 joloM manopoti dosanami na godang i. Di bagasan hajahaton do hami
tubu jala ndang adong haporseaon di bagasan rohanami hian, saluhut
do hami manimbil sian angka dalanMu.
R : Jotjot do hulaosi hami patikMu na marsuru hami asa tongtong
mandok mauliate hami tu Ho. Ai jotjot ndang hurajumi hami
holong dohot pangaramotionMu di hami. Jotjot hami
marpangusandean tu pingkirannami.
ReNa : Hami angka Remaja dohot Naposo, jotjot do mangalaosi Ho ale
Tuhan. Olo do ndang hutangihon hami hataM, sai hagiot nami
sambing do huula hami. Jotjot hami lalap alani hamajuon ni
zaman on, gabe sundat mangula angka ulaonnami alani na
margame di HP. Ndang tinggil hami manangihon angka poda sian
natoras nami. Ale Tuhan, asi ma rohaM di hami, sesa ma dosa
nami!
Ama : Husulingkit hami ngolu nami, tung godang do dosa na huula
hami. Tung lemba do hami mangulahon lomo ni rohaM di bagas
nami be, dohot tu angka dongan nami. Jotjot do lupa hami
manghaholongi pardihuta nami be, dohot angka ianakkonnami
ala ni angka kesibukan. Huparsinta hami do nian, asa lam maju
angka gelleng nami, hape lupa do hami marpungu, mangajari
dohot mamparrohahon nasida. Ale Tuhan, asi ma rohaM di hami
!
Ina : Hami pe, jotjot do ndang huhaholongi hami angka dongan nami
songon diri nami. Naeng do hami nian dihaholongi, alai maol
hami manghaholongi. Sai jotjot dope mian di hami roha na sai
marungutungut maradophon keluarga lumobi huriaM i; gabe
laos bangkol hami manghamauliatehon asiasiM. Ale Tuhan, asi
ma roham di hami sesa ma dosa nami!
Phd : Ale Tuhan, hami pe angka parhaladoM, godang do dosa na
huulahon hami. Jotjot do ndang huulahon hami tohonannami
songon parhalado. Sipata lupa do hami di angka ulaon nami
manghobasi ruas ni huriaM, manghirpasi angka na losok roha,
patoguhon angka na gale, mangapuli angka na marsak roha,
dohot lan angka naasing. Ale Tuhan, asi ma rohaM di hami jala
sesa ma sude dosa nami!
U : Mansai godang do pangalaosionnami di PatikMu. Alai ingot ma hami,
ale Tuhan, ala ni denggan ni basaM dohot asi ni rohaM. Sai unang
Hal. 5
 paingotingot angka dosa ni haposoonnami dohot pangalaosionnami;
sai ingot ma hami hombar tu asi ni rohaM dohot denggan ni basaM ala
ni GoarMu. Ale Tuhan Jesus, marpamuati ma rohaM di dosanami na
godang i! Amen.
SL : (mangendehon ¼ soara) BE. No. 683 : 3 ”DiadopanMu Jesus”
1. Di adopanMu Jesus tarsolsol bagi rohangkon/Muba ma au tujolo
on. DiadopanMu Jesus.
U : Bagabaga ni Debata taringot tu hasesaan ni dosanta : Humophop hita,
gabe dosa do Ibana na so tumanda dosa dibahen Debata, asa gabe
hatigoran ni Debata hita, marhitehite Ibana. Hasangapon ma di Debata
na diginjang!
R : Amen.

7. Marende BE. No. 743 : 1 - 2 “O Tuhan Togutogu Ma”

1. O Tuhan togutogu ma au, tu dalan lomo ni rohaMi,/ Raphon Ho sonang
mardalan au, nang rahis maol sidalananki,/ TondiMi baen manggohi
au on, Margogoihon au na posoMon,/ Pasangap Ho di ngolungkon,
paima sahat tu surgo au on.
2. Panghulingi ma au O Tuhan, na rade tumangihon hataM,/ Sai tumpahi
ruasMu Tuhan, na uasan nuaeng di hatam,/ Sai patau ma au on
naposom, manjou halak na dao sian Ho,/ Ro di na so tumanda Ho,
muba gabe pangoloi di Ho.

8. Epistel : Lukas 11 : 37 - 42
U : Manghalashon PESTA TAHUN PROFESIONALISME DALAM
PENATALAYANAN DAN PESTA GOTILON HKBP Kedaton,
tajaha ma Hata ni Debata turpuk Epistel di ari Minggu sadari on ima
na tarsurat di Lukas 11 : 37 – 42 :
Andorang dihatahon dope i, diarahon sada halak Parise ma Ibana
mangan; jala bongot ma Ibana, laos hundul ma
R : Alai longang ma Parise i, ala diida, na so jolo marburi Ibana laho
marsipanganon.
U : Jadi didok Tuhan i ma tu ibana : Anggo hamu Parise, duru ni
panginuman dohot mangkuk dipaias hamu; alai ia parbagasanmuna
gok pandoboon dohot hajahaton do.
R : E hamu na hurang roha! Sitompa duruna, nda laos i do na
manompa bagasanna?
Hal. 6
 U : Asal ma dibasabasahon hamu na di bagasanna bahen asiasi, sandok ias
ma na di hamu!
R : Marjea ma hamu Parise, ai diparsampulu hamu do angka
suansuanan na ummetmet, ro di ragamragaman ni simarata; alai
dilaosi hamu do uhum dohot holong ni roha ni Debata. Siulaon do
na sada on; alai unang ma tading na sada an!
U : Olat ni i ma sahatna. Martua do angka na tumangihon Hata ni Debata
jala na umpeopsa!
U+R : Amen

9. Marende BE. No. 272 : 2 - 3 “Sai Tole, Tole Ro Sude”

2. Pangansi do musunta i, sai songon na burju/ Hape gok sipaoto i, sitolon
na tutu,/ Diela hita be mambaen na so ture,/ Mangago daging, tondi pe,
dungo, tajaga be.
...Ayat 3 Jongjong...
3. Solukkon hatigoranmi baen partahananmi,/ Nang pe haporseaon i baen
lombulombu i./ Nang patta pe sai ringgas, rohanta pe hiras,/
Mamaritahon dame i, baen halolomo i.

10. Manghatindangkon Haporseaon :

U : Tahatindangkon ma haporseaonta i, songon na hinatindanghon ni
donganta sahaporseaon di sandok portibi on, rap ma hita mandok :
U+R : Ahu porsea...

11. Tingting :

12. Marende BE. No. 136 :1 - “Bidang Dope Na Holom I” (Pelean Ia & Ib)
1. Bidang dope na holom i, dibangso na di hasiangan i,/;,;Na ni rajaan ni
si bolis i, disomba halak angka begu i.;,;
2. Sai tatap bangso i sude, ai nunga loja do nasida be/;,;Dangolna do
manjou tu surgo i, Mangido tolong tu Jahowa i.;,;
...Interlude...
3. Torang do bagabaga ni Amanta di banuaginjang i/;,;Arahononna jolma
sasude, Tu hasonangan ni rohana be.;,;
4. Tagogo ma pasauthon i. Mamboan hata hangoluan i/;,;Tu nasa bangso
na di tano on, ringkot tabaen ulaon i tongtong.;,;
...Interlude...
Hal. 7
 5. O Raja na di surgo i na dung manobus nasa jolma i,/;,;Tibu sondangi
ma na holom i tu Ho ma taiti hajolmaon i.;,;

13. Jamita : Jesaya 5 : 1 - 7

14. PASAHATHON PELEAN PESTA TAHUN PROFESIONALISME

DALAM PENATALAYANAN DAN PESTA GOTILON :

U : Laho pasahathon peleanta tu Debata itabege ma jolo sian hata ni

Debata :
Tung na lan situtu do angka jadijadianmu, ale Jahowa! Saluhutna i
dipauli Ho marhitehite hapistaran, tung gok jadijadianMu do tano on
(Psalm. 104:24)
Ingkon pelehononmu huhut angka pelean hamauliateaon, laos
panganonmu disi, jala marlas ni roha ho di adopan ni Jahowa,
Debatam (5 Musa 27:7)
Ingot ma : Na manaburhon otik, otik do gotilonna; jala na manaburhon
managam pasupasu, mangalap pasupasu di na manggotil. Ganup ma
nionjar ni rohana, unang ma sian muruk manang sian na so tarjua; ai
dihaholongi Debata do na las roha mangalehon (2 Kor 9:6-7)
Antong tapasahat ma peleanta... :
(DIATURHON Panitia ma Parjojorna) :

Mangendehon BE. No. 848 : 1 - 3 “Di Son Adong Huboan

Tuhan” (Pelean II dohot Amplop Pesta Gotilon + Silua)
1. Dison adong huboan Tuhan, parbue ni ngolungku na so tardok
nian/ Sadia ma argana Tuhan molo sai nirajuman sude denggan
basaM?/ Jalo ma Tuhan, sai las ma rohaM.
...Interlude...
(Singkola Minggu-Remaja-Naposobulung) :
2. Tanganku na metmet da TUHAN, na so hea mansari dope au on
TUHAN; /Rohangku ma hulehon TUHAN, na boi pelehononghu
gabe las ni rohaM/ Jalo ma TUHAN, sai las ma roham.
...Interlude...
(Sude ma mangendehon) :

Hal. 8
 3. Huingot do hataM da TUHAN, ingkon sarihononhon anggim na
metmetan,/ Ampehon ma tangan-Mu sangkan, itak na otik i unang
suda nian, / Jalo ma Tuhan, sai las ma rohaM.
...Interlude...

15. Tangiang Panutup, Tangiang Pelean Dohot Pasupasu :

U : Nunga taulahon parmingguanta, jala di son nunga tapapungu Peleanta
tu Debata. On ma na songon siluanta tu Debata patuduhon las ni
rohanta ala asi dohot holong ni rohaNa, diramoti hita sahat tu sadari
on.
On ma Pelean Amplop PESTA TAHUN PROFESIONALISME
DALAM PENATALAYANAN DAN PESTA GOTILON HKBP
Kedaton. Basabasa ni Tuhanta sambing do umbahen bolas hita
mangolu ro di sadari on. Ala ni tapuji ma Tuhanta Pardengganbasa i.
R : Ima tutu, nunga tapapungu pelean Pesta Tahun Profesionalisme
Dalam Penatalayanan Dan Pesta Gotilon HKBP Kedaton on tu
Tuhanta i. Asa, on ma dohononnami : tintin na tinopa gomal
pangarahutna. Otik so sadia pe na hupatupahami, sai godang ma
pinasuna.
U : Imma tutu. Tangki ma jala ualang, galinggang ma jala garege. Tubu
ma anak partahi jala ulubalang di HKBP Kedaton Resort Kedaton on,
dohot boru na marroha, na duma jala pareme. Asa songon hata parpudi
ma dohonon : Sahatsahat ni solu, sahat ma tu bontean, bontean ni
Tigaras. Leleng ma hita on mangolu tumpahan ni Tuhanta, jala sahat
ma tu panggabean huhut horashoras.
R : Emma tutu.
U : Ampu hamu ma na uli i, ampu hamu ma na denggan
R : Imma tutu. Ampuonnami ma nauli, ampuonnami ma nang na
denggan...turtu ninna anduhur, tio ninna lote. Hata na uli, hata na
denggan sian Tuhanta i sai unang ma muba, sai unang ma mose....
Tangga do balatuk, dalandalan laho tu jabu. Barita nauli na sian
Hata ni Tuhanta, dohot angka pasupasuNa ampuonnami ma i
martonga ni jabu. Horas ma di hita saluhutna.
U : Amang Parmusiknami ! Ala nunga hupasahat hami peleannami tu
Tuhanta pardenggan basa i, buhuanta ma ulaon on marhite gondang
dohot ende hasatan na pinadomu dohot Sitiotio.

Hal. 9
 Marende ma hita sian BE. No. 582:1 ”SANGAP MA DI DEBATA”,
laos on ma gondang dohot tortor hasahatan dohot Sitiotio di hita.
U+R : Sangap ma di Debata Amanta, Amen, Haleluya./ Sangap ma di
anak-Na Tuhan Jesus Kristus, Amen, Haleluya./ Hasangapon ma di
Tondi Parbadia, Amen, Haleluya, / Sangap di Tuhan Debata
Sitolusada, Amen, Haleluya./ Endehon Amen, Haleluya. Endehon
Amen, Haleluya/ Endehon Amen, Haleluya. Endehon Amen,
Haleluya./ Endehon Amen, Haleluya. Endehon Amen, Haleluya.
/Endehon Amen, Haleluya. Endehon Amen, Haleluya.
U : Tapaujung ma ibadah Minggu on, tapasahat ma Peleanta tu Tuhanta.
Martangiang ma hita : (Agenda + Tangiang Pesta Gotilon E.II + Ale
Amanami + Pasupasu + Amen... Amen... Amen...)

U : Horas ma jala gabe di hita saluhutna.

Laho manguduti Ulaonta pinasahat ma tu Panitia Pesta

Hal. 10