6 PENTEBA LINGUISTIK

Penteba linguistik ti keterubah iya nya linguistik rama. Linguistik rama tu iya nya pansik
senentang fenomena jaku, ubah ti nyadi ba jaku enggau fungsyen jaku ba semua bansa
jaku lalu nadai ngemeratka aspek baka fonetik enggau jalai jaku. Linguistik rama tu mega
pansik saintifik senentang jaku mensia ti dikena enda ngira jeman ni tauka siti-siti jaku.
Nangkanka nya, linguistik rama tu mega kaul entara jaku enggau bidang pelajar bukai ti
nyengkaum dialek, logik enggau psikologi. Bisi tiga iti kaul dalam linguistik rama iya nya kaul
entara jaku enggau sejarah jaku, kaul entara linguistik enggau semiotik lalu kaul entara jaku
enggau fisiologi enggau akustik. Siti ari penteba linguistik rama tu iya nya ngembuan dua iti
langkah rapat iya nya struktural enggau sosial. Aspek ti dibungkur struktur jaku iya nya
fonologi, morfologi, jalai jaku enggau sistem jaku ti bukai.

Nangkanka nya, penteba linguistik ti kedua iya nya linguistik guna. Linguistik guna
tu asil bidang linguistik enggau bidang pelajar enggau psikologi. Dalam ‘language rekated
isu’ tauka isu bekaul enggau jaku, dia linguistik dikena meretika guna iya dalam pengidup
kitai mensia dalam raban bansa. Linguistik mega bisi guna dalam ‘natural science’. Ambika
chunto iya nya pedagogical language enggau legal language. Chunto bidang linguistik guna
iya nya baka dalam bidang pelajar, bidang antropologi, sosiologi enggau dalam pansik
komunikasyen. Teori, penerang, ripih jalai enggau asil pansik linguistik dikena dalam
pengawa ngajar sereta nulis bup. Deskripsyen jaku baka sistem sebut, sepil, tukuh leka
jaku, ayat enggau reti dikena ngajar jaku. Chunto pengawa ti bekaul enggau linguistik guna
iya nya ngalihka jaku sereta nempa diksionari.

Kelimpah ari nya, penteba linguistik ti ketiga iya nya linguistik banding. Linguistik
banding iya nya pansik senentang penyama enggau bida entara jaku, kelebih agi entara
jaku ti seperugan Chunto iya, jaku Sanskrit enggau jaku Iban bisi sama baka serega enggau
neraka. Penteba ti sebaka dalam fonetik tauka struktur jalai jaku dibanding. Tuju pansik
banding tu iya nya deka meda ubah sereta penyama entara jaku seperugan lalu ngiga kaul
entara jaku nya.

Penteba linguistik ti keempat iya nya linguistik sejarah. Linguistik sejarah tu iya nya
bidang linguistik ti mansik ubah taga panjai enggau taga pandak ba sistem munyi, jalai jaku
enggau jalai jaku. Kelimpah ari nya mega, linguistik sejarah tu mansik pengerembai dalam
jaku senentang cara, kebuah enggau empas ari ubah jaku. Ambika banding, faktor luar ti
meri buah ngagai ubah jaku.

Udah nya, penteba linguistik ti kelima iya nya linguistik diakronik. Linguistik
diakronik tu betukuh sejarah enggau komparatif. Betukuh sejarah enggau komparatif. Tuju
linguistik diakronik iya nya dikena nemu sejarah struktural jaku enggau tukuh sereta ubah
jaku sepemanjai jeman. Linguistik diakronik tu bekaul enggau langkah rapat dalam jaku lalu
meda pengerembai jaku ari kelia nyentukka diatu. Linguistik diakronik tu mega pansik
senentang ubah jaku dalam siti-siti timpuh. Diakronik mai reti ubah jaku nitihka siti-siti jeman.
Chunto ti keterubah iya nya ubah ti nyadi ba sistem Jaku Iban lalu chunto ti kedua iya nya
Jaku Iban Jeman Rajah Brooke. Sinkronik mai reti mansik ubah jaku ari jaku nya nyadi tauka
ditemu nyentukka diatu.

Kepenudi bendar iya nya, linguistik konstektual. Linguistik konstektual iya nya
bidang linguistik ti mansik jaku bepelasarka situasyen sosial. Reti siti-siti leka jaku ditentuka
konteks sereta situasyen randau tauka bejaku. Konteks ti bebida mai reti leka jaku ti bebida.
Reti siti-siti leka jaku mesti bekaul enggau situasyen tauka batang randau dalam
komunikasyen. Penteba prosodi baka penekan, intonasyen enggau ti bukai mesti
dikemeretka kena nemu reti jaku. Nya alai, linguistik kontekstual besangkut-paut enggau
sosiolinguistik enggau linguistik antropologikal.