Balitok min tawiren na kaparak a katayakdang Lamot tan sengeg, itandurok so nanlapuan Pangasinense ak, liket kon ag nasabsabaan.
Ombabaleg ak ya napnoy kanunutan
Alindaway na mundo so nagamoran Lapud maong so armas kon bantagan Bangat na saray atateng ko so ag ilingwan.
Duga la siguro a naamtaan kon
Onaakar so relo tan ombabatik so panaon Lapud singa labat dagem a linmabas so taon Masiblet a bilay, a singa bilonget ed lurem.
Mangan, man-ayayam, naogip tan manaral
Manaral, naogip, man-ayayam tan mangan No maminsan sakey ed saratan so nabalang ed kanunutan Idasal kon aleg labat so naogip tan ombangon so nalingwan.
Maksil a laman so kerew ko’d Dios a Katawan
A singa bilay, agaylay dakep ton pandinayewan COVID19 so naekal la kumon ed intiron kamundoan Tan ontan to met so ermen ed saray kapusoan.
Salaya, duga la siguro a naamtaan kon
Saksakey so bilay a nepeg kon aroen Ompatey ak ya anggapoy sililiknak na ermen Lapud Pangasinense ak, saya so balitok kon tawiren.