PENDAHULUAN

▪︎MAMINTAK KAJI

KATIK PANGKA :

Katik (Sutan Batua)

Kapado Katik lah Ambo mamulang Kato sapatah

Apolah nan Ambo pulangkan kapado katik

Makok dipanggia dunsanak

sarato sagalo aleh ka ateh rumah nan ko

Kok jauah lompat lompatan

Kok dakek sisiak palapah

Ka darek surek

Ka rantau undangan datang

Ka lauik kula siang lapeh

Dalam syariat jo hakikat mnganduang niek jo makasuik

Selang nan bapangka karajo nan bapokok

Yaitunyo ka maminta kaji bilangan tigo hari

Yang mano kaji no itu sapagabian angku katik

Ba'apambarian tantang itu

Kato sapatah pulang ka bake Angku Katik

▪︎MAMULANGKAN MAKAN DAN MINUM

KATIK:

Katik (Sutan Batua)

Kapado Katik lah Ambo mamulang Kato sapatah

Apo lah nan Ambo pulangkan ka bake Angku Katik

Kapa timbago tiang perak

Balayiah ka kampuang cino

Balabuah ka tanah arab

Nahkodo tagak mangamudi

Manjago timur jo salatan

Manantua kan barat jo utara

Ba itu undang palayaran

Tantang jamba nan tahedang

Dari ujuang lalu ka pangka

Sadondong galeh jo cawan

Barisi aie ka sadonyo

Heran lah mato mamandangi

Nan bak bintang di ateh langik

Di tapi sambuik bairiang

Tantang jamba nan talatak

Tantang aie nan taladuang

Jamba talatak mintak dimakan

Aie taladuang mintak di minum

Ba'a pambarian Angku Katik tantang itu

Kato sapatah pulang ka Angku Katik

▪︎MAMUN BARANTI MAKAN DAN MINUM

KATIK UJUANG :

Katik (Sutan Batua)

Malantak di lantai papan

Indurun di dalam padi

Jamba talatak alah kami minum

Kami mamohon untuak baranti

▪︎MAMINTAK DO'A

Katik (Sutan Batua)

Kapado katik lah ambo mamulang kato sapatah

Apo lah nan jadi pamulangan

Makok dipanggia dunsanak sarato sagalo alek ka ateh rumah nan ko

Ado lah manjadi niek jo makasuik

Diselang nan bapangka karajo nan ba pokok

Yaitunyo MANGAJI BILANGAN 3 HARI

Baso kaji tu alah kito bacoan basamo

Hendaklah manyampai ka baliau itu hendak nyo

Sakali kato mamintak baribu kali dibalasi allah

Atas kabaiakan hendaknyo

Karano karajo alah ba awal alah ba akhir

Pihak di kami si pangkalan

Ka mintak gantuang nan ka tinggi

Ka minta galian ka nan dalam

Carano pariangan Padang Panjang

Dipatiah anak Sungai Sumpu

Kumayan ka kami panggang

Bacolah doa dengan guru-guru

Kato sapatah pulang ka Angku Katik

▪︎MAMUN PULANG

Tik kapado Katik Ambo mamulang kato sapatah

Apo lah nan Ambo pulangkan ka bake Angku Katik

Makok dipanggia kami sarato sagalo alek

Ka ateh rumah nan ko

Yaitu nyo MANGAJI BILANGAN TIGO HARI

Yang mano kaji tu lah babacoan

Sakali kito mamintak baribu kali di balasi Allah

Ateh kabaiakan hendak nyo

Dan ba itu juo di pati pulo dengan doa

Sakali kito mamintak baribu kali hendaknyo dibalasi Allah

Basisuruik basitinggi jatuah

Basi jambo basi dalam kanai

Pihak di kami nan taucap nan panggia

Ka ateh rumah nan ko

Mamohon ka ribaan Angku Katik

Untuak pulang ka tampek masiang-masiang

Kato sapatah pulang ka bake Angku Katik