BAHAN SERMON

KHOTBAH MINGGU PENTAKOSTA I, 19 MEI 2024

EP: 1 MUSA 41:37-42 (39); EV: Ul.Ap. 2: 1-13; SP: GALATIA 5: 22
TONDI NAMANGALEHON PANGANTUSION DI RAGAM NI PARHATAAN

I. PATUJOLO
Shaloom, Horas, Selamat Hari Minggu Pentakosta ma dihita saluhutna. Ia lapatan ni minggu Pentakosta ima
minggu hasasaor ni Tondi Parbadia manang ari Palimapuluhon sian Haheheon ni Jesus Kristus. Tutu marhite hasasaor
ni Tondi Parbadia ndang ditadinghon dohot dipasombu Debata hita jolma mandalani ngolu on. Saut do hombar tu
naung nihatahon ni Jesus tu angka siseanNa di nalaho manaek Ibana tu Banuaginjang, didok Jesus: “Sai na
dongananHu do hamu ganup ari, rasirasa ro ja ni hasiangan on”. Marhite Hasasaor ni Tondi Parbadia i do hataridaan
paboa natongtong Debata mandongani angka siseanNa nang hita jolma naung tinobusNa. Ima pabotohon paboa
dibagasan huaso dohot gomgoman ni Debata angka naung tinobusNa i. Antong tajanghonma Tondi ni Debata naung
saor tu hita asa lam boi hita mangantusi ragam ni angka namasa sibolusonta di ngolunta on. Dibahen i talehon ma
rohanta jala taloas ma Tondi ni Tuhan i manorangi pingkiranta di nalaho tamangihon barita nauli di minggu sadarion.

II. HATORANGAN NI TURPUK

Dinalaho manaek Tuhan Jesus mansai momos do dipodahon angka siseanNa i, asa laho tu liat portibion mamodai,
dohot mandidi ganup halak naporsea jala olo manjanghon Jesus i di ngoluna, huhut mangajarhon naung pinatikkon ni
Jesus i bahen sihangoluhonon (pat. Mat.28:19-20). Artina ndang gabe so ulaon dohot parbaritaon taringot tu harajaon
ni Debata naung masa di portibion marhiteon huasoNa. Ingkon lam baritahononhon do i asa sahat sude jolma i porsea
jala manjanghon dohot manghangoluhon Jesus i dingoluna. Asa dung jumpang ari palimapuluhon sian hahehon ni
Jesus manang ari pasampuluhon sian hananaek ni Jesus tu Banuaginjang, di inganan parpunguan ni angka sisean i
songgop ma Tondi Parbadia tu nasida, marhite parngongos ni alogo na gogo mamolus, tarida ni nasida dila ni api
namarjillamjillam laos disonggopi ma nasida. Laos gok Tondi Parbadia ma nasida saluhutna, jala mamungka
marpanghuling ma nasida marguru tu pangalehonon ni Tondi i tu ganup nasida manghatahonsa (bahasa
roh/glossolalia).
Ragam do halak nadohot marpungu dohot angka sisean i, ima halak Jahudi, Partia dohot Media, Elamit dohot
angka namaringanan di Mesopotamia, di Judea dohot di Kappadosia di Pontus dohot di Asia, di Prigia dohot di
Pampilia, di tano Misir dohot di angka luat Libia natungkan Kirene dohot halak Rom na maringanan dison, angka
halak Jahudi ro di angka parguru, angka halak Kreta dohot halak Arab. Lapatanna disude parhataan ni angka halak na
di portibion dihatahon angka sisean ni Jesus i ala saor Tondi Parbadia di nasida. Alai sude angka natorop i ndang
mamoto naung saor Tondi Parbadia tu angka sisean i, ido umbahen dihatahon nasida manginsahi angka sisean i: “Gok
anggur natonggi do nasida”. Sian hata on boi ma antusanta paboa halak naso ginohan ni Tondi Parbadia maol do i
mangantusi aha na diula ni Tondi Parbadia marhite halak naung ginohan ni Tondi.
Disude parhataan na di sude luat boi angka sisean i marhata atikpe halak Jahudi/Israel nasida, on pabotohon paboa
ingkon tu sude liat portibion sahat baritanauli, barita haluaon naung pinatupa ni Debata dibagasan Jesus Kristus Anak
HaholonganNa i mambahen malua jala taruli di hangoluan nasalelengNa angka naporsea di Jesus i. Hombar tu Ojahan
ni turpukta di minggu sadarion diarahon do pangantusionta paboa Tondi Namangalehon Pangantusion Di Ragam
Ni Parhataan. Namarlapatan sian saluhut naso boi taantusi aha namasa dohot nanaeng masa di ngolu on boi do gabe
botoonta pangantusionna ala pangajarion ni Tondi Parbadia dihita. Jala margogo hita laho patoranghon saluhutna i asa
gabe mura antusan ni halak naso manjanghon Tondi Parbadia i dope. Antong mian ma hita dibagasan Tondi Parbadia
asa dapot dihita panorangion dohot gogo hombar tu angka natabolus dohot nanaeng sidalananta dope di ngolunta on.

III. PANIMPULI
Huria jongjong ala huaso ni Debata dibagasan Jesus Kristus naung manaluhon hamatean, hasasaor ni Tondi
Parbadia tu angk sisean i ido naptubohon dirohana hobas borhat laho marzending (marbaritanauli) hombar tu pasuruon
ni Jesus tu angka sisean i, jala gabe torop angka naporsea di Jesus nang apostel dipatindang Debata. Sada
apostel/parhalado napinatindang ni Debata umbahen sahat barita nauli tu tano Batak ima IL.Nomensen. marhite
parbaritaon ni amanta IL.Nomensen gabe sude halak Batak porsea jala manjanghon Kristus. Ulaon dohot huaso ni
Tondi Parbadia do natarida disi, sahat tu partingkian saonari on gabe torop huria jongjong hataridaan ni parsaoran ni
angka naporsea di Jesus i. Marhite turpukta sadarion adong piga-piga hal siondolhonon tu hita paboa naung ginohan ni
Tondi ni Debata hita:
1. Ingkon Roha Pasadahon do Hita
Ulaon ni Tondi Parbadia natangkas tarida di turpuk on ima pasadahon sude halak naro sian namarragam luat tu
Jerusalem (ayat 9-1). Gabe boi sude nasida sada mamuji Tuhan hape marasing do angka luat, latarbelakang
budayana. Saluhutna i masa ala ulaon ni Tondi Parbadia namanorusi tu angka budaya, latarbelakang dohot angka
angka adat tradisi nasida. Suang songoni nang ditonga ni hurianta, marasing do angka latarbelakang pendidikan,
social, budaya, parkarejoan, ekonominta alai boi do hita marsada dibagasan huria i ala huaso hagogoon ni Tondi
Parbadia pasadahon hita dibagasan Jesus Kristus. Songon Jesus Kristus nasada dohot Debata Ama songoni ma
ulaon ni Tondi Parbadia pasadahon sude angka naporsea di Jesus Kristus. Songon angka jolma sian inganan
namarragam marpungu di Jerusalem mamuji Debata, ima habalgaon dohot huaso ni Tondi Parbadia. Dibahen i
songon ruas ni huria naung sinonggopan Tondi ni Tuhan i hita ingkon roha napasadahon do rohanta,, pasadahon
dihasintongan, hatigoran, ulaon nadenggan hombar tu lomo niroha ni Debata. Unang be masa diparsaoran di huria
i parbadaan, parungutungoton, dohot ulaon naso denggan naso hinalomohon roha ni Debata, sandok ulaon angka
nadenggan marhabadiaon ma naingkon ulahononta di ngolunt on. Ai hinorhon ni ulaon nadenggan nataula boi do
gabe porsea jala masuk gabe ruas ni huria angka naso porsea jala naso ruas ni huria dope.
2. Ingkon Parroha Haimbaruon
Ia ulaon ni Tondi Parbadia naung saor tu hita laho paimbaruhon dohot papitahon ngolunta siganup ari. Dila ni api
namarjillamjillam (ayat 2-3), ima tanda namanggombarhon ulaon ni Tondi Parbadia napaiashon rohanta nang
pingkiranta asa bolong sude angka nakotor, nang angka haramunon sian dirinta sandiri. Pataridahononta ma
parangenta siganup ari paboa karakter ni Tondi Parbadia mian dihita. Ulaon Tondi Parbadia naboi ulahononta di
ngolunta siganup ari ima marpanindangion hombar tu barita nauli tu humaliangta, manghaholongi Debata dohot
dongan jolma, mangulahon hasintongan dohot hatigoran, manjaga habadiaon ni ngolunta, ndang mangulahon
ulaon namangaramuni ngolunta, mangurupi angka dongan napatutu siurupan. Nasalelng on ndang adong taulahon
i, saonari di igil sian hita marhite jamitanta sadarion asa taulahon ma i, ai nungga marhaimbaruhon hita dibahen
Debata marhite Tondi Parbadia. Tutu maol do laho mangulahon angka nadenggan di ngolunta, godang do angka
namarsogo niroha tu hita molo taula nadenggan, jala godang do namambahen hita gabe tarela tu portibion. Alai
Debata mandok sai nadongananNa do hita. Aha nanidok ni Debata sai saut do i hombar tu lomo ni rohaNa.
Dibahen i unang laos gabe sumurut hita mangulahon nadenggan alai lam tapaimbaru ma rohanta asa sai tongtong
lomoniroha ni Debata taulahon ima hataridaanna Tondi naung ginohan ni Tondi Parbadia ngolunta. Amen