➤ Kula nuwun dhumateng para tamu kakung miwah putri ingkang winantu ing suka basuki,
para sepuh, pini sepuh ingkang sampun pana ing pamawas sarta lebda ing pitutur ingkang
pantes hanampi sagungeng sekar pakurmatan
Panjenenganipun para sarjana sujananeng budi, para priyagung pangemban pengembating
praja, para satriyaning nagari minangka pandam pandoming para kawula dasih ingkang
satuhu kinormatan.
Boten katalumpen dhumateng para kadang mitra, wreda mudha ingkang pantes
sinudarsana.
Nun inggih awit saking keparengipun pamangku gati saha kapanatyan bawahan
manton(kepanitiaan acara manten) ing kalenggahan menika. Kula pun ..(nama diri misal
Hendro)..kinen sumileh sarira angemban wuwus ngaturaken wedharing gantha babaring
prasedya.
➤ Para tamu kakung miwah putri sinedhahan ingkang winantu ing suka basuki, madyaning
suka ing kalenggahan menika , Bapa..(nama tuan rumah/pamangku gati)...sekalian
angambali atur pambagyawilujeng awit karawuhan panjenengan sedaya sinarengan raos
panuwun ingkang tanpa pepindhan, mugi keparenga pinarak sinambi ngrantos wosing gati
dumugi pari purnaning pawiwahan ing kalenggahan menika.
➤ Para tamu kakung putri ingkang agung ing darma, boten katalumpen(lali)Bapa..(nama
pamangku gati) sekalian ugi ngaturaken agunging panuwun dhumateng para sanak kadang
miwah tangga tepalih, pamong mitra sedayanipun, ingkang sampun kepareng paring iguh
pratikel menapa dene penggalihan. Sedaya kalawau bapa..(nama pamangku gati) sekalian
garwa boten saget mangsulaken karana lahir, amung kasumanggaaken wonten
ngarsanipun Gusti allah Ingkang Maha Kawasa. Mugi kadarman panjeengan kalawau
dadosa amal kesaenan, saha pikantuk peparing nugraha ingkang satraju(setimpal).
➤ Pepuntaning atur saking bapa..(nama pamangku gati) sarimbit, hambok bilih anggenipun
nampi karawuhan panjenengan sedaya wonten kiranging boja miwah krama, mugi
kaagungna pangaksama panjenengan.
Kula ugi taksih titah sawantah, ingkang kapurba winisesa dening Gusti, kiranging suba sita
kula nglenggana taksih kiranging seserepan ingkang kedah nyadong wewarahing para
winasis ing reh basa tuwin sastra. Hayu-hayu raharja niskala. nuwun.