Part 1

Ijinkan ulun bakisah. Kisah jaman kakanakan bahari.

Kisah ari pamuganya ulun wan bubuhan tulak ka sakulah.

Baisukan ari ulun wan bubuhan tulak ka sakulah . Bubuhan wan ulun samuanya di antar kawitan.
Sabartaan di bawa wan ayah manaiki biskar tuhak. Kacungkongan ulun wan kakawanan baganak di
belakang biskar ayah masing ilah warik kadinginan. Ulun wan kakawan kada wanik babunyi.
Samuaan baranai hajak. Takutan mangganang nyapanya mahadangi di sakulah. Ulun wan kakawanan
kada suah ka tadika. Tantunya garatakkan hati mangganang kaya apa muhak cikgu. Lalaki atawa
bibini.Amun bibini , ulun takutan kana kibit, amun lalaki ulun takutan maniring sisingut sidin nang
garujut garujut.

Bajurut kawitan ulun wan dangsanaknya saing ba biskar ka sakulah maantar anak di hari pamuganya
sakulah. Kawan baik ulun yang pawaninya ngarannya Utuh Banking. Kawitannya bangaran Amat
Mahing. Dua baranak umpat jua bajurut di panghujung sakali. Gadabauuuu. Bunyi ilah mambarang
tajun ka parit. “Bapala banar kau, utuh banking” kuriak Amat Mahing tangah bakunyung di dalam
parit.Baburinik banyu kabila biskar tuhak Amat Mahing tinggalam.

Kawitan ulun gin mamaraki Amat Mahing. “Kaya apa ka inik Mat?” kawitan ulun manakoni.

“ Mambari sarik, Gawian si utuh bangking. Asaku inyak wani handak ka sakulah. Amun dirumah
mahing banar. Di palupuh wan garagai atawa handayang nyior gin kada tatangis. Kurihing kurihing
hajak, kada babakas atawa takutan. Garigitan banar ulun, Si utuh bangking tajun bacuntan dari
biskar asbab takutan handak ka sakulah. Ulun takajut, hunya nyang-hunya nyang biskar. Maka am,
ulun ta tajun ka parit.” Jar Amat Mahing.

Kaliatan utuh bangking bukah tagak hayam bini kana sasahi hayam jagau. Mancinit bukahnya.
Padang tagah wan pahumaan kada inyak hirani. Bukah tarus bukah hingga bulik ka rumah.

Sabartaan kawitan wan bubuhan manyambung perjalanan ka sakulah. Ulun di belakang biskar tuhak
takutan bangat mangganang nasib di sakulah kainak.

Hadangi kisah satarusnya dari ulun

Tock One